JESAYA 28 - BIBEL JAMITA NA DENGGAN

Sipaingot tu Harajaan Utara

¹ Marjaya ma Harajaan Israel! Hambar ma hajegesonna i songon sasusuhan ni bunga na malos di ulu ni angka pamimpinna. Huskus nian ulu ni halahi hara ni miak wangi, tapi bustang do halahi modom songon na mate hara ni na mabuk.

² Suruhonon ni Tuhan ma sada halak na gogo jana na barani laho mamorangi halahi. Parronia songon alogo halingsungsung na mardongan ambolas, songon udan potir dohot banjir godang na mangayup dohot na mambaen bonom tano darat.

³ Dege-degeonna hatongamon ni angka pamimpinna na mabuk i.

⁴ Mur mago ma habonggalonna i na dung mamungka mangkohom. Nada adong be tarida partinggalna, songon batu ni ara na parjolo diputik jana manigor dipangankon.

⁵ Di hatiha i Tuhan Na Markuaso i noma na gabe bunga na jeges di bangsoNia na teba i.

⁶ Lehenon ma roha hasintongan di angka panguhum dohot habaranion tu angka panjago ni harbangan ni kota i maradopkon musu na ro mamorangi.

Si Jesaya dohot angka panurirang ni Juda na mabuk

⁷ Angka panurirang dohot angka malim pe nada be tarhatahon parmabukna hara ni na mabahathu minum anggur dohot tuak. Lenong-lenong pardalan ni halahi jana manjomba-jombaan hara ni na golap pikiranna. Nada diastui angka panurirang be angka parnidaan na nilehen ni Debata tu halahi. Nada tarputuskon angka malim be angka parkaro na lalu tu halahi.

⁸ Gok uta-uta noma meja ni halahi, gabe nada adong be inganan na ias.

⁹ Humolos halahi taringot tu au, didok halahi, “Na mangajar ise dehe ia ning rohania? Ise dehe na manghaporluhon pangajarannia? Diambangkon ia do rupa hamion songon dakdanak na baru sirang manyusu.

¹⁰ Harana angkon on do angkon i, musti on do musti i, tamba on tamba i.”

¹¹ Anggo nada ra hamu manangihon na hudok, suruon ni Tuhan noma halak na asing pangkulingna dohot pangkobarna laho mangajar hamu.

¹² Ditawarkon Ia do ari paradianan dohot jop ni roha tu hamu sude. Hape hamu do na so ra manangihon.

¹³ Hara ni i ma da umbaen na giot ajaron ni Tuhan i hamu marhite: Angkon on do angkon i, musti on do musti i, tamba on tamba i. Jana angkon tartuktuk hamu ganop mangalangka. Angkon mabugang hamu, tarjorat jana tartangkup.

Batu parsuhi tu Sion

¹⁴ Tangihon ma sanga aha na nidok ni Tuhan, hamu ale angka parkuaso na ginjang roha na mamarenta rayat di Jerusalem!

¹⁵ Maginjang ma rohamunu hara ni na dung mambaen parjanjian dohot hamatean dohot na dung satahi hamu dohot kuburan. Madung pasti di pangkilalaanmunu na so hahuaon ni parmaraan na giot ro i be hamu, umbaen na mamake tipu akal hamu laho manjagohon dirimunu.

¹⁶ Hara ni i songon on ma didok Tuhan Debata, “BaenonKu ma ojahan na togu jana na tohong di Sion; di gincat ni batu parsuhi na arga i suratkononKu ma: ‘Haporsayaan na togu, padao ganggu ni roha.’

¹⁷ Hatigoran do tali panyuhat ni ojahan i jana hajujuron do tali pandodona.” Paison ni ambolas ma ias sude gabus na gabe sitioponmunu i. Ayupon ni aek magodang ma inganan parlindunganmunu i.

¹⁸ Soadahonon ma parjanjianmunu dohot hamatean, jadi muda ro parmaraan, hona noma hamu.

¹⁹ Dondonan ni siluluton noma hamu mardapot-dapot ganop ari; angkon taononmunu noma i manyogot, arian dohot borngin. Mur jorbut ma pangkilalaanmu muda mur diingot ho hata i.

²⁰ Songon halak na modom di parate na hurang ginjang muda mamustang. Hurang bidang ulos i muda dipake margupgup.

²¹ Angke ro ma Tuhan marporang songon na di Dolok Perasim dohot songon na di Rura Gibeon giot palalaluhon na nidokNa, jana hahomangon do pambaenNa jana na so haastuan do sanga na songon dia sidung baenonNia.

²² Madung hubege haputusan ni Tuhan Debata Na Markuaso i laho mangago sandok luat. Ulang nayang rohamunu di angka hata na hupalalu on. Mur tu maolna lalu di hamu palua diri!

Habisuhon ni Tuhan

²³ Tangihon ma angka hatangku jana parrohahon ma tonangku.

²⁴ Ganop ari do rupa halak mangungkap, mamalik jana paiaskon tano na laho marsuan?

²⁵ Muda dung sidung tanona i, disabur ia ma same, umpamana jintan na lomlom sanga jintan na bontar. Disuan ia ma gandum sanga na jawawut, jana di topina i suan-suanan na asing.

²⁶ Diboto ia do sanga na bia baenonnia mangkarejohon i, harana madung diajari Debata ia.

²⁷ Nada unjung dipake ia pukul-pukul na dokdok laho manduda batu ni jintan na bontar sanga pe na lomlom i. Tungkot na nayang boti na menek do dipake ia tusi.

²⁸ Muda mardege gandum, nada dibalbali ia i torus-torusan lopus maropuk. Nada! Diboto ia do mardege i denggan di na nipadalannia garobak di ginjangna i so pola maropuk batu ni gandum i.

²⁹ Sian Tuhan Na Markuaso i do haroro ni habisuhon i. Sai na matua bisuk do sude sangkap ni Tuhan jana sai manjadi.