JESAYA 21 - BIBEL JAMITA NA DENGGAN

Alatan taringot tu hasesego ni Babel

¹ Songon on ma alatan taringot tu Babel: Songon halingsungsung na mardonging na mamolus di parhorsihan, songon i ma haroro ni parmaraan sian luat sihabiaran.

² Madung dipatuduhon tu au taringot tu na jorbut na giot masa, halumbaan taringot tu hajahatan dohot hasesegona. Maju ma hamu parangan ni Elam, roro ma! O hamu parangan ni Madai, hobuk hamu ma angka kota i! Na giot paujungonKu noma sude pardangolan na nibaenan ni Babel.

³ Patunda ni parnidaan i gabe mabiar jana hancitan ma au songon dadaboru na topet manubuhon dakdanak.

⁴ Hancit sajo simajujungku jana gok biar ma au. Dipangido rohangku ma anso humipas borngin, hapengani mur tamba dope biarku disi.

⁵ Huida muse ma horja na godang na dung dihobasi; rade juguhan di angka tamu na niontang. Mangan minum ma halahi. Ompot ma tarbege parenta, “Hamu angka panglima! Pasingkop hamu angka parincemunu!”

⁶ Dung i didok Tuhan ma tu au, “Kehe ma ho, pasingkop ma sahalak panjago di gardu panjagoan jana suru ma ia mangalapurkon sanga aha na niidania.

⁷ Muda diligi ia ro angka na juguk di gincat ni kudo marbaris dua, dohot na juguk di gincat ni halode dohot unto, angkon tangkas do i paresoonnia.”

⁸ Dung i pio-pio ma panjago i, “Tuan, madung jonggor au arian dohot borngin.”

⁹ Ligi, indu ma halahi! Parangan na markudo ro mardua-dua. Dung i ro ma panjago i paboahon, “Madung madabu Babel! Madung marragean angka patung na nisomba ni halahi i di tano.”

¹⁰ Bangsongku Israel! Ma hona dege-dege ho songon burir ni gandum. Saonnari hupaboa ma tu ho jamita na denggan na hubege sian Tuhan Na Markuaso i, Debata ni Israel.

Alatan taringot tu Edom

¹¹ Songon on ma alatan taringot tu Edom: Adong ma halak na pio-pio tu au sian Edom, “O panjago, lolot dope borngin on? Piga jom nari anso torang ari?”

¹² Hualusi ma, “Ro do i manyogot, tapi borngin dope. Muda giot sapaanmu, ro ma ho mangulahi manyapai.”

Alatan taringot tu Arab

¹³ On ma alatan taringot tu Arab: O hamu halak Dedan, na pajongjong undung-undung parbornginan do parjagal-jagal i di kota ni halak Arab.

¹⁴ Lehen ma minum angka halak na manguas na ro tu ho. O hamu halak na maringanan di tano Tema, lehen hamu ma mangan angka halak pangusi.

¹⁵ Angke bangso na lari sian podang na sintak do halahi, sian sior na tangging dohot sian sude parmaraan ni porang.

¹⁶ Dung i didok Tuhan ma tu au, “Tumbuk sataon nari, marujung noma habonggalan ni angka marga ni Kedar.

¹⁷ Ulubalang na sumurung do angka sitiop sior ni Kedar. Hape hum saotik sajo do na malua sian halahi. Au, Tuhan Debata ni Israel madung mandok songon i.”