JESAYA 13 - BIBEL JAMITA NA DENGGAN

Giot uhumon ni Debata kota Babel

¹ On ma tona ni Debata na nijagit ni si Jesaya anak ni si Amos, taringot tu Babel:

² Pajongjong ma mandera porang di puncu ni dolok na gundul! Marsurak ma tu angka parajurit, jana patoltol ma tanganmu tanda ni na giot mangaroro halahi mamorangi kota na gakgak i jana mangonjar angka horbanganna.

³ Madung dipiohon Tuhan angka ulubalang na nipilianNia na garang, na marpos ni roha di dirina jana na papos roha laho mamorangi dohot manguhumi angka jolma na hona murukNia.

⁴ Tangihon ma sora na gaor-gaor di dolok i – sora ni halak na marlagut bahat sajo, hagaoron ni angka bangso dohot angka harajaan na marlagut. Hatiha mamareso barisan na giot marporang i ma Tuhan Na Markuaso i.

⁵ Na marroan sian angka luat sihadaoan do i sian angka ujung ni tano on. Di hamuruhonNa i giot pusaon ni Tuhan do sude portibi on.

⁶ Mangandungi ma hamu, angke madung donok ari ni Tuhan i. Di ari i, paroon ni Tuhan Na Gumincat i ma hamagoan.

⁷ Ganop halak hilalaonna ma tanganna gale jana heput.

⁸ Didondoni biar ma halahi sudena jana marngeati hancitan, songon ina na manubuhon dakdanak. Marsiligi-ligian ma halahi sak be rohana, marrarai bohina i hara ni ilana.

⁹ Na giot ro ma ari ni Tuhan i, jana di ari i palaluon ni Tuhan i ma hagusaronNa dohot muruk ni rohaNa na tarlobi. Gabe halongonan ma portibi on, jana mago ma sanga ise halak pardosa.

¹⁰ Ganop bintang dohot baris-baris ni bintang i mantak ma marsinondang, manggolap ma mataniari di habibincarna, jana bulan pe nada marsinondang be.

¹¹ “ParoonKu ma mara tu portibi on jana uhumanKu ma sude halak na jahat hara ni angka dosa ni halahi. Sanga ise siginjang roha Hupatutoru, halak na gakgak dohot na kejam uhumonKu.

¹² Angkon ummotik jolma na mangolu sian sere na polin.

¹³ Humutur ma baenonKu langit i jana tano on humuntal sian ingananna di ari i, Au Tuhan Na Markuaso patuduhon kuasongKu.

¹⁴ Halak na asing na maringanan di Babel lari ma i tu luatna be; marserak noma halahi songon ursa na marlojong sian parburu sanga songon biri-biri sahulanan na so marparmahan.

¹⁵ Sanga ise na tartangkup tihamon noma i lopus mate.

¹⁶ Idaon ni halahi sandiri ma angka dakdanak ni halahi na menek-menek i diropuk, bagas ni halahi hona harpus dohot angka daboru ni halahi dipaksa marmainan.”

¹⁷ Ligi ma, “PabangkitonKu do bangso Madai laho mamorangi Babel. Nada mampan tu halahi na mangalehen perak sanga sere baen suruk.

¹⁸ Bunuon ni halahi do angka na poso dohot siorna songon i dohot pana. Nada masa ibo ni roha di halahi maradopkon dakdanak na baru sorang jana nada holong roha ni halahi mida dakdanak.

¹⁹ Sian sasude harajaan, Babel ma na jumeges, jana na gabe hagodangan ni roha ni halak na manginganisa. Tapi Debata, giot mambalikkonsa, songon na dung dibaen maradopkon Sodom dohot Gomora.

²⁰ Nada adong umpe sahalak be na tading disi. Nada adong halak Arab parbungkas-bungkas i na giot pajongjong undung-undungna di inganan i, jana nada adong parmahan na giot maroban hambeng biri-biri na niparmahanna manjampal tusi.

²¹ Inganan ni angka binatang riar noma i. Pature asar ma disi unggas sipauk, jana maringanan ma disi unggas unto. Manortori ma di holang-kolang ni sego-segona i angka hambeng harangan.

²² Marauang angka anjing harangan dohot sorigala sian palas-palas ni bagas siomagodangna dohot sian bagas ni Babel. Dapot ne ma hatihana, jana umurna nada dipaginjang.”