JESAYA 27 - BIBEL JAMITA NA DENGGAN

¹ Pakeon ni Tuhan ma podangNia na togu jana na tajom i laho manguhumi Lewiatan, ulok na margeldok-geldok jana na mangarpe i dohot mamunu naga laut i.

² Dokkonon ma di hatiha i, “Marende ma hamu taringot tu kobun anggur na jeges i.

³ Au do Tuhan na manjagosa; jana na totop pasiram-siram i; arian sanga borngin sai Hujagoi do i, anso ulang adong na manyego i.

⁴ Nada muruk be Au sanga na biraraon. Sugari pe laing adong duhut sanga sihupi, Au noma torus mamorangi abis ma i sudena Hututungi.

⁵ Tapi ampot angka musu ni bangsongKi, tu Au parlindungan dijalahi, padiar ma ro halahi mardame tu Au, tutu do ra ma halahi mardame tu Au.”

⁶ Tu hatiha na giot ro, marurat ma pinompar ni si Jakob.

Diuhum Tuhan bangsoNia

⁷ Jabat dehe songon borat ni uhum tu angka bangso na asing i panguhumi ni Tuhan di bangso Israel? Sanga songon bahat ni musu na mate bahat ni halak Israel na mate?

⁸ Hona taban do uhuman ni bangsoNia. Dipaorot Ia halahi marhite halingsungsung na ro sian Habincaran.

⁹ Tapi anggo dosa ni Israel hum sada do dalanna anso tarsesa i, i ma muda digiling lamot songon soda angka langgatan parsombaan tu angka debata. Sandok panutungan ni hamonyan dohot tiang gana-ganaan Debata Asera angkon nisarsarkon muse.

¹⁰ Madung marumpak jana gabe buang kota na marbenteng i songon halongonan na mamolngit. Manjampal lalu maradian disi noma angka hulanan ni pahan-pahanan manjampali bulung-bulung sian dangka ni hayu na adong disi.

¹¹ Muda adong angka rantingna i na mahiang jana masopak, ro ma angka dadaboru mambuatisa baen soban. Nada diastui bangso i sanga na aha, jadi gabe nada haholongan ni Panompa i be halahi sanga asianNa.

Dipasuang Tuhan bangsoNia i

¹² Di hatiha i, palaguton ni Tuhan ma bangsoNia i pasada-sada sian Batang aek Efrat lopus tu batas ni Mesir. SirangonNia ma halahi songon pamiari ni halak di eme sian lapungna.

¹³ Paluon ma di hatiha i sarune laho marpio sude halak Israel na hona buang di Asur dohot di Mesir. Ro ma halahi tu Jerusalem marsomba tu Tuhan di dolokNa na badia.