JESAYA 32 - BIBEL JAMITA NA DENGGAN

Raja na adil

¹ Di sada hatiha, na giot ro, adong ma sada raja na adil mamarenta, jana angka pamimpin ni bangso i pe mandalankon hatigoran.

² Tarsongon inganan parondingan sian alogo jana songon parlinggoman sian bade. Tudos tu batang aek na mardalan di parhorsihan do halahi, songon batu mamak na godang parsilaungan di tano na harsang.

³ Diparrohahon halahi do haporluan ni rayat.

⁴ Parmopop hian madung gabe parsobar jana gok pangastuion. Pargugup hian madung torang mangkobari.

⁵ Halak na bodo nada be etongon na marsangap, jana pargabus nada be didokkon i na jujur.

⁶ Halak na bodo mandok hata ma i songon na bodo, jana na mambaen sangkap na jat. Sanga aha pe na nibaen sanga na nidoknia, laing matua palayaskon Tuhan do i. Na so unjung do ia mangalehen mangan di halak na malean sanga minum tu halak na manguas.

⁷ Na jahat do halak na bodo i jana sai matua mambaen na jahat do i. Diakalkon ia do i laho mangago halak na pogos marhite gabus dohot na mangambatisa manjagit aturan bagianna humani.

⁸ Tapi anggo halak na burju roha sai na tigor do i jana pir do i mampartahankon na tigor.

Sipaingot tu angka dadaboru ni Jerusalem

⁹ Ale angka dadaboru na sonang ngot ma hamu bege ma sorangku, ale angka bujing-bujing na dame tangihon ma hatangku.

¹⁰ Saonnari tola ma hamu puas, tapi tar sataon nari mandele noma hamu, angke nada adong batu ni anggur di hamu di hamamasa ni musimna.

¹¹ Mabiar ma hamu ale angka dadaboru na sonang, humitir ma hamu ale angka dadaboru na dame, buka ma abitmu jana pake ma abit goni.

¹² Mangandungi ma hamu harana madung disegohon angka ladangmunu na napu i dohot kobun anggurmunu i,

¹³ jana di tano ni bangsongku madung martubuan angka sihupi. Tangisi hamu ma angka bagasmunu inganan ni halak marsonang-sonang dohot kota na rumibur i.

¹⁴ Salang bagas godang i pe tadingkonon do i dohot kota sabungan i gabe mamolngit. Angka benteng dohot angka bagas panjago kota i gabe tinggal tapor-taporna noma i salolot-lolotna. Halode riar dohot angka biri-biri marroha-roha jana manjampali ma disi.

¹⁵ Dilehen do tu hita Tondi sian ginjang. Jadi gabe napu ma tano na harsang jana angka ladang pe mangalehen suhana marlompit ganda.

¹⁶ Di padang parhorsihan pe marlaku ma hasintongan, di kobun pe marlaku ma hatigoran.

¹⁷ Sanga na di dia adong hasintongan, dapotan ma disi hadameon, jana hara ni hasintongan tubu ma haulion dohot hasonangan salolot ni lolotna.

¹⁸ Marmoga-moga ma bangsongku. Moga ma halahi di bagas ni halahini be, nada adong be hasusaan.

¹⁹ Sego ma angka harangan jana marrumpakan ma angka kota.

²⁰ Martua ma sudena halak na manabur di lambung ni batang aek, jana na bidang jampalan ni halode dohot lombuna.