JESAYA 18 - BIBEL JAMITA NA DENGGAN

Giot uhumon ni Debata do Sudan

¹ Di ipar ni angka Batang aek Sudan tarbege do sora songon pamaspas ni habong.

² Marroan ma angka suruan sian luat i mamolus sian Batang aek Nil mamake angka parau pandan. Hamu ale angka suruan na lingkas-lingkas, ompoti hamu ma mulak tu tanomunu na nibolus ni angka batang aek i. Palalu hamu ma sada tona tu bangsomunu na gogo jana na barani i, angka na ginjang na godang boti parhuling-huling na halus jana sihabiaran di na satano on.

³ Hamu sude angka na maringanan di tano on! Parrohahon hamu ma muda dung dipanaek mandera di puncut ni angka dolok! Tangihon hamu ma muda dipalu sarune!

⁴ “Pohom do Au mangaligi sian ingananKu, nada marsora songon nambur di hatiha logo ni ari di sabion, songon pangkohom ni mataniari di arian.

⁵ Dompak so musimna mamutik angka batu ni hayu, dung marurusi angka bungana jana dompak so mamutik batu ni anggur di bonana, roncohonon ni musu ma Sudan, songon pangkorot ni piso di angka ranting sian bona ni anggur.

⁶ Tadingkonon ma angka bangke ni tentarana i gabe sipanganon ni angka unggas dohot binatang panyoro. Papanganan ni angka unggas ma i dompak di logo ni ari jana di musim nonat gabe soroan ni binatang riar ma i.”

⁷ Dapot do i hatihana, pasahaton ma angka silua somba-somba tu Tuhan Na Markuaso i sian luat na nibolus ni angka batang aek i, sian bangsona na gogo jana na markuaso i, sian angka halakna na ginjang godang jana na marhuling-huling na halus boti na nihabiaran di sude portibi on. Marroan ma halahi tu Dolok Sion, tu inganan parsombaan tu Tuhan Na Markuaso i.