JESAYA 66 - BIBEL JAMITA NA DENGGAN

Haluaan dung panguhuman

¹ Songon on do pandok ni Tuhan, “Langit do habangsangKu, jana portibi sidegean ni patKu. Jadi bagas na tarbia ma he na giot bangunonMu di Au, jana inganan na tarbia ma he na giot baenonmu parmiananKu?

² Nada he tanganKu do mambaen sasudena umbahen masa na songon on? Songon i do pandok ni Tuhan. Tapi tu halak si songon on ma nolnol Au marnida, jolma na tartindas dohot na maheu, na mabiar tu hatangKu.

³ Hape anggo bangso i, roha-rohana do dipambaeni. Anggo di halahi, manghaulkon lombu sarupa do dohot na manghaulkon jolma. Manghaulkon anak ni biri-biri dos dohot na manipulkon rungkung ni anjing. Manghaulkon haul gandum sarupa do i dohot na manghaulkon mudar ni babi. Manutung hamonyan dos do i dohot na marsomba patung. Hara ni i: Sarupo songon halahi na mandalankon dalanna sandiri, jana rohana pe manghagioti gana-ganaan.

⁴ Jadi hara ni i, angka parmaraan na nihabiaran ni halahi, apala i ma ro mandondoni halahi sandiri. Angke dompak pio-pio Au, nada adong na mangalusi, jana dompak na manghatai Au, nada adong na manangihon. Tumabo do dihilala halahi mangalo Au dohot mambaen na jahat.”

⁵ Tangihon hamu ma sanga aha na nidok ni Tuhan, hamu ale angka na mabiar dohot na burju mangoloi Ia, “Dibaen setia do hamu tu Au, gabe sihagigian ma hamu di deba sian bangsomunu sandiri jana nada ra halahi margaul dohot hamu. Pacia-ciaon ni halahi ma hamu mandok, ‘Sai dipatidahon Tuhan nian hagodanganNia jana dipalua hamu anso tarbaen hami dohot marnida hamu marjop ni roha.’ Tapi halahi sandiri do nian na giot pailaon.

⁶ Tangihon ma! Adong sora na gumadobur di kota, adong sora sian BagasKu. I ma da sorangKi na topet manguhumi musu i!

⁷ Songon ina na ompot manubuhon dakdanak do anggo kotangKu na badia i, na so jabat mangae na hancit.

⁸ Jungada ma he tarbege na songon i? Nada unjung dope masa sada bangso ditubuhon di bagasan sadari. Hape anggo Sion, nada pola lolot mangae madung sorang angka anakna.

⁹ Ulang diambang hamu Huoban bangsongKi lopus tu hasosorangna hape nada Hupadiar halahi sorang.” Songon i ma didok Tuhan.

¹⁰ Ale hamu na manghaholongi Jerusalem, beta ma marjop ni roha, marmoga-moga ma hara ni i! Hamu na marsak hara ni ia, saonnari tola ma marjop ni roha.

¹¹ Daionmunu ma hataboan ni pasupasuna, songon dakdanak na manyusu tu inangna.

¹² Songon on do pandok ni Tuhan, “LehenonKu ma di hamu dame na manongtong. Mabaor ma tu hamu sinadongan ni angka bangso songon batang aek na so jungada hiang. Tudos ma hamu tu dakdanak na nipasusu ni inangna, diabing diampuanna jana di turke-turke mardongan holong ni roha.

¹³ ApoanKu ma hamu di Jerusalem, songon ina na mangapoi dakdanakna.

¹⁴ Muda diida hamu na songon i tarjadi, marjop ni roha ma hamu; jana gabe margogo boti matorkis hara ni i. Jadi gabe botoonmunu ma, Au Tuhan, mangurupi sanga ise na burju mangoloi Au jana palaluonKu ma rimas ni rohangKu tu angka musungKu.”

¹⁵ Giot ro ma Tuhan marhite api. Jana karetaNia songon halingsungsung, laho palaluhon rimasNa na marapi purun.

¹⁶ Sanga ise halak di portibi on na tardapot marsala, uhumanNia ma i marhite api dohot podang, jana bahat do na giot mate hona uhum.

¹⁷ Didok Tuhan, “Madung donok hatiha panguhumna di halak na paiaskon dirina dohot na mudur-udur tu kobun ni angka debata laho marsomba. Madung singkop uhumanKu di angka halak na giot mangan juhut babi, monci dohot sipanganon na asing i na mambaen magigi.

¹⁸ Huboto do pikiran dohot parbuatan ni halahi. Ro Au laho paluhutkon angka jolma sian sandok bangso. Muda marlagut halahi, idaon ni halahi ma kuasongKu

¹⁹ jana botoon ni halahi ma Au do na manguhumi halahi. Tapi adong do saotik sian halahi na giot paluaonKu. SuruonKu ma halahi mandapotkon angka bangso di luat angka na dao na so jungada dope umbege salaho tu Au sanga marnida hagodangan dohot kuasongKu: Tu Spanyol, Libia, tu Lidia mardongan angka parsior na malo, tu Tubal dohot Junani. Baritahonon ni halahi ma hagodanganKu di tonga-tonga ni angka bangso i.

²⁰ Sian angka luat i obanon ni halahi ma mulak angka kahanggimu sabangso songon silua di Au. Obanon ni halahi ma angka jolma i tu dolokKu na Badia di Jerusalem mangalombut kudo, halode dohot unto, dohot na markareta maradu dohot na marpadati; songon na somal halak Israel maroban tu Bagas Ni Tuhan haul gandum di bagasan inganananna na ias.

²¹ Deba sian halahi baenonKu ma gabe malim dohot halak Levi.

²² Songon langit dohot tano na imbaru na Hutompa i martahan hara ni kuasongKu, songon i ma laing martahan pomparanmu dohot goarmu.

²³ Ganop Bulan Na Imbaru, ganop Ari Sabat, marroan ma angka jolma sian ganop bangso mardongan sangap, laho manyomba Au di Jerusalem on.

²⁴ Laho kehe, idaon ni halahi ma angka bangke marserak; i ma angka halak na mangalo tu Au. Binga na mamangani bangke ni halahi i, inda na ra mate, jana api na manutung halahi i nada ra mintop; pamandangan na jorbut ma i di sude jolma.”