JEREMIA 8 - BIBEL JAMITA NA DENGGAN

¹ Anggo di hatiha i paruaron ma sian angka kuburanna, angka holi-holi ni raja-raja dohot angka parpangkat di pamarenta ni Juda, songon i dohot holi-holi ni angka malim, panurirang dohot halak Jerusalem na asing i,

² nada laho palaguton sanga tanomon mangulahi tapi padiaron do rerak di tano i songon rompak. Marserak ma angka holi-holi ni jolma i di las ni ari, di torang ni bulan dohot angka bintang na nihaholongan ni halahi, na nioloanna, na nisomba dohot pangidoan ni panogu-noguon ni halahi.

³ Jadi sanga ise halak na laing mangolu sian bangso na jahat na Husarsarkon on sun tu dia, gumonan noma dihilala halahi mate ulang pado mangolu. Au Tuhan Na Markuaso, madung mandok songon i.”

Dosa dohot uhuman

⁴ Disuru Tuhan ma au mandok tu bangsoNia songon on, “Muda tinggang halak, tontu jongjong do ia mangulahi, jana muda lilu halak di dalanna, tontu mulak do ia tu pudi.

⁵ Hape anggo hamu bangsongKu, biasi ditadingkon hamu Au, jana nada ra mulak tu Au? Ditulak hamu do Au jana togu hamu marsitiopan tu gana-ganaanmunu i!

⁶ Madung marsitutu Au manangihon, hape nada tigor rohamunu mandok hata. Umpe adong sahalak sian hamu na manyolsoli pangalahona na jahat i; nada adong na mandok, ‘Aha do hasalaanku?’ Marsitondong dalanna sandiri be do hamu sude songon kudo na mangaroro tu parporangan.

⁷ Unggas sibarung pe diboto do hatihana mulak; hatutu, layang-layang dohot pincala pe diboto do hatihana pinda inganan. Hape anggo hamu, bangsongKu, nada diboto hamu angka tona na Hulehen di hamu.

⁸ Puluk do hamu antong mandok na malo hamu, jana na pistar salaho tu angka tona! Cubo hamu ma jolo mangaligi angka tona na Hulehen i madung dipauba angka panyurat na so tigor!

⁹ Pailaon noma angka halak na pistar di tonga-tongamunu; mago ma roha ni halahi jana tarjorat. Nada ra halahi manangihon sipaingotKu; saonnari hapistaran aha dope na tading di halahi?

¹⁰ Patunda ni i na giot pasahatonKu noma ladang ni halahi tu tuan partano na asing, dohot angka dadaboru ni halahi tu halak na asing. Marsijalahi untungna be do halahi sude sian dalan na so patut, na menek dohot na magodang. Salang panurirang pe dohot malim dohot do manggabusi halak.

¹¹ Marlayas ni roha do halahi hatiha mangubati bugang ni boru ni bangsongKu, ning halahi, ‘Hasonangan, hasonangan!’ Tapi nada adong hasonangan.

¹² O hamu bangsongKu, patut nian maila ma hamu hara ni sude halayason na dung nibaenmunu on! Hape hapal do bohimunu jana nada mamboto hahaila. Jadi hara ni i angkon madabu hamu songon halak na asing na dung madabu i; abis ma riwayatmunu muda dung Huuhumi hamu. Au Tuhan, madung mandok songon i.”

¹³ “Por sajo do nian rohangKu palagutkon bangsongKu songon halak na palagutkon suha ni tanona; hape songon bona ni anggur dohot bona ni hayu ara na so marbatu do bangsongKu; dohot bulungna pe tehe ma pola marmalosan. Hara ni i ma umbaen na Hupaloas halak na leban ro jana mangarajai luat ni halahi.”

¹⁴ “Biasi nada tabaen sanga na aha?” ninna bangso ni Debata. “Beta, mangungsi hita tu angka kota na marbenteng; padiar mate disi hita. Madung didabuhon Tuhan Debatanta hamatean tu hita; madung dilehen tu hita rasun siinumon hara ni na mardosa hita tuSia.

¹⁵ Nada marguna arop rohanta di hadameon dohot hatiha na pamalumkon, angke hum na mangasahon gogo do na adong.

¹⁶ Madung di kota Dan musu; madung habegean parngiho-ngiho ni kudo ni halahi, jana gabe mabiar sude na saluat. Madung ro musu laho manyegohon sude tanonta, songon i dohot hutanta maradu sude halak na manginganisa.”

¹⁷ “Parrohahon!” ninna Tuhan. “Saonnari Hutongos angka ulok tu tonga-tongamunu laho manurbingi hamu, ulok na marbisa na so hatabasan.”

Marsak si Jeremia pasari-sari bangsona i

¹⁸ Mabugang ate-atengku jana maniak, nada haubatan pardangolanniba.

¹⁹ Tangihon! Marsaringar sude luat on parngiar ni bangsongku na tangis manyapai, “Na so di Sion be ulaning Tuhan i? Di dia do ulaning Rajana i saonnari?” Dialusi Tuhan, Raja ni halahi, “Biasi marsomba ho tu angka debata na so adong sanga aha gunana? Biasi dipahancit ho rohangKu marhite na marsomba angka gana-ganaan?”

²⁰ Pio-pio ma halak Israel, “Madung salpu saonnari sabion dohot logo ni ari, hape hita laing nada dipalua.”

²¹ Magopu rohangku hara ni hancit ni nyae ni bangsongku, marsak jana mandele rohangku.

²² Hara ni aha do ulaning bangsongku lopus saonnari matua laing so marnamalum? Adong he di sude Gilead na so adong be pangubati dohot ubat?