JESAYA 24 - BIBEL JAMITA NA DENGGAN

Giot uhuman ni Tuhan ma tano on

¹ Segohonon ni Tuhan ma tano on, lopus gabe harsang jana mamolngit. Margaba-gobi ma baenonNia sisik ni tano on jana sarsarkononNia noma na manginganisa.

² Sarupa be do disi bagian ni jolma i sudena – angka malim dohot rayat, hatoban na nitobusan dohot tuanna, panggadis dohot panobusi, parsali dohot parsingir, na kayo dohot na pogos.

³ Pupusan ma tano i sudena lopus gabe harsang situtu. Madung didok Tuhan, jana musti tarjadi songon i.

⁴ Mahiang ma tano on jana malos, marhancit sude portibi on. Rap marhancit ma langit dohot tano on.

⁵ Hodar ma tano on patunda ni na nilaosan ni pangisina angka parenta, na manguba aturan jana manggagai janji.

⁶ I ma dalanna umbaen diburai tano on jana diuhumi pangisina hara ni pangalaho ni halahi. Dipurun ma halahi jana hum saotik nari noma sian halahi na malua.

⁷ Marsingkor bona ni anggur jana maol ma dapot aek ni anggur. Halak na marjop ni roha di hatiha na salpu, saonnari gabe marsak.

⁸ Nada adong be habegean sora ni hasapi na marriang-riang dohot pamalu ni rapano na marmoga-moga.

⁹ Nada adong be halak na minum anggur marendei, nada adong be na mandai tabo ni siinumon na koras.

¹⁰ Gaor sude kota; tarkunci sude pintu ni bagas hara ni biar ni nampunasa.

¹¹ Marsurak-surak ma angka jolma di dalan-dalan i hara ni na abis anggur. Madung mago jop ni roha salolot-lolotna, jana hamogaan lintop sian sisik ni tano on sudena.

¹² Ma pola maronco kota jana horbanganna pe marumpak.

¹³ Songon i ma na giot masa di tano on sudena di ganop bangso. Laing sarupa ma pangalahona di masa ni panen, di na mambuat batu ni zetun lopus abis dohot batu ni anggur na parpudi diputik sian bonana.

¹⁴ Marende jop ni roha ma sanga ise angka na malua. Baritahonon ni halak na di Hasundutan ma hagodangan ni Tuhan,

¹⁵ jana halak na di Habincaran pe pujionna ma Ia. Sudena halak angka na maringanan di topi ni laut mamuji Tuhan, Debata ni Israel.

¹⁶ Sian angka ujung ni tano on tarbege ma ende puji-pujian di Israel, bangso na tigor i. Hape nada adong arop ni rohangku! Marhancit do au! Laing mangarampok do parjahat, mur martamba jahat dope tehe halahi.

¹⁷ Tangihon hamu ma, sude pangisi ni tano on! Dondonan ni hagaoron ma hamu; madung inte tirangkap dohot jorgong tu hamu.

¹⁸ Sanga ise na marlojong hara ni biarna, madabu ma tu tirangkap, jana na so hona tu tirangkap hona jorat ma. Udan potir diparo sian langit jana humuntal ma ojahan ni tano on.

¹⁹ Marotak ma tano, maropuk jana humutur.

²⁰ Songon na mabuk ma tano on mambal-ambal, jana humutur-hutur songon sopo na buruk na niombus ni alogo. Marumpak ma tano on hara ni dokdok ni dosana. Maronco ma i jana nada mulak be sumuang.

²¹ Di hatiha i, uhuman ni Tuhan ma angka na markuaso di awang-awang na so martopi i dohot angka raja na di tano on.

²² Rap palaguton ma halahi sude songon tahanan na di bagasan liang. Hurungon ma halahi di bagasan hurungan lopus dapot hatihana niuhuman.

²³ Manggolap ma bulan i jana mataniari nada be marsinondang, angke mamarenta noma Tuhan Na Markuaso i songon sada raja. Mamarenta ma Ia di Jerusalem, di ginjang ni Dolok Sion, jana idaon ni angka pamimpin ni bangso ma hamuliaonNia.