JESAYA 63 - BIBEL JAMITA NA DENGGAN

Hamonangan ni Tuhan maradopkon angka bangso Panjago

¹ “Ise dehe na ro sian Edom adu? Na ro sian Bosra marbaju na rara, tongam do pakeannia, na mangalangka songon na marsahala? Au do na manjanjihon hasintongan dohot na markuaso paluahon!” “Au ma da on, Tuhan na margogo paluahon, ro Au maroban barita hamonangan.”

Tuhan Panjago

² “Biasi rara pakeanmu, songon baju ni pardege anggur?”

Tuhan

³ “Huporo angka bangso songon anggur, nada adong na ro mangurupi. Sasada Au do mangkarejohonsa; di bagasan murukKu Hudege-dege halahi. Mamincar mudarna i, mangaehi bajungKi, pahodarkon sude pakeanKi.

⁴ Madung Hutontuhon ari pamaloson; on ma hatihana halahi paluaon.

⁵ Hujalahi do, hape nada adong na mangurupi Au, longang rohangKu nada adong na mambantu. HamumurukKu parohon gogo di Au, sasada Au, dapot Au do hamonangan.

⁶ Di rimas ni rohangku na jorbut i Hulonca-lonca angka jolma i. Hugopu halahi lopus malantuk, mamincar mudarna i sap tu tano.”

Hadengganan ni Debata tu Israel

⁷ Giot paboaonKu do, holong ni roha ni Tuhan na so marhaujungan. Hupuji Ia hara ni sude pambaenanNia, pasupasuNia marlobian di hita bangsoNia. Angke gok ibo ni roha do Ia jana holong ni rohaNia nada marhasidungan.

⁸ PandokNia, “Satutuna do bangsongKu halahi, nada Au gabusan ni halahi.” Gabe dipalua Ia do halahi,

⁹ sian sude hasusaan ni halahi. Nada tongoson ni Tuhan suruan sanga duta, Ia sandiri do paluahon halahi. Sian narobi do dipature-ture Ia halahi hara ni holong dohot ibo ni rohaNia.

¹⁰ Hape manggugai do halahi mambaen roha ni Tuhan gabe marsak. Jadi gabe musuNia ma halahi jana marporang mangalo halahi.

¹¹ Jadi gabe tarsunggul ma tu roha ni halahi hatiha narobian; hatiha ni si Musa, naposo ni Tuhan i. Marsapa ma halahi, “Di dia do Ia, na manogu-nogu angka pamimpinta mamolus laut? Di dia do Tuhan na mangalehen kuasoNia tu si Musa?

¹² Di dia do na mandongani si Musa marhite tanganNa na gogo marmulia, jana na mambola aek di jolo ni bangsoNia anso tarbarita goarNia?

¹³ Di dia do Tuhan na manogu halahi mardalan mamolus laut i songon kudo mamolus padang gurun damos patna i nada unjung tartuktuk?”

¹⁴ Dioban Tuhan halahi tu inganan paradianan songon pahanan na niiring laho tu padang manjampali. Ia sandiri do manogu halahi, anso dipagodang halak goarNia.

Tangiang mangido ibo ni roha dohot pangurupion

¹⁵ Ale Tuhan, tatap ma hami sian banua ginjang, sian ingananMu na badia jana marmulia. Di dia do pangiburuMu dohot hagogoonMu? Di dia do holong dohot ibo ni rohaMu? Di dia do diparrohahon Ho hami? Ulang ma nian manghohom Ho tu hami.

¹⁶ Nada he Ho do Amangnami? Nada ditanda si Abraham dohot si Jakob hami. Tapi anggo di hami sandiri, Ho do Amangnami, na palua hami sian narobi.

¹⁷ Biasi dipadiar Ho lilu hami? Biasi dipajogal Ho rohanami gabe nada ra mangoloi? Mulak ma Ho ale Tuhan, hara ni angka naposoMu, hara ni bangsoMu sian narobi nampunaMu.

¹⁸ Biasi dipadiar Ho musu mandege-dege BagasMu, angka alonami mandege-dege inganan na niparbadiaanMu?

¹⁹ Songon dia ma na so bangsoMu be hami songon na so mamarenta be Ho tu hami.