JESAYA 25 - BIBEL JAMITA NA DENGGAN

Ende pujian

¹ Ale Tuhan, Ho do Debatangku, giot hupasangap jana hupuji do goarMu. Madung dipatupa Ho angka karejo na pahomang roha. Sian denggan ni rohaMu do i dibaen Ho sudena, na nijanjihonMu mamungka sian narobi.

² Angka kota dibaen Ho gabe lobu, angka bentengna i sarge manghagopu. Bagas Godang na nipajongjong ni musu madung soada nada patureon be i salolot-lolotna.

³ Pujion ni angka bangso na gogo ma Ho, angka bangso na jungkat mabiar mida Ho.

⁴ Ho do parlojongan ni halak na pogos dohot na gale, di Ho do halahi sonang di hamamasa ni susa pe. Sian alogo na jorbut diondingi Ho do halahi. Sian pandoit ni na milas dilinggomi Ho do halahi. Ompot mambaen serangan halak na jungkat songon haroro ni bade di ari nonat,

⁵ songon alogo na milas di logo ni ari. Madung dibaen Ho musunami manguntam, baba ni parjahat pe mangkohom songon ari na milas dipalambok ombun.

Haluaan ni angka bangso na di Sion

⁶ Di Dolok Sion, dihobasi Tuhan Na Markuaso i ma pesta di sude bangso na di tano on. Rade ma dibaen angka sipanganon na tumabo dohot anggur pilian.

⁷ BuatonNia sian halahi di ginjang ni dolok i ombun hamarsahan na mambalut angka bangso.

⁸ AbiskononNia ma hamatean ro di salolot-lolotna! Apusan ni Tuhan Debata ma ilu-ilu sian ganop mata, jana padaoonNa habilean na nitanggung ni halakNia di sude portibi on. Madung didok Tuhan i songon i, angkon tulus do i tarjadi.

⁹ Dokkonon ni halak ma di hatiha i, “Tutu ma da, Ia do antong Debatanta. I ma Tuhan na tapaima-ima laho mangalehen haluaanta. Saonnari marsurak ma hita marjop ni roha, dibaen na dung nipaluaNia hita.”

Giot uhuman ni Tuhan Moab

¹⁰ Ondihonon ni Tuhan ma Dolok Sion, tapi anggo Moab dege-degeonNia do songon durame di inganan ni rompak.

¹¹ Surduhonon ni pangisina ma tanganna songon halak na giot marlange. Hape na giot patutoruon ni Tuhan ma halahi lopus gale tanganna i nada margogo.

¹² RumpakkononNia ma angka benteng ni Moab dohot angka tembokna na gincat-gincat i pe lopus magopu songon abuan.