JESAYA 49 - BIBEL JAMITA NA DENGGAN

Israel sinondang ni angka bangso

¹ Tangihon ma au, ale angka pulo, parrohahon ma, ale angka bangso na dao! Hatiha sian bortian dope madung dipio Tuhan madung didok goarku hatiha dibortian ni dainang.

² Pamanganku dibaen Ia songon tajom ni podang, tanganNia mangalehen di au parlindungan. Dibaen do au songon anak ni pana, nisimpan di tabung jana marlinang tajomna.

³ Didok Ia tu au, “Ho ma da naposongKu, Israel, hara ni ho, patuduhononKu ma hagodanganKu.”

⁴ Ningku ma, “Magopo do halolojangku, parcuma do hupuntial gogongku!” Tapi haru songon i pe, pos do rohangku ampinan ni Tuhan do au, balosonNia do di au marguru tu pambaenanku.

⁵ Saonnari songon on hata ni Tuhan, na manjadihon au mamungka sian bortian anso gabe naposoNa, laho paulakkon si Jakob tuSia, jana anso dipalagut Israel tuSia, hara ni i dipasangap ma au di jolo ni Tuhan, jana Debata ma gabe hagogoonku, didok Ia ma:

⁶ “Pamenek tu ma ho muda hum gabe naposongKu, laho pajongjongkon marga-marga ni Jakob, laho paulakkon halak Israel na tading i. Tapi baenonKu ma ho gabe sinondang di angka bangso anso haluaan na sian Au lalu tu ujung ni tano on.”

⁷ Maradopkon halak na tarlobi dipalayas, jana na nihagigihon ni angka bangso, boti na gabe naposo ni angka parkuaso, didok Debata Sipalua ni Israel: “Idaon ni angka raja ma pambaenanKu; jongjong ma halahi mamparsangapi Au. Laing idaon ni angka parkuaso muse ma i, lalu marsinggang ma marsomba halahi.” Tarjadi ma sudena i hara ni Tuhan na setia, Debata Na Badia ni Israel madung manodo naposoNa.

Dibangun mangulahi Jerusalem

⁸ Didok Tuhan tu bangsoNia, “Di hatiha na ungkap rohangKu alusanKu ma ho, di hatiha na paluahon Au, tolongonKu ma ho. Madung Hujadihon jana Hulehen ho gabe janji maradopkon jolma, laho mambangun portibi on mangulahi, jana mambagi-bagihon tano pusako na dung mamolngit i.

⁹ Halak na tarkurung Hulehen haluaan, na di hagolapan obanonKu tu na torang. Salang di dolok na limus pe nada halahi marhahurangan, sapanjang dalan rade do sipanganon.

¹⁰ Nada malean halahi sanga manguas, alogo na milas dohot mataniari na mamilngas pe nada hona tu halahi, Au na manghaholongi halahi, sai mandongani, jana tu angka mual na gok aek toguonKu halahi.

¹¹ BaenonKu ma sian dolok-dolok dalan godang, pahornoponKu ma sude dalan na holbung.

¹² Ligi ma, bahat halak na ro sian na dao, adong sian Utara dohot sian Hasundutan, jana adong sian tano Sinim.”

¹³ Marende ma ho, o langit, marsurak ma ho ale portibi, marsurak angka dolok marendei. Ro Tuhan mangapoi bangsoNia i, dihaholongi Ia bangsoNia angka na susa.

¹⁴ Hape didok Jerusalem, “Ditadingkon Tuhan do hita jana dihalupahon Ia.”

¹⁵ Dialusi Tuhan, ning Ia ma, “Adong ma he lupa sada ina, di anak na nitubuhonna? Dohonon ma he na so holong rohania di anaknia sandiri? Haru pe sugari lupa ina di dakdanakna tapi Au Tuhan, tu hamu nada ra lupa.

¹⁶ Ale Jerusalem, nada ra Au lupa di hamu, Hugorgahon do goarmu di palampak ni tanganKu.

¹⁷ Halak na mamorangi ho lopus maropuk, marlojongi ma i humalaput. Halak na giot mambangun ho mangulahi, manigor ro ma i, nada dipalambat be i.

¹⁸ Ligi ma humaliang ho, uji ma manatap, marlagut do bangsomi manghuliangi ho. Hara ni Au, Debata Na Mangolu, Au mandok, satutuna do, pakeonmu ma sude halahi gabe parhiasan jana lilitkononmu ma halahi, songon na nibaen ni dadaboru na baru marbagas.

¹⁹ Tanomu na mamolngit hara ni na dung maronco, saonnari masompittu di na mangingani ho. Nada tuk inganan di halahi sudena, na giot manginganisa. Angke madung kehe dao sian ho, halahi na mambaen sangkap manyegohon ho.

²⁰ Angka anakmu na dung dietong ho hian mago, dohononna ma tu ho: “Masompittu do luat on di au, maminggir ma, anso bisa au tinggal disi!”

²¹ Jadi gabe dokkononmu ma di bagasan rohamu, “Ise dehe na manubuhon on di au? Nada he na so adong do dakdanakku jana na so bisa do au manubuhon anak dioban tu habuangan jana dipasimbil? Tapi angka dakdanak on, ise dehe na pagodangkon halahi? Satutuna, na punjung do sasada au, tapi halahon sian dia dehe marroan?”

²² Songon on do hata ni Tuhan Debata, “Ligi da. AngkatonKu ma tanganKu songon tanda tu angka bangso, jana pasangonKu ma mandera tu marga-marga ni angka bangso, ompaon ni halahi ma angka anakmu halaklahi jana borumu pe angkon diporsan di ginjang ni abarana.

²³ Gabe songon ama di ho angka raja, jana angka ratu songon ina. Marsomba ma halahi tu ho lopus dais bohina tu tano jana mandilat abu ni patmu. Hara ni i botoonmu ma bahaso Au do Tuhan, angka halak na mararop ni roha di Au nada dipaila.”

²⁴ Hape didok hamu, “Tarrampas ma he taban-taban sian tangan ni ulubalang, sanga bisa dehe malua na tartangkup sian tangan ni na togos?”

²⁵ Dialusi Tuhan ma, “Songon i ma na giot tarjadi. Rampason ma mangulahi na nitaban ni angka ulubalang. Jana rampason mangulahi na nisamun ni jolma na togos. Musumu aloonKu; jana angka dakdanakmu paluaonKu.

²⁶ PaksaonKu ma angka jolma na manindas ho, mangankon sibukna sandiri, jana mabuk manginum mudarna sandiri, songon halak na mabuk minum anggur na imbaru. Gabe botoon ni jolma manusia ma, Au do Tuhan na paluahon ho, Na Gumogo, Debata ni si Jakob manobus ho.”