JESAYA 30 - BIBEL JAMITA NA DENGGAN

Parjanjian na so marguna dohot Mesir

¹ Didok Tuhan, “Marjaya ma angka pamimpin ni Juda, patunda ni na mangalo halahi tu Au. Diihutkon halahi angka sangkap na so sian Au. Pardonganon na so nisuru ni tondingKu.

² Kehe do halahi antong tu Mesir so jolo mangido tahi tu Au. Sai giot marlindung do halahi tu Mesir jana marpos ni roha tu raja ni Mesir.

³ Hape pabilehon halahi do parlindungan ni Parao, jana parlinggoman na nipainte-inte i sian Mesir marujung tu hasusaan sajo do.

⁴ Haru pe na dung lalu angka suruan ni Juda i tu kota Zoan dohot Hanes na di Mesir,

⁵ gabe hahaila noma i di bangso Juda hara ni na dung marpos ni roha halahi tu bangso na so tarpangasahon i. Nada pangurupion na dapot halahi, tapi tilako do.”

⁶ Songon on ma tona ni Debata salaho tu angka binatang na maringanan di padang halongonan na di Selatan: “Bobanan ni angka suruan i ma halode dohot unto ni halahi dohot angka silua, dung i boluson ni halahi ma luat na gok parmaraan, na niinganan ni singa, ulok na bisa dohot naga na marhabong. Dipasahat halahi ma angka silua i tu sada bangso na so lobassa mangurupi halahi.

⁷ Parcuma do pangurupi ni Mesir. Hara ni i gabe Hubaen ma panggoar-goari ni Mesir, ‘Naga na so sihabiaran.’ ”

Bangso na so setia

⁸ Disuru Debata do au manyuratkon hajahatan ni bangsoNia di sada buku na gabe parningotan tu ari na giot ro salolot ni lolotna.

⁹ Hara ni na sai mangalo halahi tu Debata, sai margabus, jana nada jungada ra manangihon pangajaran ni Tuhan.

¹⁰ Didok halahi do tu angka panurirang, “Pasip! Ulang paboa tu hami na tutu. Na tabo begeonnami ma dok. Padiar ma hami marangan-angan.

¹¹ Kehe ma ho mandao, jana ulang be ambati hami. Nada ringkot rohanami umbege salaho tu Debata Na Badia ni Israel i.”

¹² Tapi on ma na nidok ni Debata Na Badia ni Israel: “Dipasiding hamu do na Hudok jana dipangasahon hamu do gogo dohot gabus.

¹³ Hara ni i marsala do hamu. Tarsongon tembok na gincat do hamu na matapor sian ginjang lalu tu toru; tompu noma hamu maronco.

¹⁴ Maropuk ma hamu songon hudon tano na matapor sarge umpe sangkoping na tarpake gabe ngarngar pambuat ni banggar sian tataring sanga panahu ni aek sian kula.”

¹⁵ Tuhan Debata, Debata Na Badia ni Israel, mandok tu bangsoNia, “Manopoti sala ma hamu tu Au, gabe paluaonKu ma hamu. Haporsayai hamu ma Au di bagasan roha na sonang, gabe pargogoanKu ma hamu.”

¹⁶ Hape so ra hamu! Mur mambaen tahi do hamu laho maporus sian musumunu manengget kudo na hipas, marlojong do hamu tutu jana mago. Didok hamu muse do, “Giot tenggetonnami do kuda na gogo,” hape gumogo dope angka na mangkojar hamu.

¹⁷ Hum mida sada halak tentara ni musu pe, maporus ma hamu saribu halak, jana lima halak pe tentara ni halahi diida hamu, tuk ma i mambaen maporus hamu sudena. Na tading sian tentaramunu hum sada tiang ni mandera noma di ginjang ni puncut ni dolok.

¹⁸ Haru pe songon i, laing dipainte Tuhan dope hatihana laho patuduhon tu hamu ibo ni rohaNia. Rade do Ia laho maribo ni roha tu hamu, angke Tuhan i do Debata na tigor. Martua do na marpos ni roha tuSia.

Janji haluaon tu Sion

¹⁹ Ale hamu na maringanan di Jerusalem, nada sai mangandungi be hamu. Ibo roha ni Tuhan jana alusanNia ma hamu muda pio-pio hamu tuSia mangido tolong.

²⁰ Dipadiar Tuhan do hamu mangarasoi cobaan na borat, laho mangajar hamu. Tapi anggo saonnari, Ia sandiri noma mamimpin hamu gabe nada pola porlu be jalahanmunu Ia.

²¹ Muda manyimbil hamu sian dalan, tarbege do i sian pudimunu soraNia na mandok, “On do dalan i; dalan on ma bolus hamu.”

²² Ambungkononmunu ma angka patung ni gana-ganaanmunu na marlampis perak dohot sere, jana dokkononmunu ma: “Morot ma sian au!”

²³ Muda manyabur same hamu, tongoson ni Tuhan ma udan anso tubu same i jana mangalehen suha marlompit ganda. Di pahan-pahananmunu pe rade ma bahat jampalanna.

²⁴ Lombu jantan dohot halode na mambajak ladangmunu panganonna ma jampalan na lumomak, na nipasingkop tusi.

²⁵ Di ari dompak na manghobuk angka benteng ni musumu jana dibunui angka halakna i, mamincar ma angka anak ni batang aek sian ganop dolok dohot tor.

²⁶ Marsinondang ma bulan i songon torang ni mataniari, jana mataniari i tumorang pitu noli sian na somal, songon torang ni pitu ari dipasada. Tarjadi ma sudena i di na ro Tuhan mambalut dohot pamalumkon angka bugang ni bangsoNia na nisambokNia i.

Giot uhuman ni Debata ma Asur

²⁷ Tarida do sian na dao kuaso dohot hagodangan ni Tuhan. Api dohot timus patuduhon rimas ni rohaNia. Mandok hata Ia, jana angka hataNia i manutung songon api.

²⁸ Pangombus ni hosaNia songon batang aek na mangayupkon. Abis ma angka bangso, jana marujung muse ma angka sangkap ni halahi na jat i.

²⁹ Tapi anggo hamu, marjop ni roha jana marendei ma hamu songon na masa di borngin ni pesta ugamo. Marmoga-moga ma hamu songon halak na ribur mardalan didongani sora ni suling laho manaek tu dolok ni Tuhan, na mangondihon Israel.

³⁰ Patubegehonon ni Tuhan ma soraNia na tongam i jana ganop halak hilalaonna ma hamuruhonNia na sogen i. ParoonNia ma api na mangabiskon, udan potir, ambolas dohot bade.

³¹ Tarsonggot ma halak Asur muda dibege halahi sora ni Tuhan jana taraso ma panguhumiNia na borat i.

³² Di na mangarasoi angka pukul-pukul i halahi, marsonang-sonang ma halak ni Tuhan mardongan musik gondang dohot hasapi. Ia sandiri do marporang mangalo halak Asur.

³³ Mamungka sian narobi na dung diparade hian do api baen panutung ni raja Asur. Bagas jana lumbang do inganan i na marisi soban martinggang-tinggang. Ombuskonon ni Tuhan ma hosaNia laho pagarahon api i.