JESAYA 65 - BIBEL JAMITA NA DENGGAN

Uhuman ni Debata tu angka halak na mangalo

¹ Rade do Au mangajari halak na so manyapai Au. Rade do Au dumpangan ni halak na so manjalahi Au. NingKu do: “Dison do Au, dison do Au” tu bangso na so mamio goarKu.

² Tongtong do Au hobas laho manjaluangi bangsongKi haru pe mardongan jogal ni rohana mambaen na jahat halahi jana manondong dalan lomo ni rohana sandiri.

³ Sai torus do halahi mambaen muruk Au. Hara ni na mamelehon haul di kobun tu angka debata jana manutungi hamonyan di angka langgatan na disi.

⁴ Borngin-borngin kehe halahi tu angka liang dohot kuburan laho mangido sipaingot ni angka sumangot. Mangan juhut babi halahi jana diinumi halahi kua ni juhut sian sipanganon na dipelehon tu angka debata.

⁵ Dung i didok halahi ma tu halak na asing, ‘Kehe ho, padao; sun do badianami ulang ho dais tu hami!’ Au Tuhan, nada tahan Au paida-ida jolma sisongon i. Songon api na so ra mintop do muruk ni rohangKu maradopkon halahi.

⁶ Madung Huputuskon di rohangKu giot mamalos hajahatan ni halahi jana madung tarsurat uhuman ni halahi. Nada ra Au manghalupahon sandok na nibaen ni halahi. Uhumon noma halahi

⁷ hara ni angka dosa ni halahi dohot dosa ni ompu ni halahi. Ninna Tuhan, “Dipabile halahi do Au marhite na manutung hamonyan di inganan parsombaan tu angka debata di dolok, jana dilayasi Au. UhumanKu do halahi marguru tu pangalaho ni halahi na salpu i.”

⁸ Songon on do pandok ni Tuhan, “Nada ambungkonon batu ni anggur na maraek dope, tapi dibaen do gabe i aek ni anggur. Songon i muse do bangsongKu, nada pasidungonKu. PaluaonKu do sanga ise na mangoloi Au.”

⁹ PasupasuonKu do halak Israel na sian Marga Juda. Pomparan ni halahi ma gabe nampuna tano pardolohanKu. Bangso na Hupili na mangoloi Au maringanan ma disi

¹⁰ jana marsomba tu Au. Biri-biri dohot lombu ni halahi manjampali ma di Napa Saron dohot di Rura Akhor.

¹¹ Tapi nada songon i anggo bagian ni angka halak na manadingkon Au, na so parduli di Sion, dolokKu na badia i, boti na marsomba tu Gad dohot Meni, i ma angka debata pardoharan dohot nasib.

¹² Mate hona bunu do hamu, angke di na Hupio, nada mangalusi hamu, jana dompak manghatai Au nada ditangihon hamu. Tumabo do dihilala hamu mangalo tu Au dohot mambaen na jahat.

¹³ Jadi songon on do pandok ni Tuhan Debata, “Satutuna do, sanga ise na marsomba tu Au jana na burju mangoloi Au tuk do panganon dohot inumonna, hape anggo hamu malean do jana manguas. Moga ma halahi, hape anggo hamu maila.”

¹⁴ Marende ma halahi marjop ni roha, hape anggo hamu ngotngot tangis.

¹⁵ Pakeon ni bangso na Hupili i ma goarmu songon bura. Au, Tuhan Debata, bunuonKu noma hamu. Tapi anggo halahi na burju mangoloi Au, lehenonKu ma goar na imbaru.

¹⁶ Sanga ise di luat i na mangido pasupasu pangidoonna ma anso Au Debata na setia mamasumasu ia. Sanga ise na marsumpa, marsumpa ma mangasahon goarKu, Debata na setia. Marujung noma sitaonon di hatiha na salpu jana halupahonon.

Na nitompa na imbaru

¹⁷ Didok Tuhan: “TompaonKu ma langit na imbaru dohot tano na imbaru, angka na masa na salpu dihalupahon noma i, jana nada ingoton be.

¹⁸ Marjop ni roha jana marmoga-moga ma hamu salolotna, hara ni sude na Hutompa i. TompaonKu ma Jerusalem na imbaru gok jop ni roha, jana na maringanan disi marjop ni roha.

¹⁹ Au sandiri pe marsurak-surak hara ni Jerusalem, jana marjop ni roha hara ni bangsongKu; di kota i nada adong be habegean sora ni na tangis dohot na mangangguk.

²⁰ Nada adong be dakdanak na mate dompak menek, jana halak na magodang sayur matua bulung, halak na mate marumur saratus taon laing etongon dope na poso, jana na mate painte so marumur saratus taon etongon do i na hona uhum.

²¹ Pajongjong bagas ma halahi jana manginganisa; suanon ni halahi ma angka kobun anggur jana panganon ni halahi ma parbatuna.

²² Nada pajongjongon ni halahi bagi aha, anso halak na asing manginganisa, jana nada suanon ni halahi bagi aha, anso halak na asing mangankon parbatuna. Angke umur ni bangsongKu angkon saginjang ni umur ni hayu, jana angka halak na Hupili angkon mandai suha ni parkarejoan ni tanganna.

²³ Manjadi do sude na nikarejohon ni halahi, jana angka dakdanak ni halahi pe nada hona mara. PasupasuonKu ma halahi dohot pomparan ni halahi ro di salolot-lolotna.

²⁴ Jadi andorang so pio-pio halahi, madung Hualusi; hatiha manghobari halahi, madung Hubege.

²⁵ Rap manjampal ma sorigala dohot anak ni biri-biri, singa pe mangan durame songon lombu, jana ulok pe mangolu sian abu. Di sude dolokKu Na Badia i nada adong be na mangarugi i, sanga mambaen na jahat,” ninna Tuhan.