JOB 29 - BIBEL JAMITA NA DENGGAN

Na parpudi dipatangkas si Job parkaronia

¹ Dipaudut si Job ma pajojorkon hatorangannia.

Si Job

² “Sugari bolas ma nian ngolungku mangulahi songon na salpu; hatiha diondihon Debata au.

³ Matua na sai diurupi Ia ma au, ditorangi Ia di na mardalan di na golap au.

⁴ I ma da angka ari-ari na denggan di ngolungku, dompak di parale-aleonku dohot Debata mangalinggomi bagasku.

⁵ Hatiha i laing didongani Na Markuaso i do au, dohot angka dakdanakku pe laing di humaliang au.

⁶ Bahat situtu susu sian pahan-pahananku. Bahat do miak sian angka bona ni zetunku, haru pe disuan di tano na marbatu.

⁷ Muda rap juguk angka na tobang-tobang ni kota i, jana hubuat ma juguhanku di tonga-tonga ni halahi,

⁸ manyipi ma angka dongan na umposo, disi diida halahi au do na ro. Dongan na tobang pe jongjong ma di na tongam; laho mangalehen sangap.

⁹ Salangkan halak na godang pe maradian do mandok hatana,

¹⁰ dohot halak na gabar pe nada mandok hata.

¹¹ Sanga ise pe tarhalomong do paida-ida au, sanga ise na marnida au, sai dipuji do pambaenanku.

¹² Angke huurupi do antong halak na pogos na mangido tolong; hutungkoli do na tinggal menek, so adong pangondianna.

¹³ Dipuji halak na marhasusaan situtu do au, huurupi do lopus sonang angka na mabalu.

¹⁴ Tigor do pambaenanku nada adong sigoraan; sai ganop ari do hupajongjong hatigoran.

¹⁵ Gabe mata do au di halak na so marnida; di halak na onyangon gabe au ma patna.

¹⁶ Gabe ama do au di halak na pogos; di halak paisolat, au ma gabe pangondian.

¹⁷ Tapi anggo kuaso ni halak na kejam, hutipuli, jana hupalua na hancitan dibaen halahi.

¹⁸ Anggo arop ni rohangku, siginjang umur ma au nian, jana marujung di bagasku mardongan roha na sonang di bagasan.

¹⁹ Songon suan-suanan na mangaloyok do anggo au, na nitombur ni aek boti dangkana dibornohi ombun.

²⁰ Sai na nipuji ni halak do anggo au, jana na so unjung murak do kuasongku.

²¹ Mangkohom do halak muda au mangalehen sipaingot; manangi do halahi tu hatangku maradu manat.

²² Muda abis au mandok hobar, i noma pamudun ni hata; manorusi ma pandohan i songon panetek ni aek udan.

²³ Marjop roha ma sudena manjaluangi angka hatangku, songon partani manyambut udan di musim bunga.

²⁴ Mikim do au tu halahi di na masa pandelean; tata ni bohiniba patamba godang ni pangarohaan.

²⁵ Au do na maniop pimpinan, dohot na patontu sandok haputusan. Hupimpin halahi songon raja di tonga ni paranganna, jana huapoi halahi di hamarsahanna.