JESAYA 37 - BIBEL JAMITA NA DENGGAN

Mangido sipaingot raja i tu si Jesaya

¹ Di na nibege ni Raja Hiskia lapuran ni sitolu halak i, disibakkon ia pakeannia jana marabit goni ma ia tanda ni marsakna, lalu kehe ma ia tu Bagas Ni Tuhan.

² Dung i disuru ia ma si Elyakim kapala ni bagas godang i, si Sebna juru tulis negara dohot angka malim na matobang laho mandapotkon Panurirang Jesaya, anak ni si Amos. Halahi pe laing marabit goni do.

³ On ma tona ni si Hiskia na nipasahat ni halahi tu si Jesaya, “Ari siluluton do sadari on; diuhum do hita jana dipabile. Tudos do hita on tu dadaboru na giot hipas, hape abis gogo.

⁴ Madung disuru raja Asur pangarajai inumonnia laho pabilehon Debata na mangolu i. Nada binoto betak na dung ditangihon Tuhan Debata do hata na pabilehon i, jana giot uhumanNia halahi na mandokkon i. Hara ni i, martangiang ma ho tu Debata manangiangkon angka halak hita na mangolu i dope.”

⁵ Dung dijagit si Jesaya tona na sian Raja Hiskia i,

⁶ ditongos ia ma alus songon on, “Didok Tuhan, ulang pola mabiar raja i umbege boa-boa ni halak Asur na pabilehon Au.

⁷ BaenonKu ma raja Asur umbege sada barita na mambaen ia gabe mulak tu tanonia sandiri jana hona bunu ma ia disi.”

Ditongos halak Asur ancaman na asing

⁸ Tarboto ma tu pangarajai inumon i na dung kehe rajana i manadingkon Lakis jana topet marporang mangalo kota Libna na so pola sadia dao sian i. Jadi kehe ma pangarajai inumon i tusi mandapotkon rajana i.

⁹ Madung lalu barita tu halak Asur na ro parangan ni Mesir na niuluhon ni si Tirhaka raja ni Sudan laho manyerang halahi. Umbege i, ditongos raja Asur ma surat tu si Hiskia

¹⁰ raja ni Juda. Songon on ma hata ni surat i, “Ulang ho tarpaoto hata ni janji ni Debatamu na nipangasahonmi na so madabu ho tu bagasan tanganku.

¹¹ Madung dibege ho, ganop luat na niserang ni angka raja ni Asur, diropuk do sude. Diambang ho do lakna tarbaen ho malua?

¹² Dompak na niluntak ni angka daompung kota Gosan, Haran dohot Rezep, lalu mamunu halak Eden na maringanan di Telasar, umpe sada sian debatana i na paluahon halahi.

¹³ Angka raja ni Hamat, Arpad, Sefarwaim, Hena dohot Iwa, di dia do halahi?”

¹⁴ Dijagit si Hiskia ma surat i sian angka na nisuru i lalu disise ia. Dung i kehe ma ia tu Bagas Ni Tuhan, jana dipahembang ia ma surat i di adopan ni Tuhan,

¹⁵ jana martangiang ma ia, ning ia ma,

¹⁶ “O Tuhan Na Markuaso, Debata ni Israel, na maringanan di ginjang ni angka mahluk na marhabong, hum sasada Ho do Debata na mamarenta di sude harajaan na adong di sisik ni tano on. Ho do na manompa langit dohot tano.

¹⁷ Ale Tuhan, sugari nian diparrohahon Ho ma sanga aha na tarjadi on tu hami. Tangihon ma sude pangalayasi ni si Sanherib maradopkon Ho, ale Debata na mangolu.

¹⁸ Sude do hami umbotosa ale Tuhan, na dung bahat bangso na nipusa ni angka raja ni Asur dohot angka luat na nisegohon ni halahi.

¹⁹ Ditutungi jana ditapori halahi angka debatana, dibaen nada i Debata. Hum patung na nibaen sian hayu dohot batu sajo do i antong na nibaen ni tangan ni jolma; hara ni i do umbaen na bisa disegoi jolma.

²⁰ Ale Tuhan Debata, palua ma hami sian angka halak Asur i, anso diboto sandok bangso na di tano on bahaso sasada Ho do Tuhan.”

Tona ni si Jesaya tu raja i

²¹ Dung i ditongos si Jesaya ma tona tu Raja Hiskia, Songon on ma didok Tuhan Debata ni Israel: Taringot tu na dung ditangiangkon ho tu Au si Sanherib, raja Asur,

²² madung didok Tuhan tu si Sanherib, “Partataan jana pacia-ciaon ni kota Jerusalem do ho, ale Sanherib.

²³ Ise dehe na nipaila dohot na nipabilemu! Tu ise dehe dipasihil ho soramu, dohot pangaligimu na sombong? Tu na badia, Debata ni Israel.

²⁴ Ditongos ho ma suruanmu mamburas, na dung nitaluhonmu marhite sude kareta porangmi angka dolok pargincat na di Libanon. Manggodang ma ho mandok na dung ditaba ho angka bona ni sampinur na gumincat dohot na jumegesna disi, jana dibolusi ho angka harangan godang na tumobangna i.

²⁵ Laing bunggal ma pangkatahonmu, na nihuarmu sumur jana diinum ho aek di angka luat na asing, jana didege-dege angka tentaramu Batang aek Nil lopus mahiang.

²⁶ Na so jungada dope he dibege ho, na Husangkapi hian do i sian narobi? Jana saonnari ma i Hupatulus. Au do da na mangalehen kuaso di ho laho mangaroncohon angka kota na marbenteng gabe tinggal sego-segona.

²⁷ Nada adong gogo ni angka jolma na maringanan disi; tarsonggot do halahi jana mabiar. Songon duhut na di padang-padang i do halahi sanga songon duhut na tubu di tarup, sanga gandum na malos hatiha so masak dope.

²⁸ Tapi Huboto do sude taringot tu ho sandiri. Huboto do sanga aha na nibaenmu jana sanga na tu dia ho kehe. Huboto do na marsitutu murukmu tu Au.

²⁹ Madung Hubege do sanga songon dia ginjang ni rohami. Saonnari Hubaen harihir di igungmu dohot kokang di babamu, anso Hutarik ho mulak mamolus dalan na nibolusmu di na laho ro.”

³⁰ Dung i ditongos si Jesaya ma tona songon on tu si Hiskia, “On ma tandana sanga aha na giot tarjadi. Di bagasan taon on dohot di taon na ro mangan gandum na tubu sandiri ma hamu. Tapi dung salpu i tarbaen hamu ma manyuan gandum dohot anggur lalu mandai suhana.

³¹ Halak Juda na laing mangolu i sonang noma halahi songon suan-suanan na marurat bagas sajo tu tano jana na marbatu.

³² Di Jerusalem dohot di ginjang ni Dolok Sion adong ma angka halak na malua, harana madung ditontuhon Tuhan Na Markuaso i angkon tarjadi na songon i.

³³ On ma na nidok ni Tuhan salaho tu raja Asur: ‘Nada masuhannia anggo kota i sanga manembakkon sada anak ni pana pe adop kota i. Sian tonga-tonga ni angka tentara na maniop parince nada adong sahalak pe na giot mandonohi kota i, jana humaliang kota i pe nada giot pajongjongonna tuhu-tuhu laho manghobuk kota i.

³⁴ Na giot mulak noma raja ni Asur sian na nibolusnia dompak di parronia, so pola jolo masuk ia tu kota i. Ma pola Au Tuhan mandok i.

³⁵ Hubela jana Huondingi do kota Jerusalem, hara ni hasangapanKu sandiri dohot hara ni parjanjianKu dohot naposongKu si Daud.’ ”

³⁶ Laing di borngin i, ro ma Surusuruan ni Tuhan tu parundung-undungan ni halak Asur i jana dibunu ma 185.000 halak parajuritna. Ancogotna i manyogot-nyogot, marampar ma angka bangkena i.

³⁷ Jadi gabe mundur ma si Sanherib raja ni Asur i jana mulak tu Ninive.

³⁸ Sanoli dompak marsomba ia di bagasan pamelean ni Debata Nisroh, hona bunu ma ia dibaen podang ni si Adramelek dohot si Sareser, angka anaknia do i. Dung i lari ma halahi tu Luat Ararat. Jadi anaknia na asing ma gontinia gabe raja, i ma na margoar si Esarhadon.