JOB 21 - BIBEL JAMITA NA DENGGAN

Si Job

^1-2 Bege jolo na giot hudokkon hata; “I sajo ma i na hupangido laho mangapoi roha.

³ Paloas au jolo margonti mandok hata, dung i tola ma ho mangulahi marlayas roha!

⁴ Nada tu jolma au martongkar, jadi nada mahua muda iba hurang sobar.

⁵ Tatap ma tu au, gabe tarhalomong ma hamu, jongjong tirjok jana manguntam pamanganmunu.

⁶ Muda hupasari-sari na masa tu iba, humitir ma au hara ni jorbutna.

⁷ Biasi lehenon ni Debata umur na ginjang tu parjahat, jana arta sinadonganna pe mur mabahat?

⁸ Mangolu halahi, honokna lopus diidasa anak pahompu maradu impas di umurna.

⁹ Nada adong biar di pangisi ni bagasna; nada masa tu halahi mara sian Tuhanna.

¹⁰ Pahan-pahananna martamba mamopari, jana nada adong maolna maranaki.

¹¹ Margala roncang marmoga-moga angka anak ni parjahat, songon biri-biri jara-jara sonang mangalumpat-lumpat.

¹² Diihutkon sora ni rapano, suling dohot hasapi, marribur-ribur marendei lalu manortori.

¹³ Abis patabo-tabohon do ari-ari ni ngoluna, jana di bagasan dame marujung ma ngoluna.

¹⁴ Hape nian didok halahi do tu Debata, ‘Padao ma sian hami, kehe ma Ho da! Nada pardulinami jana nada ra hami mangastui, sanga aha na di rohaMi bope hagiotMu salaho tu ngolunami.’

¹⁵ Didok roha ni halahi, ‘So adong gunana mangoloi Debata, jana martangiang pe tuSia nada adong gunana.

¹⁶ Inda he hara ni gogonta sajo do, umbaen na dapot hita parsintaan dohot tujuan ni rohanta?’ Hapengani anggo au, sanga na bia pe nada satuju disi, di parpikir dohot pandapot na songon i.

¹⁷ Unjung ma he lampu ni halak na jahat niintopan, jana hona mara halahi dohot na matean? Unjung ma he muruk Debata tu halahi, gabe diuhumSa halahi?

¹⁸ Unjung ma he halahi songon durame dohot abuan na niombus ni halingsungsung dohot haba-haba?

¹⁹ Pandokmunu, ‘Hona uhum dakdanak hara ni dosa ni amana.’ Tapi anggo ningku: Halak na mardosa i do na niuhum ni Debata, anso mamoto halahi hara ni dosana, gabe ditongos Debata uhumanna.

²⁰ Padiar ma ditanggung pardosa, dosana sandiri, padiar ma dirasoi sandiri muruk ni Debata Na Gumincat i.

²¹ Muda marujung ma tingki ni jolma di portibi, parduli dope he ia sanga na marjop ni roha anaknia?

²² Tarajari jolma ma he Debata, hapengani Debata sandiri do na manguhumi na adong di banua ginjang?

^23-24 Adong do halak na torkis salolot di ngoluna; marujung ma ngolunia di bagasan sombu dohot puas ni roha. Sonang parmatena i mardongan jop ni roha, hape pamatangna i laing tuk dope gogona.

²⁵ Hape adong muse do na mate matua di haporsuhan, so unjung mandai hamogaan.

²⁶ Hape anggo di kuburan an, rap modom halahi margayangan; dirongomi binga boti ulohan.

²⁷ Huboto do nian na nipikirkonmunu dohot hajahatan na nitahi ni rohamunu.

²⁸ Disapai hamu, ‘Di dia do bagas ni parkuaso na mambaen pangalaho na durako?’

²⁹ Na so marsapa dope hamu tu angka paradang-adang? Na so porsaya dehe hamu tu na nidok ni halahi?

³⁰ Pandok ni halahi, ‘Di ari pandabu ni Debata di uhuman i, angka parjahat paluaon ma disi.’

³¹ Nada adong sanga ise na manjua pambaenanna; nada adong na mamaloskon hajahatanna.

³² Dioban ma ia tu kuburan, jana dipamasuk tu liang lahat; dijago ma tanomanna maradu manat.

³³ Marribu halak mardalan di jolo ni bangkena; tano pe dumayuk ma mandondonisa.

³⁴ Jadi, anggo apo-apomi rumar do i jana sandok alusmi pe gabus do i!”