JESAYA 51 - BIBEL JAMITA NA DENGGAN

Hata apo-apo maradopkon Sion

¹ “Tangihon ma Au, ale hamu na manjalahi hasintongan, ale hamu na manjalahi Tuhan, tatap ma dolok batu na marhite sian ia hamu targorga, jana tu lubang pangkuaran ni batu, na sian i hamu tarhuar.

² Ingot ma ompumu si Abraham dohot si Sara; nada mardakdanak dope si Abraham di na Hupio ia. Jadi Hupasupasu ia jana Hubasa-basahon anak, Hulehen disia pomparan na bahat.

³ Angke apoan ni Tuhan ma Sion, mangapoi sude hasesegona. Dibaen Ia do halongonan i songon kobun Eden jana padang-padangna songon kobun ni Tuhan. Disi ma adong jop ni roha, ende hatarimakasion dohot logu na gogo.

⁴ Parrohahon ma sorangKu, ale angka bangso, patinggil ma pinggolmu tu Au, ale angka marga ni bangso na marragam! Angke ruar ma pangajaran sian Au, jana tonangKu gabe sinondang tu sude bangso.

⁵ Di bagasan sangkidop mata mandonok ma haluaan na sian Au, ro ne ma haluaan na Hulehen, jana markite kuaso ni tanganKu, parentaonKu ma sude angka bangso; tu Au noma pulo-pulo paintehon. Pambaenan ni tanganKu do diarop roha ni halahi.

⁶ Tatap ma tu langit, tailihon ma tu tano, mago ma langit i songon timus. Buruk do tano on songon abit, mate sude na mangingani i songon rongit. Tapi anggo haluaan na Hulehen i, hot do salolotna, hamonanganKu nada adong ujungna.

⁷ Tangihon ma Au, ale hamu angka na umboto hasintongan, ale bangso na manyimpan pangajaranKu di bagasan rohamu! Ulang mabiar hamu muda dipabile jolma, jana ulang tarsonggot muda diincahi halahi.

⁸ Mago do halahi jana gabe sisoada, songon pakean na dipangan ngitngit. Tapi anggo haluaan na Hulehen, hot do i salolotna, hamonanganKu hot do i sian pomparan tu pomparan.”

Mangido pangurupion bangso Israel tu Tuhan

⁹ Jonggor ma, jonggor ma! Pakehon ma hagogoan ale tangan ni Tuhan! jonggor ma songon di hatiha na robi di hatiha pomparan na jolo! Nada he Ho do na mangaropukkon si Rahab na maniham naga i lopus mate?

¹⁰ Ho muse do na pahiangkon laut bidang; na mambaen dalan sian aek i, gabe tarbaen bangso na nipaluaMi manariparisa.

¹¹ Angka na nipaluaMu ale Tuhan, mulak tu Sion marsonang-sonang. Marendei halahi jana marmoga-moga, malua sian parhancitan dohot arsak ni roha; salolot-lolotna ma halahi martua. Lungun dohot arsak ni roha madung mandao.

¹² “Au, Au ma da na mangapoi hamu. Biasi pola mabiar ho, mida jolma parsantongkinan dohot tu Anak Ni Jolma na diambungkon songon duhut.

¹³ Hara ni i dihalupahon ho ma Tuhan na manompa ho, na pahembangkon langit jana mamayakkon ojahan ni tano on, hara ni i mabiar jana gamang ho sasadari, maradopkon pangamuk ni na mamparkanciti, di na singkop ia giot pangabiskon ho. Di dia ma he lakna pangamuk ni na mamparkanciti i?

¹⁴ Ia na tartaban angkon manigor dipalua; nada mijur be ia tu hamatean jana nada hurangan di sipanganon.

¹⁵ Harana Au do Tuhan Debatamu, Au do namangatur laut jana mambaen marsasak galumbangna. Tuhan Na Markuaso do goarNa.

¹⁶ Hubaen do hatangKu tu pamanganmu, jana Hubunihon do ho di ondingan ni tanganKu, anso Hupahembang muse langit jana Hupayakkon ojahan ni tano on, dohononKu ma tu Sion: Ho do bangsongKu!”

Marujung sitaonon ni Sion

¹⁷ Jonggor ma, jonggor ma, ngot ma, ale Jerusalem, ale ho na dung minum sian tangan ni Tuhan. Isi ni piala i ma milas ni murukNia, ho do na dung manginum, mandorguk abis isi ni mangkuk na palenongkon i.

¹⁸ Sian sude dakdanak na nitubuhonna, nada adong manogu ia, jana sian sude dakdanak na dipagodang-godangna umpe adong na maniop tangannia.

¹⁹ Dua ragam parmaraan na manondong ho; ise ma na dohot marsiluluton maradopkon ho? Hasusude dohot hasesego, tangkuraparon dohot podang ise ma na giot mangapoi ho?

²⁰ Di suhi-suhi ni ganop dalan, martinggangan angka anakmu abis be gogona. Songon ursa na hona jorat di bagasan tirangkap, taraso di halahi muruk ni Tuhan na santak.

²¹ Hara ni i, tangihon ma on, ale ho na diparhanciti, ale ho na mabuk tapi nada hara ni anggur!

²² Songon i ma pandok ni Tuhanmu, Debata na mangondihon hamu, “Mangulahi Hubuat sian hamu, mangkuk dohot isi na palenongkon, jana isi ni mangkuk hamilason ni murukKu, indangkon inumon munu be i.

²³ Hulehen noma i tu na mamparkanciti ho, halak na mandokkon tu ho: Unduk ma, anso hami dege hamu! Gabe dipahortang ho ma lopus dosdos dohot tano, jadi mamolus ma jolma sian ginjangna.”