JESAYA 50 - BIBEL JAMITA NA DENGGAN

¹ Songon on do hata ni Tuhan: “Di dia ulaning surat sirang ni inangmu tanda na Huusir ia? Sanga tu ise dehe sian parsingiranKu, jungada Hugadis ho? Satutuna, hara ni hasalaanmu sandiri do umbaen na targadis ho, jana hara ni pangalaosimu sandiri do umbaen na diusir inangmu.

² Biasi nada adong na ro umpe sahalak sian bangsongKi, di na ro Au marpio halahi? Adong he na so sanggup Au dietong roha ni halahi paluahonsa umbaen na sip sajo halahi? Nada he sumurut aek ni laut hara ni parentangKu, Hupauba batang aek gabe padang manyahatang, gabe mate ihan sudena?

³ Hubaen langit i manggolap situtu, songon dia na matean marsiluluton.”

Pangoloion ni naposo ni Tuhan

⁴ Diajari Tuhan Debata do au mandok hata, anso hupargogoi halak na gale. Ganop manyogot disungguli Ia rohangku laho manangihon pangajaranNia tu au.

⁵ Madung dibuka Tuhan Debata pinggolku, jana nada mangalo au, nada marbalik tu pudi.

⁶ Hulehen do tanggurungku tu halak na mambalbali au, jana bohingku tu halak na mangumpat janggutku. Nada hutabunihon bohingku hatiha dipalayas sanga ditijuri au.

⁷ Hape nada mampan incak ni halahi, dibaen dilehen Tuhan Debata pangurupi. Hupatogu rohangku songon togu ni dolok batu, angke huboto nada au dibaen maila.

⁸ Dibaen madung dumonok Debata, dipapatar Ia na so adong au marsala. Ise na puluk maralo dohot au? Betama tapataridahon dirinta! Ise alongku marparkaro, mandonok ma ia tu au.

⁹ Tuhan Debata do na mangampini au, ise tarbaen mambuktihon salangku? Muli mago do sude angka na mangaduhon au, songon abit na nipangan ni ngitngit.

¹⁰ Ale hamu na pasangap Tuhan Debata, jana na mangoloi hata ni naposoNia, betak na golap do dalan na nibolusmunu, tapi laing porsaya ma tu Tuhan, Ia ma pangasahon hamu!

¹¹ Satutuna, sude hamu na pagara api jana mamasang pana-pana api, masuk ma hamu tu bagasan ngorngor ni apimu, dohot tu tonga-tonga ni pana api na nipasangmunu i! Hara ni tanganKu do tarjadi sudena i: Marpayakan ma hamu di inganan paruhuman i.