JESAYA 10 - BIBEL JAMITA NA DENGGAN

¹ Marjaya ma hamu! Dipambaeni hamu do angka aturan na so tigor laho mamisat bangsongKi.

² Songon i ma dalanna dibaen hamu laho paimbar hak dohot hatigoran jana mangarampas sinadongan ni angka na mabalu dohot na so marama so marina.

³ Aha ma na giot baenonmunu di ari panguhuman, jana hatiha hasesego na giot ro sian sihadaoan? Tu ise ma ho kehe mangido pangurupion? Di dia ma he tabunihononmunu hakayoonmunu i?

⁴ Mate di bagasan porang sajo ma bagianmunu, sanga disarat-sarat songon halak na tartaban. Tapi laing na muruk dope Tuhan jana sai giot manguhumi.

Dipake Debata raja ni Asur

⁵ Didok Tuhan ma, “Hupake do Asur songon potuk-potuk laho mamukul angka halak na giot simuruhanKu.

⁶ Hutongos do Asur laho manguhumi bangsongKu na marbalik jana na mambaen Au muruk. Husuru do Asur laho mangarampas dohot manangko lalu mangalonca-lonca bangsongKu songon abu na di dalan i.”

⁷ Tapi adong do tahi na asing sian raja Asur, giot sude bangso do roncohononnia.

⁸ Dipaginjang ia ma rohania, ning ia ma, “Raja do sude angka panglimangku!

⁹ Hurampas do angka kota Kalno dohot Karkemis, Hamat dohot Arpad. Hurampas muse do kota Samaria dohot Damaskus.

¹⁰ Hutaluhon do angka harajaan na marsomba gana-ganaan na gumodang kuasona sian na adong di Jerusalem dohot Samaria.

¹¹ Ma pola husego-sego Samaria dohot sude gana-ganaanna i, songon i muse ma baenonku di Jerusalem maradu sude gana-ganaan na disomba disi.”

¹² Tapi didok Tuhan ma, “Anggo dung sidung do na giot baenonKi di Dolok Sion dohot di Jerusalem, uhumonKu do raja ni Asur i hara ni ginjang ni rohana dohot gakgakna.”

¹³ Manggambung ma raja Asur, ning ia ma, “Markite-hite kuasongku sandiri do da i hubaen sudena. Sai gogo, sai bisuk dohot sai pistar au antong. Husesa angka na mangholangi angka bangso, jana hurampas arta na nipalagut-lagut ni halahi. Jana songon lombu, hulonca-lonca angka halak na mamarenta.

¹⁴ Songon asar ni unggas do angka bangso di tano on, mura do hubaen mambuati sinadongan ni halahi, songon pambuat ni halak di pira na di asar. Umpe adong habong na manggerpos laho manyonggot au, nada adong na mambuka tuktukna laho marsurak tu au!”

¹⁵ Tapi didok Tuhan ma, “Tarbaen pato ma he manggodangkon dirina maradopkon na mamakesa? Umporlu ma he gargaji ulang pado halak na mamakesa? Nanggo da potuk-potuk mangangkat halak, tapi halak do na mangangkat potuk-potuk.”

¹⁶ Dibaen madung manyombong halak Asur, paroon ni Tuhan Na Markuaso i ma nyae laho manguhumi angka perwira na mamokmohi saonnari. Hona arun na lobi milas ma halahi songon api na torus manutungi.

¹⁷ Debata Na Badia sinondang ni Israel, gabe songon jilam ni api na manutung abis sasudena di bagasan sadari, dohot ma i angka ramba na marduri i.

¹⁸ Angka harangan godang dohot angka ladang na napu segohonon noma i sudena, tudos tu jolma na nisegohon ni nyae na mamatehon.

¹⁹ Saotik nari noma tading angka bona ni hayu, jabat taretong dakdanak na menek bahatna.

Saotik do jolma na giot sipaluaon

²⁰ Dapot ma hatihana, bangso Israel na teba i nada be marguru tu bangso na markuaso na giot mangago halahi, tapi tu Tuhan, Debata Na Badia ni Israel noma.

²¹ Bangso Israel na teba sisaotik i, mangulahi ma burju mangoloi Debata parmonang i.

²² Haru pe halak Israel na saonnari sarupa bahatna dohot horsik na di topi ni laut, hum piga-piga halak sajo noma i na giot mulak. Madung disadiahon Tuhan uhuman pangabiskon halahi anso jongjong hatigoran.

²³ Olo da, sude do luat i giot segohonon ni Tuhan, Tuhan Na Markuaso i; i do haputusan na nibaen ni Tuhan jana nada tarpauba be i.

Giot uhumon ni Tuhan Asur

²⁴ Didok Tuhan, Tuhan Na Markuaso i do tu bangsoNia na maringanan di Sion, “Ulang mabiar hamu mida halak Asur, haru pe dipisat halahi hamu, songon na nibaen ni halak Mesir tu hamu najolo.

²⁵ Santongkin nari, sidung ma uhumanKu hamu, jadi pangabisonKu noma halahi.

²⁶ Au Tuhan Na Markuaso, giot sambohonKu halahi dohot loncing-loncing, songon panggosangKu di halak Midian di Dolok Batu Oreb. UhumanKu do Asur songon panguhumKu di Mesir.

²⁷ Di hatiha i ma paluaonKu hamu sian Asur, jana nada markuaso be halahi tu hamu.”

Ro Asur mamorangi

²⁸ Madung dirampas tentara ni Asur kota Ajat! Madung disalpui halahi Migron! Di Mikmas do ditadingkon halahi bohal haporluanna!

²⁹ Madung disalpui halahi panariparan jana marborngin halahi di Geba! Humitir ma halak Rama jana halak Gibea kota ni Raja Saul madung markehean marsipalua dirina.

³⁰ Marsurak bo hamu ale halak Galim! Tangihon hamu ale halak Laisa! Alusi bo ale halak Anatot!

³¹ Halak Madmena dohot Gebim ma pola kehe mangungsi.

³² Di kota Nob ma sadari on musu i, jana disi ma halahi mamohul tenjuna maradopkon Dolok Sion tu kota Jerusalem.

³³ Tuhan Na Markuaso i do na giot mangarumpakkon halahi songon dangka na nitaba sian bonana. Na umdorgak jana na gumincat sian halahi ponggolkonon noma jana pailaon.

³⁴ Rumpakkonon ni Tuhan ma halahi songon hayu di tonga ni tombak na nitaba dohot baliung. Haru pe margogo halahi songon hayu na jumagar di Libanon, laing na madabu noma halahi!