JEREMIA 51 - BIBEL JAMITA NA DENGGAN

Uhuman na asing tu Babel

¹ Didok Tuhan, “TongosonKu ma alogo panyego-nyego na mangombus adop Babel dohot adop halak na maringanan disi.

² Giot suruonKu angka halak na asing na giot mangaroncohon Babel songon alogo na manghabangkon guapak. Di ari hamamago i serangon ni halahi ma luat i sian sude haroroan jana ias paiasonna.

³ Ulang ma lehen hamu hatiha tu tentarana i laho manembakkon anak ni siorna sanga mamake pakean porangna. Ulang padiar hamu angka doli-dolina i mangolu. Abisi hamu sude tentarana i!

⁴ Banga be ma bugang ni halahi jana marmatean ma i di angka dalan na di kota ni halahi.

⁵ Au Debata, Tuhan Na Markuaso, Debata Na Badia ni Israel, nada tadingkononKu Israel dohot Juda haru pe na dung mardosa halahi tu Au.

⁶ Palua ma dirimu! Lojongi ma sian Babel ulang jabat dohot hamu hona bunu hara ni dosana! Na mambaloskon hajahatan ni Babel do Au on dohot manguhumisa hombar tu pambaenanna.

⁷ Tudos do Babel dohot piala sian sere na Hutiop jana na mambaen mabuk sude portibi on. Marminuman angka bangso sian panginuman i lopus rintik be halahi.

⁸ Tompu ma madabu Babel lalu sarge. Tangisi hamu ma i, jana jalahi hamu ma ubat tu angka gasana i, betak na ra dope malum.

⁹ Marsipandohonan ma halak sileban na maringanan disi na sada tu donganna, ‘Madung hita usahahon mangurupi Babel, hape nada tolap hita! Gumonan noma morot hita sian luat on jana marmulahan be ma hita tutanonta be. Na niuhum ni Tuhan do Babel sagogona, jana dironcohon Ia sudena.’ ”

¹⁰ Didok bangso ni Tuhan i ma, “Madung dipatuduhon Tuhan bahaso di pihak na tutu do hita. Beta ma hita tu Jerusalem jana tapaboa ma disi sandok na nibaen ni Tuhan Debatanta i.”

¹¹ Madung dijajang Tuhan angka raja na sian Media, hara ni na giot roncohononNia Babel. Songon i ma dalanna dibaen Ia laho mamalos parbuatan ni angka jolma na mangaroncohon bagasNia i. Didok komandan ni parangan parporang i ma, “Patajom be anak ni pana! Parade parince!

¹² Lehen ma tanda laho manyerang angka tembok ni Babel. Pagomos panjago. Baen pangawal. Markobas ma mambulutkon!” Madung didalankon Tuhan sanga aha na disangkaphonNia maradopkon Babel.

¹³ Na kayo do luat i jana bahat batang aekna, tapi madung abis hatiha ni ngoluna; madung dapot ujung ni ngoluna.

¹⁴ Marsumpa do Tuhan Na Markuaso i mangasahon goarNa sandiri bahaso na giot tongosonNia jolma sabahat ni siapor laho manyerang Babel jana marsurak ma halahi manyurakkon hamonangan.

Ende puji-pujian tu Debata

¹⁵ Ditompa Tuhan do portibi on marhite kuasoNia, marhite hapistaranNia digana Ia portibi. Dipahembang Ia tano on marhite akalNia.

¹⁶ Hum parenta do dilehen Ia, mardorom ma aek di awang-awang sian ujung ni tano on marroan angka ombun dibaen Ia. Dibaen Ia mamincar porkas di bagasan udan, ditongos Ia alogo sian panyimpananna.

¹⁷ Marnida sudena i gabe mamboto ma jolma, na oto do Ia hape jana na so adong astuanna. Nada marbohi be angka halak na mambaen patung, angke na pargabus do na nibaennia i jana na so marhosa.

¹⁸ Nada mararga angka gana-ganaan, patut do niincahan jana nilayasan. Muda dapot di hatihana, mago muse ma halahi sudena.

¹⁹ Anggo Debata ni si Jakob nada songon gana-ganaan i; Ia do na manompa sasudena. Tuhan Na Markuaso i do goarNia; ditodo Ia do Israel gabe bangsoNa.

Songon potuk-potuk do Babel

²⁰ Didok Tuhan ma, “O Babel, na songon potuk-potuk do ho, sinjatangKu laho marporang. Hupake do ho laho manghantam angka bangso dohot angka harajaan.

²¹ Hupake do ho laho mangaropuk kudo dohot na manenggetsa, maradu kareta dohot na marobansa.

²² Hupake do ho laho mambunu halaklahi dohot dadaboru, na matobang bope na poso, bujing-bujing dohot doli-doli.

²³ Hupake do ho laho mangabisi parmahan dohot pahan-pahananna, partani dohot lombu pangaloncana, parkuaso dohot halak na godang di tonga-tonga ni bangso.”

Uhuman tu Babel

²⁴ Didok Tuhan ma, “Ligi sandiri ma sanga na bia Hubaen mambaloskon tu Babel dohot halak na disi, sandok hajahatan na nibaen ni halahi maradopkon Jerusalem.

²⁵ O ale Babel, tudos tu dolok do ho na mangaroncohon sude portibi on. Tapi Au Tuhan giot mangalo ho. TarihonKu ma ho jana Hupabalik jana Hupadiar puntung gabe tiranggong.

²⁶ Nada adong sada batu pe sian rumpak-rumpakmu na tarpake be laho mambangun. Gabe tarsongon padang halongonan noma ho sapanjangna. Au Tuhan, madung mandok songon i.”

²⁷ “O ale raja na sian Utara! Lehen ma tanda laho manyerang! Palu ma sarune anso dibege angka bangso! Arahon ma angka bangso laho marporang mangalo Babel! Suruhon ma harajaan Ararat, Mini dohot Askenas manyerang. Angkat ma sada halak ulubalang laho manguluhon porang i. Oban ma kudona sabahat ni siapor.

²⁸ Parade ma angka bangso laho marporang mangalo Babel. Piohon angka raja ni Media dohot angka pamimpin maradu angka pagawena, dohot tentara sian sude luat na nirajaan ni halahi.

²⁹ Humutur jana manggulsak ma tano hara ni na Hudalankon sangkapKu laho mambaen Babel gabe inganan na harsang na so diingani jolma.

³⁰ Madung maradian tentara ni Babel marporang jana di angka benteng noma halahi tinggal. Ma pola mago habaranion ni halahi jana nada be margogo. Madung hona onjar angka pintu ni horbangan, jana disurbui angka bagas.

³¹ Marlojongi angka suruan marsijolo-joloanan laho paboahon tu raja ni Babel, bahaso na dung hona serbu kotania i sian sude haroroan.

³² Inganan panyiborangan pe madung diingani musu, jana angka benteng partahanan disurbui. Golap be roha ni tentara ni Babel.

³³ Nada pola sadia honok nari taluhononna ma halahi jana didege-dege musuna songon gandum di inganan pardegean. Au Tuhan Na Markuaso, Debata ni Israel, madung mandok songon i.”

³⁴ Dironcohon jana dipangan raja ni Babel do sude Jerusalem ias dihais ia kota i lopus songon botol na rumar. Tarsongon sada binatang raksasa, dibondut ia do Jerusalem jana manggohi butuhana dohot sandok na denggan di kota i, lalu diambungkon ia teba-tebana i.

³⁵ Dokkon ma, ale halak na maringanan di Sion, “Sai dituntut Tuhan ma nian Babel hara ni hakejamonnia maradopkon hita!” Dokkon ma ale Jerusalem, “Sai dituntut Tuhan ma nian Babel hara ni parkancitan na hita taon!”

Giot urupan ni Tuhan noma Israel

³⁶ Hara ni i didokkon Tuhan ma tu halak Jerusalem, “ParjuangkononKu do parkaromu jana uhumanKu angka musumu hara ni pambaenan ni halahi tu hamu. PahiangonKu ma angka mual ni aek dohot angka batang aek ni Babel.

³⁷ Timbunan ni na marsegoan noma luat i, inganan partabunian ni anjing riar. Jorbut hilalaon ni halak marnidasa jana sahalak pe nada adong na ra maringanan disi.

³⁸ Marngaur ma halak Babel songon singa, jana mangorong songon anak ni singa.

³⁹ Di na manggogo roha ni halahi giot mangan, pasingkoponKu ma sipanganon di halahi, jana baenonKu ma halahi mabuk jana ribur lopus tarpodom jana nada tarsunggul-tarsunggul be.

⁴⁰ ObanonKu ma halahi songon anak ni biri-biri, hambeng dohot biri-biri jantan na giot sambolon. Au Tuhan madung mandok songon i.”

Bagian ni Babel

⁴¹ Didok Tuhan ma, “Madung talu Babel na tarpuji i di sandok portibi on! Jorbut ma da luat i di angka bangso.

⁴² Mangalantap ma aek ni laut tu Babel; gumadobur angka galumbangna i mangalingkup luat i.

⁴³ Gabe inganan na jorbut noma angka kotana, tudos tu padang halongonan na harsang. Nada adong halak na ra maringanan sanga mamolus disi.

⁴⁴ Bel, debata ni tano Babel, giot uhumonKu. Giot baenonKu paulahonnia sanga aha na nirampasnia. Nada be sombaon ni angka bangso ia. Madung marumpak angka tembok ni Babel.

⁴⁵ Hara ni i, lojongi hamu ma sian i, ale halak Israel! Palua hamu ma dirimunu maradopkon muruk ni rohangKu na dung gilap.

⁴⁶ Ulang hamu mabiar sanga sak rohamunu hara ni angka barita na so tutu na nibegemunu. Ganop taon sai sar do barita na paasing-asing taringot tu hakejamon na masa di bagasan luat dohot taringot tu angka raja-raja na sai maralo.

⁴⁷ Pos ma rohamunu, dapot do i hatihana uhumanKu angka gana-ganaan ni Babel. Sude luat i marlayas, jana sandok halak na disi hona bunu.

⁴⁸ Sandok na adong di langit dohot di tano on marsurak-surak ma marmoga-moga muda dung madabu Babel tu tangan ni bangso na sian Utara i na ro mangaroncohonsa.

⁴⁹ Babel do boncir ni hamatean ni angka jolma di tano on sudena, hape madabu noma ia saonnari, hara ni na dung mambaen boncir hamamate ni bahat halak Israel. Au Tuhan, madung mandok songon i.”

Tona ni Tuhan tu halak Israel di Babel

⁵⁰ Didok Tuhan ma tu halak Israel di Babel, “Madung malua hamu sian pamunuon! Jadi, kehe ma hamu saonnari! Ulang be painte hamu! Haru pe dao hamu sian bagas, ingot hamu tu Au Tuhanmunu dohot tu Jerusalem.

⁵¹ Didok hamu do, ‘Dilayasi do hami jana dipaila, nada marbohi hara ni na nijuguhan ni angka halak sileban inganan na badia di bagasan Bagas Ni Tuhan.’

⁵² Antong parrohahon hamu ma na Hudokkon on. Ro do i hatihana, uhumanKu angka gana-ganaan ni Babel; tarbege ma di sude luat i pangangguk ni jolma na margasa banga.

⁵³ Haru pe tarbaen Babel mandangkit tu langit jana mambaen partahanan na gogo disi, angkon laing suruonKu do halak laho manyegohon i. Au Tuhan, madung mandok songon i.”

Udut ni hasesego ni Babel

⁵⁴ Didok Tuhan ma, “Tangihon ma! Tangis do halak di Babel hara ni hasegoan na masa di luat i.

⁵⁵ Husarsarkon Babel jana Huhuntam. Parro ni musuna pe songon galumbang na gumadobur, jana mangaroro ma i mardongan sora ni panggora ni porang.

⁵⁶ Ro do halahi laho manyegohon Babel, manangkupi angka tentarana lalu manipul-nipul angka sinjatana. Au ma da Tuhan na manguhumi hajahatan jana baenonKu ma tu Babel hombar tu pambaenanna.

⁵⁷ BaenonKu ma mabuk angka parkuaso ni Babel – angka hatobangon, pamimpin, dohot tentara, lopus tarpodom halahi salolot-lolotna. Madung Hudok hatana; Au ma da Raja, Au do Tuhan Na Markuaso.

⁵⁸ Giot pahornoponKu tu tano tembok ni Babel na togu i. Angka pintu ni horbanganna na timbo-timbo i surbuonKu noma i. Nada adong gunana usaho ni angka bangso, angke panganon ni api do karejo ni halahi i. Au Tuhan Na Markuaso madung mandok songon i.”

Dipalalu tona ni si Jeremia tu Babel

⁵⁹ Si Seraya anak ni si Neria, pahompu ni si Mahseya do pangawal ni Raja Zedekia. Di taon paopatkon dung gabe raja si Zedekia di Juda, diihutkon si Seraya ma si Zedekia tu Babel. Jadi hulehen ma tusia sada karejo.

⁶⁰ Sude parmaraan na giot mandondoni Babel, dohot angka pangalaho na asing taringot tu luat i, madung husuratkon di sada buku.

⁶¹ Dung i hudok ma tu si Seraya, “Muda dung lalu ho di Babel, usahahon ma anso tarsise ho sude na tarsurat di bagasan buku on tu angka halak na disi.

⁶² Dung salpu i martangiang ma ho songon on, ‘Tuhan, madung didokkon Ho, anggo inganan on na giot sarsarkononMu do lopus mago sude jolma bope pahan-pahanan, jana gabe songon padang halongonan inganan on sapanjangna.’

⁶³ Antong, dung sidung disise Ho buku on tu angka jolma i, tambatkon ma batu tu buku on jana ambungkon ma tu tonga-tonga ni Batang aek Efrat,

⁶⁴ lalu dok ma hatana, ‘Songon on ma na giot tarjadi tu Babel. Bonom ma luat on jana nada mulgap be hara ni parmaraan na nitimpalkon ni Tuhan tusi. Olat ni on ma hata ni si Jeremia.’ ”