JOB 32 - BIBEL JAMITA NA DENGGAN

Angka hata ni si Elihu

¹ Nada ganggu roha ni si Job di hatigorannia sandiri, jadi gabe nada ra be ale-alenia sitolu halak i mangalusi ia.

² Tapi disi dope sada halak nari na margoar si Elihu anak ni si Berakel, sada sian pomparan ni si Bus na sian horong ni si Ram. Nada tarorom ia be so muruk, hara ni na sai dipartahankon si Job hatigorannia sandiri boti dipasala ia Debata.

³ Muruk muse ma ia tu ale-ale ni si Job na tolu halak i hara ni na so lobas halahi mangalusi angka hata na nidok ni si Job i, haru pe dipasala ia halahi.

⁴ Si Elihu do na umposo sian halahi, jadi gabe sai dipainte-inte ia ma lopus sidung sudena mandok hata.

⁵ Jadi dung diida ia na so adong be maralus situtu halak i, gabe muruk ma ia,

⁶ jana didok ia ma songon on, “Na poso dope da iba, hape hamu madung matobang, hara ni i gabe mabiar iba jana ganggu roha patorangkon pandapotniba.

⁷ Didok rohangku, angkon hamu do nian mandok hata, na tumobang do angkon mambagi bisukna.

⁸ Tapi anggo na mangalehen bisuk tu jolma, hum Tondi Ni Debata Na Markuaso i do da.

⁹ Tamba pe malo ni jolma, nada hara ni tamba ni umurnia; diboto halak pe na tigor, nada i marguru tu tobangna.

¹⁰ Hara ni i, tangihon hamu ma jolo au; paloas hamu au paruar pandapotku.

¹¹ Sobar do au patangi-tangihon di na mandok hata hamu, jana inte do au di na manjalahi angka pandohan na bisuk hamu.

¹² Huparrohahon do sudena; hubege do dut ni rohamunu marhauntulan. Umpe adong tarbuktihon hamu na sala si Job di pandohanna.

¹³ Bia dehe umbaen na nidokmunu na dung dapotan bisuk hamunu? Angke tarpaksa talu do hamu. Hum Debata do tu si Job na malo maralus.

¹⁴ Tu hamu do nian si Job mangkatai, nada tu au, tapi anggo au nada songon hamu i, pangalusingku.

¹⁵ O Job, nada taralusi halahi be ho; jana nada adong na tardok halahi.

¹⁶ Tirjok sajo noma halahi, inda malo mangkuling. Painte-inteonku ma he i haru mangkohom be halahi?

¹⁷ Nada be, au ma jolo mangalusi, hupajojor ma jolo pandapotku saonnari.

¹⁸ Nada sobar be au painte-intesa. Nada tarorom au be so mandok hata.

¹⁹ Muda laing mangkohom iba, matapor noma da au, songon hadangan na bubung anggur na imbaru.

²⁰ Angkon mandok hata noma au, anso sonang roha; angkon niungkap pamangan lalu nilehen alusniba.

²¹ Nada adong na huampini di pangalaho on jana sada pe nada adong di au sipujion.

²² Manggambung pe nada huboto, jana sugari pe hubaen songon i, uhuman ni Debata ma au manigor.