JESAYA 64 - BIBEL JAMITA NA DENGGAN

¹ Sibakkon ma langit, jana mijur ma Ho ale Tuhan, baen ma angka dolok humutur hara ni biarna,

² songon api na mambaen soban marjimbur jana na mambaen muse aek gabe gurgur. Pataridahon ma kuasoMu tu musuMu, anso manyikur angka bangso di joloMu.

³ Di sada hatiha, baenonMu do karejo na luar biasa na so diambang roha. Mijur Ho, ale Tuhan, jana di adopanMu, manyikur angka dolok hara ni na heput.

⁴ Nada habegean dope sian narobi di narobi, jana na so unjung dope tarida i. Asing sian Ho, nada adong debata na mambaen songon i, tu halak na mararop ni roha tusia.

⁵ Lomo do rohaMu mida halak na jujur jana na mangolu mangihutkon hagiotMu. Muruk Ho tu hami, hape laing hami pupu mardosai tutu pardosa do hami tu Ho sian na robi.

⁶ Halak na hodar do hami sude, salang hadengganannami pe hodar boti dursun muse, songon bulung-bulung na malos diombuskon alogo, hara ni hajahatannami sandiri, hami pe mago.

⁷ Nada adong na martangiang tu Ho, sanga pe pangurupionMu dipangido. Dibaen dibunihon Ho bohiMu sian hami, dipadiar Ho hami diago dosanami sandiri.

⁸ Tapi haru songon i pe, Ho do ale Tuhan, Amangnami, tano liat do hami, jana Ho noma manggana hami. Karejo ni tanganMu do hami sude.

⁹ Jadi ulang ma marpiar-piar murukMu, ulang sai paingot-ingot be dosanami. Laing timbangi ma jolo di rohaMu, ale Tuhan, hami on laing bangsoMu.

¹⁰ Madung gabe songon halongonan, angka kotaMu na badia i, Sion madung gabe halongonan, Jerusalem madung mamolngit.

¹¹ Bagas Ni Debata, Na Badia jana na jogi, inganan paribadatan ni angka ompunami, madung abis dipangan api. Sude hasudungan ni roha madung gabe soada.

¹² Marnida sudena i, ale Tuhan, biasi diorom Ho diriMu. PasombuonMu dope hami lakna marsitaonon na dokdok?