JESAYA 16 - BIBEL JAMITA NA DENGGAN

Nada margogo be Moab

¹ Sian kota Sela na di parhorsihan, ditongos halak Moab ma anak ni biri-biri na gabe silehen-lehen ni halahi tu angka na markuaso di Jerusalem.

² Songon unggas na diayak sian asarna, songon i ma bujing-bujing ni Moab pahae-pahulu di topi ni Batang aek Arnon.

³ Didok halahi ma tu halak Juda, “Dokkon ma sanga aha sikarejohononnami. Ondingi ma hami songon bona ni hayu na mangalehen linggom na laung di ari milas arian i, jana padiar ma maringanan hami di toru ni linggommu. Pangungsi do hami; bunihon ma hami anso ulang tartangkup.

⁴ Paloas hami maringanan di luatmu. Ondingi hami sian halak na giot mamunu hami.” (Muli marujung do na mamparhanciti dohot na mangabisi jana muli kehe do angka jolma na manyegohon tano ni Israel.

⁵ Dung i gabe raja ma sada sian pomparan ni si Daud, jana parentaonnia ma bangsonia marhite holong dohot burju ni rohana. Pajongjongonnia ma hatigoran jana ompotannia noma mambaen tindakan laho mambaen na tigor.)

⁶ Didok bangso Juda ma, “Madung hami bege sanga songon dia ginjang ni roha ni Moab. Hami boto do na gakgak halahi jana na bunggal, hape hatana na teal i na so marisi bagi aha do i.”

⁷ Mangandungi ma Moab hara ni pardangolanna. Martangisan ma halahi sude muda taringot tu sipanganon na tabo na somal dipangan halahi di kota Kir-Hareset. Mandele ma halahi jana humolos.

⁸ Anggo angka ladang na di lambung ni Hesbon dohot angka kobun anggur na di Sibma ma pola dironcohon, angka kobun na somal pambuatan ni anggur na dumenggan baen di angka parkuaso ni bangso i jana na mambaen mabuk halahi. Lalu hian do najolo bidang ni kobun anggur i lopus tu kota Jaeser; jana tu Habincaran lalu tu parhorsihan, jana di Hasundutan lopus tu ipar ni Laut Mate.

⁹ Saonnari manangisi bona ni anggur Sibma noma au songon na manangisi Jaeser. Marilu-ilu au baen di Hesbon dohot di Eleale, dibaen nada adong panen hara ni porang.

¹⁰ Umpe adong sahalak na marjop ni roha di angka ladang na napu i. Nada adong na pio-pio sanga na marende di kobun anggur i. Nada adong na mamoro anggur laho mambaen aek ni anggur. Madung marujung surak-surak jop ni roha.

¹¹ Hara ni arsakku hutangisi do Moab, jana huarsakkon do Kir-Heres.

¹² Marloja-loja halak Moab manganangkohi tor tu inganan paribadatan ni halahi laho martangiang, hape nada adong gunana.

¹³ I ma da tona na nilehen ni Tuhan najolo salaho tu Moab.

¹⁴ Jana saonnari didok Tuhan: “Pas tolu taon nari, limpot ma sude arta sinadongan ni Moab. Gabe saotik noma rayatna na bahat i boti gale.”