JESAYA 53 - BIBEL JAMITA NA DENGGAN

¹ “Ise ma porsaya tu barita na hami bege? Tu ise ma na dung dipataridahon kuaso ni Tuhan na gok sahala?

² Songon tumbur do ia tubu di adopan ni Tuhan, jana songon tunas sian tano na mahiang. Nada adong hajegesonna jana nada adong hasangapanna, na mambaen hita mangaligi tusia: Nada adong tompana, na mambaen hita marpor ni roha.

³ Dipasiding halak ia jana dipalayas, halak na somal marhancit do ia jana na mardangol, na layas sajo do ia, lopus ditutup halak bohina maradopkon ia, jana di hita pe nada masuk etongan ia.

⁴ Hape satutuna, nyaenta do na nitaonnia, jana pardangolanta diporsan ia. Hape didok rohanta bura ni Debata do tusia na niaena.

⁵ Hara ni angka dosanta, do ia mabugangi, jana hara ni hajahatanta ia dibalbali. Hona uhum ia anso malua hita, hara ni angka gasania gabe malum hita.

⁶ Lilu do hita sudena songon biri-biri, marsitondong dalanna be. tapi madung dihonahon Tuhan tusia sude hajahatanta.

⁷ Kejam do dibaen tusia, tapi sip sajo do ia manaonsa, songon anak ni biri-biri na nioban tu panyambolan, jana songon induk ni biri-biri na maoto hohom maradopkon halak na manggusting imbuluna.

⁸ Ditahan do ia jana didabu uhuman, lalu hona oban tu panyambolan. Nada adong na parduli di bagiannia. Tutu do, mago ma ia sian tano ni halak na mangolu; gabe ia hona pukul hara ni dosa ni bangsongKu.

⁹ Dikubur do ia rap dohot halak na jahat, jana ditanom di tonga-tonga ni halak na maradong, harupe na so jungada ia mangasahon gogo, jana nada adong sipaoto-oto di angka hatania.”

¹⁰ Tapi hagiot ni Tuhan do manaon na hancit ia, jana mate songon haul panyesa ni dosa. Idaonnia do pomparannia jana ginjang umurnia tulus ma hagiot ni Tuhan markite-hite ia.

¹¹ Dung abis hasusaannia idaonnia ma na torang jana puas ma pangkilalaanna. Tigor do parrohaon ni naposongKi, jana bahat do halak gabe tigor hara ni ia, ampe tusia do uhuman na tu halahi.

¹² Hara ni i lehenonKu ma tusia angka na sangap songon rampasan dohot angka na togos songon tabanan, i ma gonti ni na dung dilehen ia hosana tu hamatean dohot hara ni na dietong ia parjahat, haru pe ia do mananggung dosa ni halak na bahat, jana martangiang tu parjahat i.