JOB 34 - BIBEL JAMITA NA DENGGAN

^1-2 Halak na malo dehe ho jana na marroha? Antong, tangihon ma jolo hata sian iba.

³ Diboto halak do sipanganon na tabo muda dung didaisa, dohot hata pandohan na bisuk muda dung dibegesa.

⁴ Angkon tapareso do parkaro on lalu rap hita pikirkon.

⁵ Ning si Job, ‘Nada adong salangku, hape nada ra Debata mangalehen hatigoran di au.

⁶ Pargabus do iba dietong, hara ni na mandok hasalaan di au nada adong. Saonnari au marbugang na banga, haru pe nian nada au marsala.’

⁷ Jungada dehe diida hamu jolma songon si Job on? Matua ma ia mangincahi tu Debata nada marnamantak!

⁸ Giotnia nian mardongan tu halak na jahat ma dohot margaul tu angka halak na so hasaya.

⁹ Pandoknia, parcuma sajo do da muda giot parayahonnia patulus hagiot ni Debata.

¹⁰ O hamu angka halak na mamboto, tangihon ma! Ra ma he Debata Na Markuaso i mambaen na sala?

¹¹ Dibaloskon Ia do na patut hombar tu pambaenan ni jolma, mambaen tu jolma marguru tu pangalahona.

¹² Nada mambaen hajahatan Debata Na Markuaso; dilehen Ia do hatigoran tu sude jolma.

¹³ Sian ise he lakna dijagit Debata kuasoNia? Ise ma he na pasahatkon portibi on tuSia?

¹⁴ Sugari disintakkon Debata hosa ni jolma, jana dibuatkon mangulahi hosa ni hangoluanna,

¹⁵ tontu gabe mate ma sude mahluk na marhosa, jana gabe orbuk songon di mulana.

¹⁶ Jadi, muda na daulat ma ho, parrohahon ma, paeleng ma pinggolmu jana tangihon ma da.

¹⁷ Salahononmu ma he Debata na tigor jana na gogo i? Diambang ho ma he goyak roha ni Debata di na tigor i?

¹⁸ Diuhumi Debata do da raja dohot na markuaso anggo jahat do halahi jana durako.

¹⁹ Nada Ia teleng tu angka raja, sanga patujolohon na mora sian angka na susa. Harana rap na nitompaNia do halahi sudena.

²⁰ Di tonga borngin, ra do halahi mate tompu. Diuhumi Debata ma halahi jana halahi pe gabe magopu; mura do uhumanNia halak na gogo.

²¹ Dipareso Ia do ngolu ni jolma, diida Ia do sude parkarejoanna.

²² Nada adong na golap sanga songon dia pe holomna, na tarbaen manabunihon halak pardosa.

²³ Nada porlu tontuhonon ni Debata tingkiNa, haroro ni jolma manusia anso adilanNia.

²⁴ So pola jolo ditangkasi dohot diparesosa, diantak Ia do parkuaso jana diangkatsa panggontina.

²⁵ Angke diboto Ia do sanga aha na nibaen ni halahi, gabe digulangkon Ia ma halahi di borngin ni ari lopus gabe malala.

²⁶ Disiksa Ia do halahi hara ni dosana, di jolo ni halak na bahat halahi diuhumi Ia.

²⁷ Harana nada dioloi halahi giot ni rohaNia jana nada diantureskon halahi parentaNia.

²⁸ Patunda ni halahi gabe holsoan angka na pogos, ditangihon Debata andung-andungna.

²⁹ Muda diputuskon roha ni Debata manghohom Ia, nada adong sahalak pe manggagaisa. Muda ditabunihon Ia bohiNia, nada adong be sanga ise na marsuohonsa.

³⁰ Gabe nada margogo be angka bangso, laho manyundati pamisat ni parkuaso na margogo.

³¹ Madung he dioku ho Job, dosamu tu Debata? Madung he marjanji ho na so mangulahi be mardosa?

³² Madung he dipangido ho anso dipatuduhon Ia salami? Madung he marsumpa ho na so datdatanmu mambaen songon i?

³³ Patut ma he oloan ni Debata por ni rohamu, dung so satuju ho tu pambaenan ni Debatamu? Saonnari, ho noma da mamutuskon, nada pola au. Dok ma sanga na aha pandapotmu.

³⁴ Pasti do sude halak na bisuk manolopisa; dohonon ni na marroha na umbege hatangkon ma

³⁵ na so niastuan ni si Job do na nidokna, jana hata na nidoknia pe nada adong astuanna.

³⁶ Muda nitimbang nipatangkas angka hata ni si Job, botooniba ma i na songon pangecet ni halak na jahat do.

³⁷ Tamba muse dope sada nari dosa di hasalaannia; mangalo do ia antong tu Debata, jana dipalayas Ia di jolonta.