Biblia Todo Logo
Bìoball air-loidhne

- Sanasan -

JESAYA 43 - BIBEL JAMITA NA DENGGAN


Dijanjihon Tuhan laho paluahon bangsoNia

1 Tapi saonnari, songon on do hata ni Tuhan, na manompa ho ale Jakob, na mambaen ho ale Israel: “Ulang mabiar, harana madung Hutobus ho, madung Hupio ho marhite goarmu, Au do nampuna ho.

2 DongananKu do ho di na mamolus aek na bagas, nada mayup ho mamolus angka batang aek; nada mosok ho muda mamolus api nada tutungon ni banggar ni api be ho.

3 Angke Au do Tuhan, Debatamu. Debata Na Badia ni Israel, Sipaluamu. Hulehen Mesir gabe partobusmu, Sudan dohot Seba baen gontimu.

4 Arga do ho Huida, Huhaholongi do ho jana Hubaen marmulia; gabe Hubaen angka jolma baen gontimu, jana angka bangso gonti ni hosamu.

5 Ulang ho mabiar sanga enek rohamu, angke Au do pangondianmu. Sian Hasundutan dohot sian Habincaran, Husuru marlagut angka pomparanmu.

6 Huparentahon tu Selatan dohot tu Utara, anso dipaloas jana ulang halahi niambatan. Anso mulak sian angka luat na dao dakdanakKi, padiar marmulahan halahi sian ujung ni portibi.

7 Angke bangsongKu do halahi na nipanggoarkon tu goarKu, Hutompa halahi laho pasangapkon Au, na Hubaen jana na Hujadihon!”


Israel saksi ni Tuhan

8 “Pio hamu ma bangsongKi laho marparkaro; haru marmata halahi, mapitung do, jana haru pe marpinggol tapi maingol do.

9 Marlagut ma hamu sude angka bangso, suru ma sandok marga marsuo. Ise ma sian halahi na tarbaen maralatan tu na giot ro? Ise na dung mangalatkon hian na masa saonnari on? Anso dibege angka saksi ni halahi, jana dokkononna tutu do songon i.”

10 Hamu do angka saksingKu, ninna Tuhan. Hutodo ho gabe naposongKu, anso ditanda ho Au jana porsaya tu Au, jana na mangastui, bahaso Au do Tuhan. Sasada Au do da Debata, anggo Debata na asing nada unjung i adong, jana indangkan na adong i.

11 Au sandiri ma da Tuhan, asing sian Au nada adong na gabe haluaan.

12 Au do na paboahon, paluahon dohot mangkobarkon, jana nada debata na asing na adong di tonga-tongamunu: “Hamu do na gabe saksingKu jana Au do Debata,” songon i ma hata ni Tuhan,

13 “Satorusna Au do tongtong Debata, jana nada adong na bisa paluahon sian tanganKu. Au na mambaenna, ise ma he na bisa manyundati?”


Dipalua sian Babel

14 On ma na nidok ni Tuhan napalua hamu, Debata Na Badia ni Israel, “Hara ni hamu, Hualo Babel marhite na manongos tentara, Huonjarkon angka palang ni pintu ni hurunganna, jana sora siriaonna Hupauba gabe partangisonna.

15 Debata Na Badia do Au, Tuhanmu, Rajamu, na manompa Israel!”

16 Songon on ma hata ni Tuhan, na mambaen dalan mamolus laut jana na mamolus aek na godang,

17 jana na marsuru tentara dohot angka na gogo laho marporang, parangan na markudo bage dohot martongtang. Tinggang do halahi, nada jongjong be mangulahi, songon api na mintop, marmatean halahi.

18 Didok Ia do, “Ulang paingot-ingot hatiha na salpu, jana ulang parrohahon angka na masa di na robi.

19 Ligi ma, giot baenonKu ma sada pangalaho na imbaru, saonnari mamungka ma tarida, madung he diboto ho? Na giot baenonKu ma dalan di halongonan, mardalan ma angka aek godang di padang na bidang.

20 Hupadalan batang aek di parhorsihan anso dapotan aek bangso na Hupili i. Gabe dohot ma binatang harangan pasangapkon Au, sorigala dohot unto pe pujionna noma Au.

21 Madung Hubaen bangso Israel gabe hapunjunganKu, laho mangendehon puji-pujian di Au.”


Dosa ni Israel diampuni

22 “Hape anggo ho Israel, madung loja ho paida-ida Au; nada be dipio ho Au, ale Jakob.

23 Nada Hupaksa ho maroban bahat haul, nada Hususai ho marhite na mangido hamonyan. Hape nada dioban ho biri-biri baen haul situtungon, jana nada dihormati ho Au marhite parhaulan.

24 Nada ditobusi ho pulungan na huskus di Au, nada dibuat ho rohangKu marhite tabo-tabo ni pahan-pahananmu. Mur dipasorat ho do Au tehe marhite dosamu jana dilojai ho Au marhite angka hasalaanmu.

25 Au, Au do na manyesa dosamu, Huampuni ho, hara ni Au sandiri. Nada ra Au manyimpan dosamu di bagasan rohangKu, hasalaanmu na salpu nada be paingot-ingotonKu.

26 Beta hita tu paruhuman; aduhon ma parkaromu, jana buktihon ma antong habonaranmu.

27 Ompumu na parjolo i pe madung mardosa, angka raja parhatamunu pe madung mangalaosi.

28 Patunda ni i pahodaronKu noma angka malim di BagasKu, jana Israel pasahatonKu anso dipabile jana diabiskon.”

Indonesian Bible Society

Indonesian Bible Society
Lean sinn:



Sanasan