JESAYA 36 - BIBEL JAMITA NA DENGGAN

Diondam halak Asur kota Jerusalem

¹ Di taon paopat bolaskon mamarenta si Hiskia raja ni Juda, diporangi jana ditaluhon si Sanherib raja ni Asur ma angka kota ni Juda na marbenteng, jana ditaban ma luat i.

² Dung salpu i, disuru ia ma angka pangarajai inumon sian Lakis tu Jerusalem mardongan tentara na bahat laho manyosak Raja Hiskia anso tunduk. Lalu ma halahi di kota i maringanan ma halahi donok tu bondar ni tobat parjulu di dalan godang tu Padang Tukang Dobi.

³ Jadi ro ma tolu halak pagawe ni si Hiskia mandapotkon pangarajai inumon i, i ma si Elyakim anak ni si Hilkia kapala rumahtangga ni bagas godang, si Sebna juru tulis ni negara, dohot si Joah anak ni si Asap, bendahara ni negara.

⁴ Didok pangarajai inumon i ma tu halahi, “Palalu hamu ma tu si Hiskia hata ni raja Asur on: ‘Ise do na di pangasahonmu?

⁵ Na diambang ho do lakna tarbaen hata-hata sajo manggontihon siasat dohot gogo ni tentara? Ise do na nipangasahonmu umbaen na puluk ho mangalo Asur?

⁶ Pangurupi ni Mesir do diarop rohamu. Anggo i do, tudos tu na martungkotkon arung do i; – maponggol do i naron gabe susuk tu tanganmi. Songon i do raja Mesir di sude halak na mararop ni roha tusia.’ ”

⁷ Dung i didok halak Asur muse dope, “Sanga betak na nidokmunu do na mararop roha hamu tu Tuhan Debatamunu? Di na niparentahon ni si Hiskia anso hum marsomba di jolo ni langgatan na di Jerusalem halak Juda dohot halak Jerusalem, nada he langgatan dohot angka inganan parsombaan tuSia i sandiri do na nisego-segoNia i?

⁸ Saonnari mangasahon goar ni raja Asur puluk do au martaru, anggo sugari dilehen di hamu dua ribu kudo, pasti do na so adong dapot hamu halak sabahat ni i laho manenggetsa.

⁹ Mangadopi perwira partoru pe sian tentara ni Asur nada tumbuk dope hamu alo ni i. Hape haru songon i laing mararop roha dope hamu tu Mesir manongos bantuan kareta porang dohot tentara na markudo!

¹⁰ Diambang hamu do lakna ro hami manyerang dohot manaluhon hamu na so diurupi hami? Tuhan sandiri do marsuru hami manyerang dohot mangaroncohon hamu.”

¹¹ Dung i didok si Elyakim, si Sebna dohot si Joah ma tu pangarajai inumon i, “Marhata Aram sajo pe da tuan i tu hami; hami astui do i. Ulang pola marhata Ibrani, naron habotoan tu rayat na di ginjang ni tembok i.”

¹² Dialusi pangarajai inumon i ma, “Ulang diambang hamu disuru raja Asur au laho paboahon on sudena tu hamu dohot tu rajamunu i sajo. Dohot do tu rayat na juguk di tembok i au mandok hata, na rap dohot hamu giot mangan kotoranna sandiri dohot manginum aek na menekna.”

¹³ Dung i jongjong jana marsurak ma pangarajai inumon i di hata Ibrani, “Tangihon! Songon on pandok ni raja Asur:

¹⁴ ‘Ulang hamu ra dibungkus-bungkus Raja Hiskia; nada lobas ia palua hamu.

¹⁵ Ulang patangi-tangi hamu elek-eleknia anso marpos ni roha tu Tuhan. Ulang diambang hamu ra Tuhan paluahon hamu sanga manyundati tentara ni Asur mangarampas kotamunu on.

¹⁶ Ulang tangihon hamu si Hiskia i! Au raja Asur, mamarentahon anso ruar hamu sian kota i jana manyora. Panganonmunu do muse batu ni anggur sian kobunmunu sandiri, mandai batu ni ara sian suan-suananmunu sandiri, jana inumonmunu do aek sian sumurmunu sandiri,

¹⁷ lopus hupabungkas hamu muse tu luat na tudos tu tanomunu sandiri. Adong do disi kobun anggur na mangalehen anggur di hamu, dohot ladang gandum na mangalehen topung baen balanjomunu.

¹⁸ Ulang tangihon hamu si Hiskia i! Hum na paoto-otohon hamu sajo do bayo i anso dipikiri hamu na ro Tuhan giot paluahon hamu. Unjung ma he debata ni bangso na asing paluahon tanona sian kuasongku?

¹⁹ Di dia ma he angka debata ni Luat Hamat dohot Arpad? Di dia ma he angka debata ni Sefarwaim? Adong dehe na bisa paluahon Samaria sian tanganku?

²⁰ Debata dia ma na jungada paluahon tanona sian kuasongku? Jadi, ulang diambang hamu tarpalua Tuhan Jerusalem on!’ ”

²¹ Umbege hata i, sangkababa pe nada mandok hata be halak Jerusalem i, harana madung diparentahon Raja Hiskia anso sip sajo halahi.

²² Jadi disibakkon si Elyakim, si Sebna dohot si Joah ma pakeanna be tanda ni marsakna. Jadi kehe ma halahi paboahon tu raja i sandok na nipardokkonan ni pangarajai inumon ni Asur i.