JOB 36 - BIBEL JAMITA NA DENGGAN

^1-2 Tangihon ma santongkin nari, jana sobar ma ho jolo, mangasahon Debata laing adong dope na giot hudok di ho.

³ Bidang do na huboto, i do na giot pakeonku laho patandahon na tigor na Manompa au.

⁴ Nada adong hata pargabus anggo sian au; halak na tutu situtu marbisuk do na di jolomon.

⁵ Na gogo do anggo Debata! Sasudena do disalpui Ia. Sahalak pe nada adong bile diidasa.

⁶ Anggo pardosa nada lolot dipadiar Ia di hangoluan, dilehen Ia do hatigoran tu angka halak na di pardangolan.

⁷ Diondihon Ia do anggo halak na tigor, markuaso halahi dibaen Ia songon raja, lopus dapotan sangap halahi salolot-lolotna.

⁸ Tapi muda tarrante halak mamake rante bosi, patunda ni pangalahona sandiri,

⁹ jadi ungkapon ni Debata ma dosa dohot haginjangon ni roha ni halahi.

¹⁰ Disuru Ia do halahi manangihon sipaingotNia lalu manadingkon hajahatanna.

¹¹ Muda dioloi halahi do Debata jana marsomba tuSia, mangolu di bagasan dame ma halahi jana sonang lopus tu ujung ni ngoluna.

¹² Tapi muda nada ra halahi manangihon, mate ma halahi di bagasan haotoon.

¹³ Sanga ise na so marTuhan disimpansa do muruk ni roha; maradu diuhum Tuhan, na so ra do halahi mangido partolongan.

¹⁴ Mate loja halahi dompak di haposoanna, angke gok habilean do ngoluna.

¹⁵ Diadu Debata do jolma marhite pardangolan, hasusaan dipake Ia laho patorang rohana.

¹⁶ Madung dipalua Debata ho sian hamaolon, gabe tarbaen ho mandai hadameon, bubung mejamu dohot sipanganon.

¹⁷ Tapi anggo saonnari, hombar tu hajahatanmi, manjagit ma da ho uhuman i.

¹⁸ Jamot ma ho ulang maoto, hara ni hepeng sogok; ulang ho ra gabe lilu hara ni sinadongan.

¹⁹ Nada marguna ho pio-pio mangido tolong, magopo do sandok gogo dohot usaho.

²⁰ Ulang halungunkon borngin na golap, tingki mago do i lalu lintop di angka bangso.

²¹ Jamot ma ho, ulang marbalik tu na hajahatan. Anso ditadingkon ho do hajahatan, i do anggo maksud ni pardangolanmu.

²² Ingot ma da, na santak godang kuaso ni Debata. Adong dehe guru songon godangNia?

²³ Ise ma he tarbaen manontuhon dalan diSia, sanga manuhas Ia sibaen sala?

²⁴ Sai na pujion do Ia hara ni pambaenanNia; jana ho pe patutna dohot mamparsangapi Ia.

²⁵ Sude do halak marnida baenonNia; hum sian na dao do i tartatap hita, hape umpe sahalak na tuk mangastuisa.

²⁶ Na mulia do antong Debata, nada tuk hita mandodoiSa sanga pe maretong angka taonNa.

²⁷ Debata do na mangenet aek sian tano tu angka ombun lalu mangubasa gabe tetek-tetek ni udan.

²⁸ Udan sian ombun diusehon Ia; tu hita jolma diduruskon Ia.

²⁹ Nada sahalak pe na umboto panggulmit ni ombun dohot sora ni ronggur di langit inganan Parmianan Ni Debata.

³⁰ Ditorangi Ia do dohot hilap langit sudena, hape anggo tandolan ni laut laing golap bulita.

³¹ Songon i ma da dalanna pangolu angka bangso dibaen Ia jana dilehen Ia panganon na marlobi-lobian.

³² Ditangkup Ia do hilap dohot tanganNia lalu disuru Ia manyoro soroanna.

³³ Sora ni ronggur do tandana na giot ro bade manggosa, dohot lombu pe mamboto alogo na gogo noma na ro.