JOB 20 - BIBEL JAMITA NA DENGGAN

Pandapot ni si Sopar

^1-2 “O Job, hancit do rohangku dibaen ho, saonnari giot alusanku ma tu ho.

³ Na mangalayasi do da hata na nidokmi, tapi huboto do mangalehen alus tusi.

⁴ Diboto ho dehe sian na robi ni na robi, mamungka sian na ojak jolma di portibi,

⁵ hamogaan ni parjahat parsantongkinan do da, jana hasonangan ni na so ture hum sangkinidop mata?

⁶ Haru pe na so tardok hagodanganna, jabat lalu tu langit dohot ombun ulunia,

⁷ hape na giot mago do ia salolot-lolotna, mago sian tano di bagasan pangalaho nabile. Angka halak na unjung manandasa, gabe marsapa, ‘Oh, na tu dia do kehena?’

⁸ Mago ma ia songon sura-suraan ni nipi mago boti songon parnidaan di borngin ni ari.

⁹ Nada be ia diida mata; ia pe nada be diingananna.

¹⁰ Na nitangkonia na salpu sian halak na so mardiha-diha, angkon gontion ni angka dakdanaknia.

¹¹ Haru pe poso ia jana tohong margogo, hape santongkin nari gabe hum abuan ni tano.

^12-13 Na tonggi ma da hajahatan di pamanganna! Sai songon na holong rohana manigor mamondutsa. Gabe ditabunihon ma di toru ni dilana, anso lumolot paincop-incoponna.

¹⁴ Hape gabe muba ma panganon i di butuhana, gabe halalango na paet na maroban tu hamateanna.

¹⁵ Arta na nitangko na nibondutna, tarpaksa ma diutahonsa; diparuar Debata ma sian bagasan butuhana.

¹⁶ Minum rasun sibaen mara ma anggo parjahat, mate ma ia baenonna songon na niturbing ni ulok na bisa.

¹⁷ Nada be daionna miak zetun na marlobian, sanga susu dohot aer ni loba na marbahat marusean.

¹⁸ Paulahonna ma sandok labona; suha ni halolojana pe nada be daionna.

¹⁹ Harana na mamisat do ia antong jana mambaen mompas halak na so mardiha-diha; dirampas ia do angka bagas na so nipajongjongna.

²⁰ Dibaen na so adong batas ni hagiotna, gabe nada marnapuas ia.

²¹ Muda mangan ia sude diabiskonsa, gabe nada manahan be hasonanganna.

²² Dompak di bungaran ni hamogaanna, ro ma arsak dohot susa mandondonisa.

²³ Dompak hataboanna ia mangan minum, disi ma gurgur muruk ni Debata tusia manguhum.

²⁴ Sugari marlojong ia pasiding podang bosi baja, mabugang do ia dibaen pana sian tumbaga.

²⁵ Mabugang ma ia hona anak ni pana; ujung ni pana na marlinang manombus pamatangna, gabe digohi biar ma rohana.

²⁶ Marabur ma sinadongan simpananna. Dipangan api na so niparo ni jolma ma ia sandiri maradu isi ni bagasna.

²⁷ Dibuka langit i ma hajahatanna; mangalo muse ma tano tusia.

²⁸ Gabe soada noma sude sinadonganna, hara ni pangayup ni muruk ni Debata.

²⁹ Songon i ma da bagian ni halak na so hasaya, i ma na nitontuhon ni Debata bagianna.”