JESAYA 11 - BIBEL JAMITA NA DENGGAN

Harajaan na dame

¹ Songon hayu na nitaba do pomparan ni si Daud anak ni si Isai i. Tapi tubu do tunas sian tungko ni si Isai i jana sorang do anakna sian uratna i.

² Songgop ma tusia Tondi Ni Tuhan i ma tondi na mangalehen habisuhon dohot parbinotoan, tondi na mangalehen sipasingot dohot hagogoan, tondi na mangalehen panandaon dohot biar mida Tuhan.

³ Jop ni rohana do marpangoloion tu Tuhan, nada manguhumi ia rambus laos sajo sanga marguru tu hata ni halak sajo.

⁴ Markite-hite hatigoran do ditimbang ia parkaro ni halak na pogos; diondihon ia hak ni halak na gale lopus dapot, halak parsala diuhumi hara ni parentania, halak na jahat dipusa ia.

⁵ Markite hasintongan dohot hatigoran do aturonNia bangsoNa.

⁶ Mardame ma disi sorigala dohot biri-biri, rap modom-modom ma angguliman dohot hambeng. Manjampal ma anak ni lombu rap dohot anak ni singa, jana dakdanak na menek marmahanisa.

⁷ Lombu dohot gompul rap manjampal dua-dua, rap margiling-giling angka anakna. Singa dohot lombu rap manggagat durame.

⁸ Salangkan anak na baru sorang pe nada mahua haru pe marmayami di lambung ni ulok na bisa.

⁹ Di sude dolokKu na badia, nada adong na jahat sanga pe mara, gok parbinotoan taringot tu Tuhan ma angka luat, songon aek na manggohi dano mangalantap.

Mulak do bangso na nitaban i

¹⁰ Dapot do hatihana, ro sada raja pomparan ni si Daud na gabe pamusatan ni roha ni angka bangso. Marlagut ma halahi di kota ni harajaan jana mangalehen sangap tusia.

¹¹ Di ari i, sanoli nari giot pakeon ni Tuhan ma kuasoNia jana obanonma bangsoNia na teba i di Asur dohot Mesir, di angka luat ni Patros, Sudan dohot Elam, di Babel, Hamat dohot di angka pulo na di laut.

¹² PajongjongonNia ma sada mandera laho patandahon tu angka bangso bahaso na nipalagutNia mangulahi bangso Israel dohot Juda na marserak i di na opat mata angin jana maroban halahi mulak.

¹³ Nada be mangiburu harajaan Israel mida Juda, jana Juda pe nada be musuanna Israel.

¹⁴ Rap mamorangi noma halahi tu halak Pilistin na di Hasundutan jana mangarampasi angka bangso na di Habincaran. Taluhonon ni halahi ma bangso Edom dohot Moab, dohot bangso Amon pe tunduk ma tu halahi.

¹⁵ Pahiangon ni Tuhan ma dohot Solok Sues. BaenonNia ma mangombus alogo na milas lopus mahiang Batang aek Efrat jana gabe pitu batang aek na pejet-pejet ma disi jana sude halak tarbaen manariparisa.

¹⁶ Dapot halak Israel na teba i ma dalan godang laho ruar sian Asur, songon na masa di hatiha ni ompu-ompu ni halahi ruar sian Mesir.