JESAYA 31 - BIBEL JAMITA NA DENGGAN

Jerusalem giot ondingan ni Tuhan

¹ Marjaya ma halak na kehe tu Mesir laho mangido pangurupion. Dipangasahon halahi do hagogoan ni tentara ni Mesir, dohot parangan na manengget kudo dohot kudonia na gogo i songon i karetana na bahat i. Hape nada porsaya halahi tu Tuhan, Debata Na Badia ni Israel sanga pe mangido pangurupionNia.

² Na pistar do Tuhan jana diboto Ia do sanga aha na nibaenNia. Diparo Ia do parmaraan jana didalankon Ia do ancamanNia laho manguhumi halak na jahat dohot halak na mangampini halahi.

³ Hum jolma na somal do halak Mesir, nada debata halahi. Kudo ni halahi pe mahluk na somal do, nada adong bako hadebataanna. Muda jabat martindak Tuhan, targompang noma bangso na gogo i, jana bangso na gale na nitungkolanna i pe madabu noma. Gabe rap marujung noma i dua-duana.

⁴ Didok Tuhan do tu au, “Songon singa na mampartahankon soroanna jana na so tarpabiar-biar surak-surak dohot pangarar ni parmahan, laing songon i ma Au mampartahankon Dolok Sion, jana nada adong na tarbaen mangambati Au.

⁵ Songon unggas na manggurapar di ginjang ni asarna laho mangondihon angka anakna, laing songon i ma Au, Tuhan Na Markuaso mangondihon dohot mambela Jerusalem.”

⁶ “Hamu bangso Israel! Madung mardosa hamu jana mangalo hamu tuSia. Tapi saonnari, mulak ma hamu!

⁷ Dapot do hatiha ni i, ambungkononmunu noma angka patung gana-ganaanmunu na sian perak dohot sere na mambaen hamu gabe mardosa.

⁸ Abis di parporangan noma Asur, tapi nada marhite gogo ni jolma. Maporus ma halak Asur i sian porang, jana angka na poso bulung ni halahi baenon noma gabe hatoban.

⁹ Maporus ma rajana i hara ni biarna, jana angka perwirana i tarsonggot situtu, gabe ditadingkon halahi noma mandera ni parporangan.” Madung didok Tuhan songon i, nampuna api na di Sion dohot tataring na di Jerusalem.