JESAYA 40 - BIBEL JAMITA NA DENGGAN

Pandohan arop ni roha

¹ “Apoi, apoi hamu ma bangsongKi,” ninna Debatamunu, “Apoi, apoi hamu ma halahi!

² Angkon apoanmunu do roha ni halak Jerusalem, dok tu halahi, na dung tuk pardangolan ni halahi. Madung Husesa angka dosa ni halahi, madung tuk uhuman na Hulehen i.”

³ Adong ma halak na marsurak pio-pio, “Hobasi ma di halongonan dalan ni Tuhan. Baen hamu ma di halongonan dalan godang di Debatanta.

⁴ Ganop rura angkon timbunon, jana dolok dohot tor dipahornop. Tano na mardolok-dolok dipahornop, jana tano na marholbung-holbung angkon dipadosdos.

⁵ Gabe patangkason ma hagodangan ni Tuhan, rap midaan ma sude jolma. Tuhan sandiri do manjanjihonsa.”

⁶ Adong ma na pio-pio: “Baritahon ma!” “Aha do na giot baritahononku?” ningku marsapa: “Baritahon ma, anggo jolma i hum songon duhut do, tudos tu bunga na mangerbang hum santongkin sajo.

⁷ Mahiang ma duhut i jana malos ma bunga i, di na niombuskon ni Tuhan alogo i. Anggo bangso i do satutuna hum songon duhut sajo do.

⁸ Mahiang do duhut i jana malos ma bunga i, tapi anggo hata ni Debata sai na hot do i salolot ni lolotna.”

⁹ O Jerusalem, tangkohi ma dolok na gincat, jana baritahon ma jamita na denggan on. O Sion baritahon ma marsora na gogo, marsurak ma, jana ulang marganggu roha. Dokkon ma tu angka kota ni Juda. Giot ro ma Debata ni halahi.

¹⁰ Ro do Tuhan Debata mardongan kuaso laho mamarenta mamake sahala. Ligi da, dohot do dioban Ia, angka halak na nipaluaNia.

¹¹ Songon parmahan, disarihon Ia do na niparmahanNia, jana dipalagut Ia angka anak ni biri-biriNia; diabing Ia do halahi di tanganNia, lambok do ditogu Ia induk ni biri-biriNia.

Debata di gincat ni sasude debata

¹² Ise ma he tarbaen marsuhat laut dohot tanganna, sanga mangukur langit dohot jari-jarina? Ise ma he tarbaen papungu tano ni portibi di bagasan sambong, sanga manimbang borat ni dolok dohot kiloan?

¹³ Ise ma he tarbaen mamarenta Tondi Ni Tuhan sanga aha na giot baenonNa, ise ma he mangajari Ia sanga paingotkonsa?

¹⁴ Tu ise ma Tuhan marsapa, anso diastui Ia, jana ise ma he na patuduhon dalan hatigoran tuSia? Ise mangalehen parbinotoan tuSia, dohot panogu-noguon sanga bia baenonNia sudena?

¹⁵ Anggo satutuna angka bangso, songon santetek aek do i di bagasan timba; songon sangkibung abu di timbangan. Anggo satutuna songon abuan do borat ni angka pulo.

¹⁶ Nada tuk binatang di harangan godang Libanon baen haul situtungon, jana nada tuk angka hayu i baenon gabe sobanna.

¹⁷ Sandok bangso nada bagia aha dope i diSia, nada lobi sian na rumar soada.

¹⁸ Jadi giot tu aha ma patudosonmu Debata, aha ma didok rohamu na sarupa dohot Ia?

¹⁹ Nada sarupa Ia dohot patung na nibaen ni jolma, na marlampis sere dohot perak baen ojahanna.

²⁰ Angka halak na giot pajongjongkon patung dipili do hayu na maol busuk, jana dijalahi ma angka tukang na malo anso ulang mura goyang patung i.

²¹ Patut ma he nada diboto ho? Nada he dipaboa tu ho sian najolo? Nada he diastui ho sian mulana, sanga na bia tano on ditompa?

²² Ia na marhabangan di gincat ni hatingkoan ni portibion, pangisina songon siapor. Ia na pahembang langit songon abit, jana mamasang i songon undung-undung baen inganan.

²³ Nada margogo dibaen Ia angka parkuaso angka halak na godang agoan kuaso.

²⁴ Tudos tu suan-suanan simarata do halahi, na baru tubu dope uratna i. Muda jabat diparo Ia haba-haba, dihabangkon do halahi songon durame na mahiang.

²⁵ Dohot ise ma he patudosonmunu Au, ise ma he tudosanKu?

²⁶ Tatap ma tu langit i, ise dehe na mambaen bintang? Diatur Ia do sudena i songon parangan, diboto Ia do sanga sadia sude bahat ni bilanganna, jana ganop be do i dipio Ia marguru tu goarna. Hara ni godangna kuasoNia, sada pe nada adong i na jabat mago so haidaan.

²⁷ Antong ale Israel, biasi sai humolos, sai songon na so diboto Tuhan ho na susa? Sai songon na so parduli Ia, muda manaon na so tigor ho?

²⁸ Na so diboto ho dope? Na so dibege ho do? Tuhan na manongtong do anggo Debata. Ditompa Ia tano on sudena, nada unjung Ia loja sanga ngolngolan. Sahalak pe nada tarbaen mangastui angka pikiranNia.

²⁹ Dipargogoi Ia halak na gale, dilehen Ia kuaso di halak na dae-dae.

³⁰ Salang dakdanak na bajar gale-gale, jana halak na poso tinggang hara ni na loja.

³¹ Hape anggo di na mangido pangurupion sian Tuhan, dipasuang do hagogoan. Lopus tu ginjang manaek do halahi, songon na marhabongkon habong ni rajawali. Marlojongi do halahi so marnaloja, jana mardalan halahi nada ra gale.