JEREMIA 52 - BIBEL JAMITA NA DENGGAN

Madabu Jerusalem

¹ Marumur dua pulu sada taon ma si Zedekia di na gabe raja ia di Juda. Sabolas taon honokna mamarenta ia di Jerusalem. Inangnia margoar si Hamutal, anak ni si Jeremia sian kota Libna.

² Songon Raja Joyakim Raja Zedekia pe mardosa do tu Tuhan.

³ Sun do muruk ni Tuhan maradopkon halak na maringanan di Jerusalem dohot halak Juda lopus nada ra be Ia mamparrohahon halahi. Dung i mangalo ma si Zedekia maradopkon si Nebukadnesar raja ni Babel.

⁴ Patunda ni i ro ma si Nebukadnesar dohot sude parangannia jana diserang ia ma Jerusalem di tanggal sampulu bulan sampulu di taon pasambilankon dung mamarenta si Zedekia. Dipajongjong halahi ma markas di balian ni kota, dibaen ma tembok panghobuhan

⁵ jana torus ma kota i dihobuk lopus tu taon pasabolaskon dung raja si Zedekia.

⁶ Di tanggal sambilan bulan opat laing di bagasan taon i, dompak hajebuanna haleon potir lopus nada adong be sipanganon bagi aha di rayat i.

⁷ Dirorak musu i ma tembok ni kota i. Di borngin i, haru pe laing dihobuk halak Babel kota i, marsilojongkon dirina ma angka tentara ni Juda sabola tu Rura Jordan. Mamolus sian kobun ni bagas godang ma halahi, luncat sian horbangan na padomuhon tembok na dua i di inganan i.

⁸ Tapi diayak tentara ni Babel i do Raja Zedekia, jana ditangkup ma ia di napa ni Jeriko. Marlojongi do sude anak buania i manadingkon ia.

⁹ Dung i dioban ma Raja Zedekia tu Raja Nebukadnesar di kota Ribla di Luat Hamat, lalu didabu ma uhuman mate tusia.

¹⁰ Laing di kota i muse dibunu ma angka dakdanaknia di jolo ni matania sandiri dohot sude angka parpangkat ni Juda pe hona bunu ma.

¹¹ Dung i dipulsikkon ma mata ni si Zedekia, dirante ma ia lalu dioban tu Babel. Dipamasuk ma ia tu hurungan disi, jana nada jungada ia ruar sian i lopus tu hamamatenia.

Dironcohon Bagas Ni Debata

¹² Di tanggal sampulu bulan lima ditaon pasambilan bolaskon mamarenta si Nebukadnesar gabe raja ni Babel, ro ma sada halak tu Jerusalem na margoar si Nebusaradan. Panuturi dohot panglima ni tentara ni si Nebukadnesar.

¹³ Disurbu si Nebusaradan ma Bagas Ni Debata, bagas godang ni raja i dohot sude bagas ni halak na godang-godang di Jerusalem.

¹⁴ Dung i dirumpakkon angka parangannia i ma angka tembok ni kota i.

¹⁵ Dung i angka rayat na laing tinggal di kota i, i ma angka parkarejo na malo-malo na teba i, rap dohot angka jolma na dung maporus tu pihak ni halak Babel, dioban si Nebusaradan ma i tu Babel.

¹⁶ Tapi deba sian rayat na umpogos jana na so mararta ditadingkon ia do i di Juda, jana disuru ia ma i mangkarejohon kobun anggur dohot angka ladang.

¹⁷ Anggo angka tiang tumbaga i ditaporkon halak Babel i do i, lalu dioban halahi do tumbagana i tu tano ni halahi.

^18-19 Angka barang-barang on pe dioban halahi do: Sodok-sodok, inganan ni sirabun ni langgatan, angka parkokas ni lampu, angka sambong panarean ni mudar ni binatang na disambol baen haul, angka sambong sipakeon manutung dupa dohot angka barang-barang na asing na sian tumbaga sipakeon di paribadatan. Angka barang sere dohot perak, masuk ma disi angka mangkuk, dalihan, angka sambong inganan ni mudar ni pahan-pahanan na disambol baen haul, inganan ni sirabun, pat ni parlampuan, angka sambong panutungan ni dupa dohot angka mangkuk pangusean ni haul aek ni anggur.

²⁰ Angka barang na sian tumbaga na nibaen ni Raja Salomo di Bagas Ni Tuhan, i ma tiang sidua-dua, kareta-kareta, bak dohot lombu na dua bolas i na manuhuk bak i, hara ni dokdokna gabe nada tartimbang be.

^21-22 Sarupa do tiang na sian tumbaga i dua-duana; salapan meter be gincatna, tingkona humaliang 5,3 meter jana rumar do di tonga-tonga. Hapal ni tumbagana i 75 sentimeter. Di ginjang ni tiang i adong do uluna 2,2 meter gincatna. Adong do songon na dibayu humaliang ulu ni tiang i dohot hiasan batu ni dalimo, laing sian tumbaga do i sudena.

²³ Batu ni dalimo na di bayu-bayuan i, i ma na di ulu ni tiang i adong do saratus, tapi hum sambilan pulu onom do na haidaan sian toru.

Dioban halak Juda tu Babel

²⁴ Tamba ni i ditangkup si Nebusaradan do Malim Godang Seraya, si Zefanya malim pangurupi, tolu halak panjago pintu ni Bagas Ni Tuhan,

²⁵ panuturi ni raja i na pitu halak na laing tading di kota i, panglima, wakil panglima na mangurus surat-surat ni tentara, dohot onom pulu halak nari angka halak na godang-godang.

²⁶ Dioban ia ma sude halahi tu Raja Nebukadnesar di kota Ribla,

²⁷ na di tano Hamat. Diparkanciti ma halahi disi lalu dibunu. Songon i ma dioban halak Juda i sian tano ni halahi lalu tu habuangan;

^28-30 4.600 halak sudena. Marombas-ombas do halahi dioban si Nebukadnesar: 3.023 halak ma di taon papituhon dung mangarajai ia, 832 halak sian Jerusalem di taon pasalapan bolaskon dung raja ia, jana 745 halak na nioban ni si Nebusaradan di taon padua pulu toluhon dung mamarenta si Nebukadnesar.

³¹ Di tanggal dua pulu lima bulan dua bolas taon patolu pulu pituhon dung dioban si Joyakin tu habuangan, si Merodak ma na gabe raja di Babel, laing di bagasan taon i dipatuduhon ia ma ibo ni rohania tu si Joyakin, jana dipalua ia ma si Joyakin sian hurungan,

³² jana denggan dibaensa tusia. Dilehen ia ma pangkat na gumincat di si Joyakin martimbangkon angka raja na asing i na dohot tarbuang tu Babel.

^33-34 Nada be mamake pakean sitarapan ia, jana somalna mangan di bagas godang do ia jana dilehen do hepeng disia baen haporluan ni ngolunia.