JESAYA 15 - BIBEL JAMITA NA DENGGAN

Giot roncohonon ni Debata noma Moab

¹ On ma Tona Ni Debata salaho tu Moab. Madung dironcohon kota Ar dohot Kir di bagasan saborngin, jana mamolngit ma Luat Moab.

² Manangkok ma tu dolok halak Dibon laho mangandungi di inganan pamelean ni angka debata. Di bagasan hancit ni roha andungan ni halak na di Moab ma kota Nebo dohot Medeba. Marcukur ulu ma halahi dohot janggut tanda ni na marhabot ni roha.

³ Mamake abit goni ma halak di dalan-dalan i tanda ni habot ni roha; di tano lapang dohot di tarup ni bagas, mangandungi jana martangisan halak.

⁴ Mangangguhi ma halak Hesbon dohot Eleale jana habegean do angguk ni halahi i lalu tu Jahas. Salang angka tentara pe humitir do; manyikur be hara ni biarna.

⁵ Ibo do rohangKu mida Moab! Mangungsi noma halak kota i tu Zoar dohot tu Eglat Selisia. Adong ma deba na manangkok di dalan na tu Luhit laing tumatangis; adong na marlojong tu Horonaim laing gogo mangangguhi.

⁶ Batang aek Nimrim dohot duhut na martubuan di topina i pe ma pola pora mahiang, nada adong be na rata tubu disi.

⁷ Dibolusi angka halak ma Batang aek Haarabim laho paluahon dirina be dohot sinadonganna.

⁸ Sanga na di dia pe parbalohan ni Moab, habegean ma sora ni na tangis. Tarbege do pangandungna i di Eglaim dohot Beer-Elim.

⁹ Di kota Dibon gabe marrarai aek ni batang aek i hara ni na marcampur mudar. Jana paroonKu dope angka pangalaho na jumorbut maradopkon angka jolma na disi. BaenonKu dope singa laho manyoro angka jolma na kehe sian Moab, dohot na teba di luat i.