JOB 30 - BIBEL JAMITA NA DENGGAN

¹ Hape saonnari siincahan ni halak na umposo noma iba. Na jolo i ummolat do huida bile ni simatobangna baen panjago biri-biri mardongan anjing parmahan.

² Na so marguna do halahi di iba hara ni na dung abis gogona.

³ Tangkuraparon ma halahi maradu marsingkor na tarlobi, lopus mangan urat na hiang di parhorsihan halongonan na mamolngit.

⁴ Diumpati halahi ma angka ramba di padang na bolak dipangan halahi ma bope bulungna dohot uratna.

⁵ Hona usir ma halahi sian dongan na dua tolu songon panangko na hona buru.

⁶ Maringan di angka liang noma halahi; angka rigat di bire ni dolok noma inganan ni na deba.

⁷ Mangarari ma halahi di parhorsihan songon binatang, marpungu-pungu di toru ni ramba na di tonga ni padang.

⁸ Nada be margoar halahi jana nada be nitorda, i ma angka halak na hona ayak sian luatna.

⁹ Saonnari ro ma halahi jana martataihon iba; mangetong na masa tu iba na so masuk tu roha.

¹⁰ Toruk jana hagigian do au diida halahi, salang bohingku pe ditijuri.

¹¹ Hara ni na gumale soada gogo iba dibaen Debata, palalu roha ma halahi muruk tu iba.

¹² Diroro halahi ma mangalo au sian jolo, hara ni biar hulojong ma maradu marlumba.

¹³ Ditahi halahi ma mandabuhon au mangalampang dalan laho mangago au. Umpe sahalak na mangambati pangarorona tu au halahi.

¹⁴ Songon dia ma aek magodang panondongna tu partahananki. Marsidondoni di ibana be ma halahi tu au.

¹⁵ Na jorbut noma manggohi rohangku, songon pangombus ni alogo, salpu ma argangku na mangolu i; songon ombun na mamolus, mago ma sian au moga ni roha i.

¹⁶ Saonnari mate ne noma da iba; so adong be na panayang pardangolanniba.

¹⁷ Mangingking ma di borngin i sude holi-holingki; sai manyusuhi ma so mar na mondap na hancit i.

¹⁸ Dijomak Debata ma au ditangkup rungkung ni bajungku, lopus singkok pamatangniba dibaen pakeanki.

¹⁹ Disampakkon Ia ma au tu bustak lala, gabe songon rompak do au so mararga!

²⁰ Pio-pio tu Ho do au ale Debata, hape nada adong alusMu tu iba; muda pe martangiang au, nada ra Ho marrohahonsa.

²¹ Na santak ma da pambaenMon tu iba on, dipisat Ho ma au mamake sude hagogoon.

²² Dipadiar Ho ma au dihabangkon alogo; di halingsungsung au dipartanggulingkon Ho.

²³ Huboto do, na niboanMu au tu hamatean, inganan pangaluhutan ni sude na marhangoluan.

²⁴ Biasi ma ro Ho mangalo halak na marmara, na so mangeldok patupa sanga aha asing ni na mangido ibo ni roha?

²⁵ Tangis do da au rap dohot halak na marhamarsahan, jana ibo do rohangku mida halak na hurangan.

²⁶ Sai diarop rohangku do tua dohot na torang, hape susa dohot hagolapan do marroan.

²⁷ Parkancitan dohot pardangolan mambaen iba mangkasibak; ari tamba ari mur bahat mambaen maniak.

²⁸ Malat-alat di hagolapan noma iba so adong na torang; jongjong iba di jolo ni halak na bahat mangido partolongan.

²⁹ Soraniba ibo roha umbegesa songon partangis ni unggas unto dohot sorigala.

³⁰ Mangalomlom pamatangniba; maradu milas pambaen ni arun masa.

³¹ Na jolo hubege do musik jop ni roha, hape saonnari hum andung tumatangis sajo noma.