JESAYA 55 - BIBEL JAMITA NA DENGGAN

Ditawarkon Tuhan ibo ni rohaNia

¹ “Ro ma hamu angka na manguas, minum ma hamu, adong do aek na rade. Hamu na so marhepeng, marroan ma hamu! Jagit hamu ma gandum jana mangan ma hamu! Singkop do anggur dohot susu, jagit hamu ma nada pola manggarar.

² Baen aha manobusi barang na so bisa panganon, dohot markarejo baen tu sipanganon na so pabutongkon? Ihutkon ma parentangKu, gabe dapot ho ma na denggan, jana daionmu ma sipanganon na tabo.

³ Tangihon ma ale bangsongKu, ro ma hamu tu Au, tangihon ma, anso mangolu hamu. Hara ni holong ni rohangKu na togu tu si Daud, naposongKi, Hupudun janji na hot dohot hamu.

⁴ Hubaen ia gabe pamimpin dohot panglima, saksi ni kuasongKu maradopkon angka bangso.

⁵ Satutuna, pioonmu ma angka bangso na so nitandamu, jana bangso na so tumanda ho marlojong mandapotkon ho, hara ni Tuhan, Debatamu, jana hara ni na Sun Badia Debata ni Israel, na pasangapkon ho.”

⁶ Jalahi ma Tuhan dompak tarbaen dope dapot, pio hamu ma Ia salolot laing donok dope Ia.

⁷ Sai dipauba parjahat ma ngoluna, jana dipadenggan ma rohana. Sai mulak ma ia tu Tuhan Debata, angke paribo roha do Ia jana manigor do ampunanNa ia.

⁸ Didok Tuhan, “Anggo pikiranKu, nada songon pikiranmunu, jana dalanKu, nada songon dalanmunu.

⁹ Songon langit na gincat, dao mangembang di ginjang ni tano on, laing songon i ma pikiranKu guminjang sian pikiranmunu, jana dalanKu dao do marasing sian dalanmunu.

¹⁰ Songon udan dohot salju na sian langit i nada jungada mulak, tapi na mijur mambornohi tano, mambaen same martunas dohot martumbur, mangalehen suha sisaburkonon dohot sipanganon,

¹¹ laing songon i do hatangKu na haruar sian pamanganKu, nada mulak boti i tu Au; tapi patuluson ni i do hagiotKu, jana marlabo do i di bagasan aha na dung Husuruhon tusia.

¹² Satutuna, na giot kehe noma hamu di bagasan jop ni roha, dipataru tu balian di bagasan sonang. Dolok dohot tor marendei marmoga-moga di jolomu, jana angka hayu pe martopapi.

¹³ Gonti ni sihupi tubu ma bona ni sampinur, gonti ni latong tubu ma hayu na huskus. Songon tanda na hot na paingotkon tu rohamunu, taringot tu na dung Hubaen, Au Tuhan mambaensa di hamu.”