JESAYA 22 - BIBEL JAMITA NA DENGGAN

Alatan taringot tu Jerusalem

¹ On ma alatan taringot tu Rura Halumbaan: O hamu na maringanan di Jerusalem, biasi manaek hamu sude tu tarup ni bagas?

² Sude kota marsurak-surak gok hariburon dohot jop ni roha. Angka tentaramunu na mate di parporangan i nada mate hara ni na marporang.

³ Na maporus do sude angka panglimamunu jana hona tangkup dompak so sanga dope ditembakkon halahi hum sada anak ni pana pe. Songon i dohot tentara na jago.

⁴ Jadi gabe hudok ma, “Padao ma panailimu sian au. Tadingkon ma sasada au mangandungi di bagasan hapaeton, ulang be sai apoi au hara ni hamamago ni boru ni bangsongku.

⁵ Tutu nian na dung ditontuhon Tuhan, Tuhan Na Markuaso i do ari on gabe ari hataluan, dohot hagaoron di Rura Halumbaan. Madung dirumpakkon angka tembok ni kota. Marsaringar ma habegean sora ni angguk na mangido tolong di angka dolok.”

⁶ Madung ro Elam marsinjatahon sior dohot pana, jana tentara ni Siria pe madung ro markudo dohot markareta, dohot tentara ni Kir mambuka parincena.

⁷ Gok ma angka napa ni Juda dohot kareta porang. Madung hobas angka parangan na markudo di jolo ni angka horbangan ni Jerusalem.

⁸ Madabu ma sude partahanan ni Juda. Paruaronmunu ma di hatiha i angka parkokas sipakeon di porang sian panyimpananna.

^9-10 Diida hamu angka bagian ni tembok ni kota Jerusalem na patut paulion. Diparesoi hamu ma sude bagas na di Jerusalem, dibungkar hamu ma deba bagas i anso pakeonmunu batuna i laho padenggankon tembok ni kota i. Laho palagutkon aek,

¹¹ dibaen hamu ma tobat di bagasan kota i jana dipamasuk ma tusi aek na sian tobat na lolot i. Hape nada dirohahon hamu Ia na dung honok mambaen sangkap i sude, jana na mambaen sudena tarjadi.

¹² Suruon ni Tuhan, Tuhan Na Markuaso i ma hamu tangis dohot mangandungi, marcukur ulu dohot mamake abit goni di hatiha i.

¹³ Hape suhar-suhar ni i, marmoga-moga jana marpestai hamu. Mangan juhut ni biri-biri hamu dohot lombu jana minum anggur lalu pio-pio, “Tole ma da mangan minum hita, angke laing na mate ma hita ancogot!”

¹⁴ Dipataridahon Tuhan, Tuhan Na Markuaso i do diriNa tu au jana didok, “Sanga na bia pe nada Huampuni be anggo hajahatan ni halahi i, lopus mate be halahi. Tuhan, Tuhan Na Markuaso do mandok i.”

Sipaingot tu si Sebna

¹⁵ Disuru Tuhan, Tuhan Na Markuaso i ma au mandapotkon si Sebna, kapala rumahtangga ni bagas godang ni raja i laho palaluhon tusia tona ni Tuhan songon on:

¹⁶ “Ise ma he ho didok rohamu lakna? Aha hakmu manuhil kuburan di ho di dolok batu i?

^17-18 Jago ho, ambungkonon ni Tuhan ma ho tu sihadaoan. JomahonNia ma ho jana balun-balunonNia. BuangonNia ma ho tu luat na gumodang. Mate disi ma ho di lambung ni angka kareta na sai nipangasahonmi. Ditilakoi ho goar ni bagas ni tuanmu.

¹⁹ Patunda ni i antakonKu ma ho sian jabatanmi jana paturunonKu ma pangkatmu.

²⁰ Di hatiha i, piohononKu ma naposongKu si Elyakim anak ni si Hilkia.

²¹ PapakehononKu ma tusia pakean dinas dohot bobatmi. PasahatonKu ma tusia sandok kuasomi. Gabe ama ma ia di halak Jerusalem dohot Juda.

²² Gok disia ma sude kuaso di toru ni raja na sian pomparan ni si Daud. Tioponnia ma kunci ni harajaan i. Muda dibuka ia, nada adong be na tarbaen manutup, jana muda ditutup ia nada adong na tarbaen mambukasa.

²³ LehenonKu ma disia juguhan na togu songon sangkotan na damos dipasang di tembok. Gabe marsangap ma sude halahi sabagas hara ni ia.

²⁴ Tapi anggo si solkot dohot ale-ale maradu sitanggungonnia gabe boban ma i disia. Marsigantung tusia do halahi songon huali na gantung di sangkotan.

²⁵ Muda dung tulus i, gabe taldus ma sangkotan na togu i jana madabu. Jana i ma pangabisanna sian horong dohot sude halak na marsigantung tusia. Tuhan Na Markuaso madung mandokkonsa.”