JESAYA 44 - BIBEL JAMITA NA DENGGAN

Hum Tuhan sajo do Debata

¹ “Tangihon ma ale Israel, naposongKu, pomparan ni si Jakob bangso na nitodo ni rohangKu.”

² Songon on ma hata ni Tuhan, na manompa ho na mambaen ho hatiha di bortian jana mangurupi ho. NaposongKu do ho, ulang mabiar rohamu, ho do bangso na Huhaholongi todoan ni rohangku.

³ Tano na manguas Hupabutong dohot aek, di tano na harsang, mardalan ma batang aek. DuruskononKu ma kuasongKu tu angka dakdanakmu, jana Hupasupasu pomparanmu.

⁴ Martumbur halahi mangaloyok songon duhut di lambung ni aek, songon bona ni ampolu di topi ni batang aek.

⁵ Okuon ni halak ma dirina, “Nampuna ni Tuhan do Au,” jana na asing muse mandok dirina marhite goar ni si Jakob, jana na patoluhon manyuratkon di tanganna: “Nampuna ni Tuhan,” jana manggoari dirina marhite goar ni Israel.

⁶ On ma na nidok ni Tuhan, Raja dohot Partobus ni Israel, Tuhan Na Markuaso, “Au do na parjolo jana Au do na parpudi, asing sian Au nada adong be debata na asing.

⁷ Ise ma he na songon Au? Suru ma ia mangoku! Padiar ma dipabotohon ia dohot dibuktihon ia tu Au. Ise do na dung maralatan tu hatiha na giot ro sian parmulaan lalu tu ujung ni sude hatiha?

⁸ Ulang enek rohamu, ale bangsongKu; diboto ho do sian nahinan lalu tu saonnari, madung maralatan hian Au sanga aha na giot tarjadi; hamu ma na gabe saksingKu. Adong ma he Debata asing sian Au? Nada adong Dolok Batu na asing, na Hutanda!”

Tilako do marsomba tu patung

⁹ Na so labo do sude halak sibaen patung sisombaon jana angka barang na nihajopkon ni roha ni halahi i pe nada mararga. Na mapitung jana na bodo do angka na marsomba tu patung i, jadi hara ni i angkon marlayas do halahi baenon.

¹⁰ Parcuma do mambaen patung na nituang, dung i disomba ma i songon debata!

¹¹ Satutuna, anggo angka na marsomba tu patung i angkon tarila do sude. Jolma na somal do antong na mambaen patung sisombaon i. Suru ma halahi sude ro tu paruhuman; pasti mabiar halahi jana dipaila!

¹² Dibuat tukang bosi ma sada logam, ditutung ia ma i lalu ditopa pake toko, dikarejohon ia ma i dohot sude gogo ni tanganna. Maradu malean jana sampe abis gogonia jana nada minum aek ia lopus loja.

¹³ Disuhat tukang hayu ma hayuna. Dibaen rumang ni gambarna dohot kapur, digorga ia ma i dohot angka parkokasnia jana dibaen ia ma i gabe patung ni jolma na lagak, dibaen ia ma di bagasnia.

¹⁴ Nada binoto sanga hayu aha na ni pakenia i betak na hayu tusam, saru sanga na maranti i ditaba ia sian harangan. Betak na nisuannia muse do hayu ingul, dipainte ia lopus tubu i dibaen udan.

^15-17 Deba sian hayu i gabe soban do dibaen ia baen parsisuduan dohot pamanggang ni roti sanga juhut, gabe dabu rohania. Marsisudu ma ia jana didok ia ma, “Olo da, tabo do antong jana las! Tabona i di lambung api on!” Deba nari hayu i dipake ia ma mambaen patung. Mangunduk ma ia marsomba tusi jana martangiang, “Ho do debatangku, palua ma au!”

¹⁸ Na santak do oto ni angka jolma na songon i. Na nitutup ni halahi do mata dohot roha ni halahi gabe nada diastui halahi sanga na aha.

¹⁹ Nada jabat lalu dipikiri sibaen patung i, “Na marsomba tu sangkimpal hayu do au. Deba sian hayu i hututung jana arangna i hupake baen manutung roti dohot mamanggang juhut sipanganonku. Na deba nari i ma hubaen patung. Jadi saonnari na marsomba tu samponggol hayu do au!”

²⁰ Tudos tu na mangan abu do pangalaho i. Songon i ma liluna dibaen pikiran na oto i, gabe nada haurupan be ia. Nada ra ia mangoku tu dirinia sandiri, anggo patung na di tangannia i sanga na bia pe nada Debata i.

Tuhan do Sipanompa dohot Sipalua

²¹ “Ale Israel, ingot ma tongtong, na Hubaen ho naposongKu. Tutu do, ho ma antong naposongKu nada be ho halupahononKu.

²² Huayak dosami songon alogo, salamu Hupaorot songon ombun na dihabangkon ni alogo. Hara ni i mulak ma ho tu Au, angke Au do Sipaluamu.”

²³ O langit, marende ma ho, angke madung martindak Tuhan, o butuha ni portibi, marsurak-surak ma. Dolok dohot hayu-hayu di harangan, marsurak ma marmoga-moga, pasangap ma Tuhan na manobus Israel, bangsoNia.

²⁴ Songon on ma didok Tuhan, Sipalua ho; na manompa ho mamungka sian bortian. “Au ma da Tuhan, na manompa sasudena, sasada Au do pahembangkon langit, na pahembangkon tano on ise dehe na mandongani Au?

²⁵ Hupaoto-oto angka pangaramal, Husursari ramalan ni panjujur nasib. Husungkar angka na nidok ni na malo marhata, Hupatanda na sala habisuhanna.

²⁶ Tapi Hupalalu do tahi ni angka naposongKu, songon i nang angka tahi ni suruanKu. Hupaboa do inganan ni pangisimu mangulahi Jerusalem jana pajegeson ma mangulahi angka kota luat ni Juda. Jongjong ma mangulahi angka kota na dung sego i.

²⁷ ‘Hesut!’ ningKu tu tandolan ni laut, ‘Angka batang aekmu pe pahiangonKu.’

²⁸ Au do na mandokkon taringot tu si Kores: ‘Ia do siparmahanKu, sandok hagiotKu giot patulusonnia, na mandok taringot tu Jerusalem: Padiar ma ia dipajongjong, jana taringot tu Bagas Na Badia: Padiar ma dipayakkon batu ojahanna!’ ”