JESAYA 33 - BIBEL JAMITA NA DENGGAN

Tangiang mangido pangurupion

¹ Marjaya ma angka musunta! Manyamun do halahi jana manyegoi haru pe nian na hona samun halahi sanga disegoi. Tapi nada dapot halahi be hatiha laho mambaen songon i, halahi sandiri noma na hona samun dohot na dihianati.

² Tuhan, ibo ma rohaMu di hami, marpos ni roha tu Ho do hami. Sai jagohon ma hami sian ari tu ari jana palua ma hami di hamamasa ni hasusaan.

³ Umbege pangaronggur ni hababangkitMu marlojong ma angka bangso jana marserak-serak ma angko bangso.

⁴ Rampason noma sinadongan ni halahi jana obanon gabe taban-taban.

⁵ Sangap situtu ma da antong Tuhan! Angke Ia do na mangarajai. BaenonNia ma hasintongan dohot hatigoran manggohi Jerusalem

⁶ jana lehenonNia ma hasonangan tu bangso i. Sai na ondihononNia do bangsoNa jana baenonNia halahi marbisuk dohot marbinoto. Pasangapon ni halahi ma Tuhan; i noma arta ni Sion.

⁷ Angka halak na barani, marsurahi mangido tolong. Angka suruan na mancubo mambaen pardamean, martangisan ma hara ni dangolna.

⁸ Angka dalan godang gabe gok parmaraan, nada puluk halak be mamolussa. Dijua do parjanjian jana dilaosi partahian. Nada adong be na dipasangap.

⁹ Ditadingkon ma luat gabe mamolngit. Malos ma angka tombak Libanon, Rura Saron na napu i gabe songon padang halongonan. Mardabuan angka bulung-bulung ni hayu na di Basan dohot Dolok Karmel.

Dipaingot Tuhan angka musuNia

¹⁰ Didok Tuhan tu angka bangso i, “Saonnari martindak noma Au. PatuduhononKu ma sanga songon dia godang ni kuasongKu.

¹¹ Marisihon duhut-duhut na mahiang ma hamu, jana ma nubuhon durame; parmurukmu songon api na mangabiskon dirimu.

¹² Nitutungan ma angka bangso gabe kapur baen soda, jana nitutungan di bagasan api songon sihirput na dirambas.

¹³ Padiar ma sude halak na dao dohot na donok mambege taringot tu pambaenanKu jana mangokui kuasongKu.”

¹⁴ Humitir hara ni biarna angka halak pardosa na di Sion. Didok halahi, “Adong dope he sian hita na tahan di bagasan api na mangabiskon on? Adong dope he na tarbaen manahan di api na manongtong i?”

¹⁵ Tarbaen hamu do martahan disi muda tigor hamu mandok hata jana dibaen hamu na denggan. Ulang pake hamu kuasomunu laho manggabusi halak na pogos, jana ulang jagit hamu hepeng sogok, ulang dohot-dohotan hamu tu halak na mambaen sangkap mamunu jolma sanga mambaen hajahatan na asing.

¹⁶ Jadi gabe malua do hamu jana sonang, songon na tinggal di bagasan benteng na togu. Singkop do sipanganon dohot siinumon di hamu.

Hamuliaan na giot ro

¹⁷ Ligionmu ma raja na sangap i, dohot luat na mabidang mansai dao.

¹⁸ Biar ni rohamunu na salpu-salpu i maradopkon tukang pajak dohot mata-mata sian bangso na asing, hum parningotan tu hatiha na salpu sajo noma i.

¹⁹ Indangkan na idaonmunu be angka halak na asing na jorbong i manghobari di hata na so niastuanmunu.

²⁰ Tatap hamu ma tu kota Sion, ingananta marpesta ugamo. Tatap ma Jerusalem! I noma sonang ni kota i baen ingananniba, songon undung-undung na so jungada dipaimbar, patokna i nada unjung diumpat jana talina i pe nada jungada magotap.

²¹ Patidahonon ni Tuhan ma tu hita hagodanganNia. Mangolu di topi ni batang aek na bidang ma hita, na so tarbolus parau ni musunta.

^22-23 Sandok perlengkapan na di parau ni halahi i, nada marguna sudena i; nada tarpahirbang angka layarna i! Rampasanta ma sude sinadongan ni musunta, jana hara ni bahatna salang halak na lumpuon pe dapot bagian. Tuhan i sandiri noma na gabe rajanta; mamarenta ma Ia tu hita jana paluaonNia ma hita sian musunta.

²⁴ Sahalak pe nada adong na humolos di luatta hara ni nyae, jana sesaonNia ma sude dosanta.