JOB 15 - BIBEL JAMITA NA DENGGAN

PANGKATAION PADUAHON 15:1–21:34 Si Elifas

^1-3 “Burasmu do da i Job, na so marastuan do na nidokmi. Nada adong halak na bisuk pangalusina songon ho i. Nada ra i mangampini dirina dohot hata na so marimpola.

⁴ Sugari giotmi niihutkon, sahalak pe nada mabiar sanga martangiang tu Debata mangulakkon.

⁵ Hatami do patandahon paboa na marsala ho, hape dohot ginjang ni dilamu hajahatonmu ditutupi ho.

⁶ Nada porlu hutuhas ho sanga na hupasala, angke niaduhon ho hara ni angka hatamu sandiri do.

⁷ Ho ma lakna jolma na parjolo sorang diambang ho? Di na manompa angka dolok batu, na dung dohot ma he disi ho?

⁸ Dibege ho ma he Debata na mambaen sangkapNia? Hum ho sajo ma lakna na maniop bisuk ni jolma?

⁹ Sandok na nibotomu, laing hami boto do i; sasude na niastuanmu, laing torang do i di hami.

¹⁰ Sian halak na ubanon do hami jagit bisuk on; na dung adong do halahi taran so adong amanta ho!

¹¹ Biasi nada ringkot rohamu manjagit apo-apo ni Debata? Sai lambok jana sobar hami mandok hata mangasahon goarNia.

¹² Hape rohamu gilap, matamu pe marrara songon lasiak;

¹³ muruk ho tu Debata jana mangalosa.

¹⁴ Tarbaen ma he lakna jolma ias sian sala? Tarpatigor ma he jolma di adopan ni Debata?

¹⁵ Salangkan tu surusuruan pe so na porsaya Debata; nada ias halahi diida Ia.

¹⁶ Mur jolma na rorang dohot na jurngit ma hape, na mandorguk hajahatan songon aek.

¹⁷ Adong na giot sipatorangonku tu ho, tangihon ma au, dohot aha na dung huida, giot caritohononku.

¹⁸ Madung diajari na bisuk au, taringot tu hasintongan na dung diguruhon ni halahi sian ompu ni halahi.

¹⁹ Di na dung abis bangso na asing sian tonga-tonga ni halahi, nada adong be na maroban halahi dao sian Tuhan i.

²⁰ Halak na jahat na sai mamisat, salolot mangolu do i rohana marsiak.

²¹ Angka sora na jorbut manggohi pinggolna; dompak sonang ro ma pambuhar mangalosa.

²² Nada adong sibaenonna pasidingkon hagolapanna, angke sai ro do tongtong mangkojarsa podang na mamunu ia.

²³ Painte-inte mate do halahi bangar; na giot soroanna do bangkena, gabe mamoto ma ia na golap do hape ari pangapudianna.

²⁴ Songon raja godang do da parmaraan, na dung singkop giot manyolgap.

²⁵ Songon i ma da bagian ni halak na mangalo Debata, jana na manggaga tu Parkuaso Ni Sasudena.

^26-27 Di bagasan ginjang ni rohana mangaroro jana mangalo tu Debata; diangkat ia parincenia, nada ra talu ia.

²⁸ Sai hot ma ia maringanan di angka kota na sursar, di angka bagas na so adong manginganisa. Na dung ditontuhon hian do angka kota i anso laing hot sego-segona i.

²⁹ Mago so martinading hamoraanna hais tanga sinadonganna.

³⁰ Nada tarbaen malua ia sian golap bulita; panganon ni api sude angka tunasna. Mago noma ia, baenon ni pangombus ni hosa ni Debata.

³¹ Muda porsaya ia tu na so hasaya, gabe tarpaoto noma ia; jana upa na giot jagitonna, laing na soada do gunana.

³² Haru so dapot dope tingkina, hape mate noma ia; songon dangka na rahar na so ra be mulak rata.

³³ Sai songon bona ni anggur na marurus batu noma ia songon bona ni zetun na marurus dompak di bungana.

³⁴ Indangkon adong pomparan di halak na so marTuhan; mago mosok do bagas na nibaenna sian suha ni sogohan.

³⁵ I ma da halak na sai mangarohahon hajahatan na mandalankonsa. Tipu dohot gabus do na sai manggohi rohana.”