JESAYA 60 - BIBEL JAMITA NA DENGGAN

Marsahala ma Sion

¹ Jongjong ma ho, marsinondang ma ho, madung ro sinondang ni haluaanmu! Disondangi Debata ho marhite hamulianNa.

² Angke satutuna, hagolapan do manggupgupi tano on, jana hagolapan manggupgupi angka bangso; tapi songgopan ni sinondang ni Tuhan ma ho, jana hasangapanNia gabe tangkas di ho.

³ Marroan ma angka bangso tu hatiuranmu, tartarik ma angka raja hara ni habibincarmu na imbaru.

⁴ Ligi ma humaliang ho sanga aha na tarjadi, marlagut rayat laho mulak mangulahi. Sian na dao marroan angka anakmu, niompaan dohot angka borumu.

⁵ Marnida i gabe longang jana minar bohimu, gok andoramu hara ni jop ni rohamu. Sinadongan ni angka bangso dioban tu jolomu, mabaor taripar laut manggohi haporluanmu.

⁶ Marroan bahat unto tu tanomu, sian Midian dohot Efa angka i marroan. Sian Seba dioban halak sere dohot hamonyan, lalu mamuji pambaenan ni Tuhan.

⁷ Hambeng biri-biri ni Nebayot dohot Kedar dioban tu ho baen tutungon di langgatan gabe ibadatMu. Jadi gabe jop ma roha ni Tuhan. BagasNia mur tu jagarna.

⁸ Ise dehe i na ro habang songon ombun songon darapati na mulak habang?

⁹ I ma da angka kapal na marlabu sian Tartis maroban bangso ni Debata mulak sian luat na dao. Sere dohot perak laing diobansa, laho mamuji Tuhan Debata; di Debata ni Israel na umbadia, na mambaen bangsoNia dapotan sangap.

¹⁰ “Bangunon ni halak sileban ma tembokmu mangulahi, jana angka raja noma mangoloi ho disi. Najolo Huuhumi ho hara ni murukKu, tapi saonnari tumbuk do ho siiboan ni rohangKu.

¹¹ Arian na borngin marbuka horbanganmu, anso dioban sinadongan ni angka bangso tu ho jana marudur ma raja ni halahi gabe tabanan.

¹² Bangso na so ra marpangoloion tu ho gabe sisoada do.

¹³ Hasangapon ni Libanon, i ma: Hayu ampolu, barangan dohot sampinur, hayu hasurungan ni tombak Libanon na jeges i, dioban ma i tu ho, kota na badia laho mangulahi mambangunsa, jana mambaen BagasKu jumagar boti mambaen inganan ni patKu marmulia.

¹⁴ Ro ma angka dakdanak ni na mamparkanciti ho marsomba tu jolomu na dung jungada mangalayasi ho mamparsangapi jana tunduk, ‘Sion, Kota Ni Debata Na Badia ni Israel’, ‘Kota Ni Tuhan’, songon i ma ho nigoaran.

¹⁵ Nada be ho tadingkonon jana hagigian, nada padiaron mangalungun. Jeges jana tarbarita ho Hubaen sapanjangna, inganan hamogaan sapanjangna.

¹⁶ Pature-tureon ni angka raja dohot bangso i ma ho, songon ina na marmudu-mudu anakna. Jadi botoonmu ma, Au do tutu Tuhan, na palua hamu, jana Debata ni Israel na gogo i, paluahon hamu.

¹⁷ ObanonKu sere gonti ni tumbaga, jana perak gonti ni bosi. Hulehen tumbaga gonti ni hayu, jana bosi gonti ni batu. Demak jana aman ma tanonia, jana diparenta marhite hatigoran.

¹⁸ Nada adong be barita salaho tu na mangasa gogo, nada be masarsar luatmunu. Songon tembok Au mangondihon hamu, jana pujionmu ma Au songon sipaluamu.

¹⁹ Nada porlu sinondang ni mataniari di ho muda arian, borngin pe nada pola marsinondang bulan. Angke Au Tuhan, Au sandiri gabe panorangimu salolotna, sondanganKu hamu marhite sondangKu na marmulia.

²⁰ Adong ma di ho mataniari na so ra lusut, marujung ma hatiha hamarsahanmu, angke Au noma gabe panorangimu na hot manyalpui bulan dohot mataniari.

²¹ Tigor noma angka na mangingani ho di tindakanna, jana halahi nampuna luat i salolot-lolotna. Songon hayu cangkokan na Husuan sandiri do halahi, anso torang tarida hagodanganKu.

²² Salang ripe na menek jana na bile, gabe godang ma jana markuaso. Au ma da Tuhan; manigor baenonKu ma tindakan, muda dung dapot hatiha na tumbuk.”