JESAYA 46 - BIBEL JAMITA NA DENGGAN

¹ Debata Bel dipatunduk, Debata Nebo dirumpakkon, patung-patungna i madung dioban di gincat ni pahan-pahanan; na unjung dipaudur-udur hamu saonnari dibaen muatan, gabe boban ni binatang na loja.

² Patung na nisombaan nada margogo palua dirina, sude hona taban jana dioban.

³ Ale pomparan ni si Jakob, tangihon ma Au, hamu sude na malua sian tonga-tonga ni bangsongKu. Mamungka sian bortian, Hutuhuk hamu; mamungka sorang, Huhunti hamu.

⁴ Au Debatamunu, giot mangondihon hamu; lopus matobang jana ubanon obukmunu. Au na manompa hamu, sai na sarihononKu do hamu, sai na paluaonKu jana urupanKu hamu.

⁵ Tu ise ma giot patudosonmunu Au? Adong ma he na tarbaen imbangKu?

⁶ Dibuka halak huncangna, diduruskon serena, jana ditimbang perakna di kiloan. Diupai halahi tukang mambaen sisombaonna lalu marsomba tu patung na nibaenna.

⁷ Diporsan patung i jana dibaen di ingananna, jongjong sajo noma i disi, jana nada tarbaen pinda. Matua na hohom do i muda martangiang halak tusia, jana nada margogo mangurupisa sian mara.

⁸ O hamu angka pardosa, ingot jana pahusor di bagasan rohamu.

⁹ Ingoti di bagasan rohamu sude na masa na salpu angka pangalaho na tarjadi najolo. Okui ma, na so adong Debata asing sian Au nada adong na sarupa dohot Au.

¹⁰ Sian mulana madung Hupajojor, sian najolo Hubaen alatan tu na giot ro. Hudok do, “Nada tarambati anggo sangkapKu, pasti tulus hagiotKu.

¹¹ Hupiohon do unggas panyoro sian Habincaran, dohot halak na patulus haputusanKu, sian luat na dao. Madung Hudokkon i, jadi giot patulusonKu do i, madung Husangkapkon i, jadi giot patulusonKu do i.

¹² Tangihon ma Au, ale angka jolma na jogal, angka halak na dao sian hasintongan:

¹³ Madung donok Hubaen hasintongan i, nada dao be i, nada tarambatan be haluaanKu, paluaonKu ma halak di Sion, jana pataridaon hamuliaonKu tu halak Israel.”