JOB 3 - BIBEL JAMITA NA DENGGAN

Holos ni si Job tu Debata

¹ Dung i mamungka ma si Job manghatai jana diburai ia ma ari hatutubunia.

Si Job

^2-3 “Ale Debata, burai ma ari hatutubungku, dohot borngin di na mamungka adong di bortian ni dainang au!

⁴ Ale Debata, baen ma manggolap ari i, sesa ma sian parningotanMu lopus mago i. Ulang be da laing padiar sinondang na torang patiurkonsa.

⁵ Baen ma ari i mangalomlom, manggolap mambulita, mangarambon jana samon; ombun bope sonja tutupkon tusi, gupgupi muse sian sinondang ni mataniari.

⁶ Sugari diagohon borngin i gumonan sian bilangan ni taon dohot bulan; ulang jabat tubu di parningotan, ulang sanga dohot nibilangan.

⁷ Sai ulang ma adong na tubu di borngin i, jana ulang adong na tarbege sora na marmoga-moga.

⁸ O bayo datu dohot ho na malo pajinak naga padoha, dondoni ari i mardongan sumpa dohot bura.

⁹ Ulang jabat tarida bintang sidongdong marsinondang, ulang paloas bincar mataniari marsinondang; padiar ma borngin i tading ngolngolan, painte ro ni ari dohot dipaimbaru pangaropan.

¹⁰ Hona bura ma borngin na sumalin i da, di na nitubuhon ni dainang iba, jana dipadiar ma songon i marnyae susa.

¹¹ Biasi so mate di bortian ni dainang au? Sanga mate mardongan tubu-tubungku?

¹² Biasi diabing dainang au jana diampu, jana biasi dipataguk ia au?

¹³ Sugari marujung disi ngoluniba, modom ma au jana maradian di bagasan hasonangan,

¹⁴ songon angka raja dohot parkuaso, na mangulahi mambangun bagas godang na sian na jolo.

¹⁵ Tarpodom ma au songon anak ni raja, na manggohi bagasna dohot parate na marsimata.

¹⁶ Biasi nada sorang so marhosa iba, songon dakdanak na so sanga mangaligi na torang?

¹⁷ Di adu, di situmandok an, parjahat nada be mambaen hajahatan, jana parkarejo na abis gogo, tarbaen ma maradian jolo.

¹⁸ Songon anak buangan tarbaen ma mangkilala na sonang, malua jolo sian songgahan songon i sian aduan.

¹⁹ Mandosdos do disi sudena jolma; na bonggal dohot na sisoada, jana naposo pe ujungna malua.

²⁰ Biasi padiaron mangolu jolma na marhancit i? Biasi lehenon sinondang tu halak na susa?

²¹ Umpor do roha ni halahi di kuburan ulang di harto, nipainte-inte hamatean, hape laing so ra ro.

²² Dumpang ma mandai hamogaan muda dung mate mian di kuburan.

²³ Digupgupi Debata do ari pangapudian ni halahi, dihobuk Ia do halahi sian sude suhi.

²⁴ Holsoan au gonti ni na mangan, mardabu holso au so maradian.

²⁵ Didondoni sude na huarsakkon au, sandok na huhabiari mangalingkup au.

²⁶ So dumpang iba be hasonangan, manaon pardangolan au na so marhaujungan.”