JESAYA 2 - BIBEL JAMITA NA DENGGAN

Dame na manongtong

¹ On ma tona salaho tu Juda dohot Jerusalem na nijagit ni si Jesaya anak ni si Amos sian Debata:

² Angkon tarjadi ma di angka ari na parpudi, dolok inganan ni Bagas Ni Tuhan angkon jongjong di julu ni angka dolok jana tardas di ginjang ni angka dolok marudur ma tu si angka bangso.

³ Dokkonon ni halahi sude ma disi, “Manangkok ma da hita tu dolok ni Tuhan! i ma tu Bagas Ni Debata ni Jakob! AjarkononNia noma tu hita sanga aha na patut baenonta. Ihutkononta noma dalan na nitodoNia, harana sian Jerusalem muse do da asal ni poda ni Tuhan, sian Sion do Tuhan mandok hataNa tu bangsoNia.”

⁴ Angkon gabe panguhum do Ia ditonga-tonga ni angka bangso jana gabe juri tu marga ni bahat bangso; anso ditopa halahi ma angka podangna gabe mata ni bajak jana angka tombakna manjadi piso cukur; nasa bangso nada be mangangkat podang maralohon bangso, jana nada be marsiajar marporang halahi.

⁵ O ale hamu pomparan ni si Jakob, beta ma hita mardalan di bagasan sondang ni Tuhan!

Pusaon noma halak na gakgak

⁶ Ale Debata, madung ditadingkon Ho bangsoMu pomparan ni si Jakob! Sanga na di dia pe di luat on, mamake hadatuon do halak songon halak Pilistin dohot halak na di Habincaran. Ditiru rayat i do adat na somal di halak na asing.

⁷ Gok perak dohot sere do tano ni halahi jana na so tarasam do bahat ni sinadonganna. Kudona na lobi bahat, jana karetana nada habilangan bahatna.

⁸ Sanga na di dia sap gana-ganaan, jana marsomba tu angka patung na nipauli ni tanganna sandiri do halahi.

⁹ Angkon marbile do ganop halak jana dipaila. Ulang lehen ampunan tu halahi, ale Tuhan!

¹⁰ Na giot masuk tu liang na di dolok batu noma halahi, sanga manghuar lubang di bagasan tano anso malua sian hamumuruk ni Tuhan dohot sian kuasoNia na marmulia i.

^11-12 Dapot ma hatihana parenjepon halak na gakgak, halak siginjang roha patunduhon, jana Tuhan i sandiri noma sipasangapon. Anggo di ari i patutoruon ni Tuhan noma sude sanga ise na markuaso, na ginjang roha dohot halak na gakgak.

¹³ Pusaon noma sude bona ni aras na gincat na di Libanon dohot sude hayu damar na di Basan.

¹⁴ Pahornopon ma angka dolok dohot angka tor na tohong i.

¹⁵ Rumpakkonon ma angka palas-palas na gincat dohot angka tembok ni benteng.

¹⁶ Bonomkonon ma angka kapal na gumodang-godang dohot na jumeges-jeges sian Tarsis.

^17-18 Patutoruon ma halak na gakgak, jana papatuon ma halak na ginjang roha. Mago noma angka gana-ganaan sian sisik ni tano on. Anggo di ari i hum sasada Tuhan noma sipasangapon.

^19-21 Di haroro ni Tuhan laho manghutur tano on, marmasuhan ma halak tu bagasan angka liang di angka dolok batu sanga manghuar lubang di bagasan tano anso malua sian hamumuruk ni Tuhan dohot sian kuasoNia na marmulia i. Anggo dung dapot do ari i, tadingkononkon ma songon i sajo angka gana-ganaan perak dohot sere na nibaen ni halahi baen turpuk ni monci dohot arip-arip.

²² Antong, ulang be da mararop roha hamu tu jolma na pasti mate, harana nada mararga i.