JEREMIA 49 - BIBEL JAMITA NA DENGGAN

Uhuman tu Amon

¹ On ma na nidok ni Tuhan taringot tu Amon, “Biasi tano ni Marga Gad dirampas jana diingani angka jolma na mamele Debata Milkom? Adong he ulaning na soada be halak Israel na margogo laho mangondihon luat i?

² Tapi dapot do i hatihana baenonKu halak na mangingani Raba, kota sabungan ni Luat Amon i, umbege surak-surak ni parporangan. Gabe tading sego-segona noma kota i jana angka huta pagaran na humaliang i pe abis masurbu. Dung i buaton ni halak Israel ma mangulahi tanona i sian angka jolma na mangarampassa na salpu i.

³ Hamu ale halak Hesbon, tangis ma hamu dibaen madung maronco kota Ai! Hamu angka dadaboru na sian kota Raba, mangandungi ma hamu! Marabit goni ma hamu tanda ni siluluton. Marlojongi ma hamu pahae-pahulu gok ponjot ni roha. Obanon noma Milkom debatamunu i tu habuangan rap dohot angka malim dohot angka pamimpinna.

⁴ Biasi manggodang diri hamu ale angka na so bonar? Bia ma he dalanna pangasahononmunu gogomunu na dung murak i? Bia ma he umbaen na puluk hamu mandok, sahalak pe nada adong na barani mangaroro hamu?

⁵ Tondongon ni hakejamon ma hamu na Huparo sian sude pihak. Marlojong ma hamu, marsipalua dirina be, jana nada adong be na palagutkon hamu mangulahi.

⁶ Tapi di pudian ni ari pasuangonKu do pangalaho ni bangso Amon. Au Tuhan, madung mandok songon i.”

Uhuman tu Edom

⁷ On ma na nidok ni Tuhan Na Markuaso salaho tu Amon, “Adong he na so tarbaen halak Edom be marpikir torang? Adong he na so dilehen angka panuturi ni halahi be sipaingot tu halahi?

⁸ Hamu ale halak Dedan, marbalik ma hamu lalu maporus! Kehe ma hamu martabuni. PatimpasonKu ma pomparan ni si Esau, dibaen madung dapot hatihana giot uhumanKu halahi.

⁹ Muda mamutik anggur halak, sai adong do i na dipasisinia, jana muda ro panangko borngin-borngin, hum por ni rohania do dibuat ia.

¹⁰ Tapi anggo Au, madung ias Huhais sinadongan ni pomparan ni si Esau jana Hubuka rahasia parsimonjapan ni halahi; nada tarbaen halahi be marsibuni. Madung diabiskon mate sude halak Edom, sahalak pe nada adong na malua.

¹¹ O hamu Edom! Tadingkon hamu ma di Au angka dakdanakmunu na so marama so marina. Au ma na pature-ture halahi. Tarbaen angka na mabalumunu do marsigantung tu Au.

¹² Halak na so patut niuhum pe laing hona uhum do, mur hamu ma hape? Musti hona uhum hamu!

¹³ Husumpahon mangasahon goarKu sandiri, anggo kota Bosra gabe inganan na jorbut noma i na nitadingkon ni halak. Partataan ni halak ma i jana baenonna goarna i gabe bura. Sude angka huta na menek na humaliang i gabe tinggal sego-segona noma i sapanjangna. Au Tuhan, madung mandok songon i.”

¹⁴ Au si Jeremia, hudok ma, “Ale Edom, madung hujagit sada barita sian Tuhan. Madung disuru utusan tu angka bangso laho marsuru halahi palagutkon tentara lalu marhobas laho mamorangi ho.

¹⁵ Baenon ni Tuhan ma ho gale jana incahan ni halak.

¹⁶ Hona tipu ma ho baenon ni gakgakmu. Nada adong na mabiar mida ho songon na niambang ni rohamu. Maringanan di rigang ni batu ma ho, dao di puncut ni dolok an; tapi haru dibaen ho pe bagasmu di inganan na gincat situtu, sagincat ni asar ni unggas rajawali, paijuron ni Tuhan do ho sian i. Tuhan do mandokkon i sudena.”

¹⁷ Didok Tuhan, “Hara ni godangna parmaraan na mandondoni Edom, jabat do gabe tarsonggot ganop halak na mamolus sian i jana mabiar.

¹⁸ Songon Sodom dohot Gomora na dironcohon rap dohot angka huta na humaliangna i, laing songon i muse ma Edom, sahalak pe nada adong be maringanan disi. Au Tuhan, madung Hudok songon i.

¹⁹ Songon singa na muldop sian harangan godang di lambung ni Batang aek Jordan, jana na ro mandapotkon padang panjampalan ni biri-biri, songon i ma Au giot ro jana mambaen marlojongi halak Edom sian tano ni halahi tompu. Dung i todoonKu ma sada halak pamimpin laho mamarenta luat i. Ise ma he na tarpatudos tu Au? Ise he puluk mangalo Au? Adong dehe lakna pamimpin na puluk mangalo Au?

²⁰ Hara ni i, tangihon ma sanga aha na Husangkaphon maradopkon halak Edom, dohot na giot baenonKu tu kota Teman. Angka dakdanak ni halahi pe saratonna do kehe, jana mabiar be ma halak sudena.

²¹ Muda dung madabu Edom, tarbege ma hagaoron na tarlobi jabat humutur tano on sudena; pangarar ni halak na manginganisa habegean lalu tu Laut Teberau.

²² Songon halihi na habang, songon i ma panyoro ni musu i tu Bosra. Di ari i, mangae ma tentara ni Edom songon dadaboru na giot hipas.”

Uhuman tu Damaskus

²³ On ma na nidok ni Tuhan salaho tu Damaskus, “Sak be roha ni halak Hamat dohot Arpad jana busisa hara ni na umbege barita na jat. Marsak be roha ni halahi jana dumaol-daol songon ombak ni laut.

²⁴ Gabe gale halak na maringanan di Damaskus jana marlojongi hara ni biarna. Hancitan halahi jana mardangol songon dadaboru na giot hipas.

²⁵ Kota na bonggal jana na gok jop ni roha i, saonnari gabe mamolngit nada adong na mangingani.

²⁶ Marmatean ma di ari i angka doli-doli ni halahi di dalan-dalan i jana sude tentarana hona bunu.

²⁷ Husurbu angka tembok ni Damaskus jana angka bagas godang ni Raja Benhadad Hubaen gabe tiranggong. Au Tuhan Na Markuaso, mandok songon i.”

Uhuman tu halak Kedar dohot Hasor

²⁸ On ma na nidok ni Tuhan taringot tu Marga Kedar dohot angka luat na nirajaan ni Hasor, na dung nirampas ni si Nebukadnesar raja ni Babel, “O ale Nebukadnesar, porangi ma Marga Kedar, jana abiskon angka jolma na di Habincaran!

²⁹ Rampas ma angka pahan-pahanan, biri-biri, unto maradu angka undung-undung ni halahi dohot isina sudena, jana marsurak ma hamu tu halahi, ‘Ogor-ogor noma na mangarajai hamu!’

³⁰ O hamu halak Hasor! Au Tuhan mandok: Ompoti hamu ma kehe mangungsi dohot martabuni. Madung martahi si Nebukadnesar raja ni Babel laho manyaroso hamu. Didok ia,

³¹ ‘Beta ma maju! Tole ma taroro angka jolma na mandok aman dirina jana sonang. Nada adong ambat-ambat ni kota ni halahi, angke nada adong horbanganna jana goruk-gorukna pe nada adong.’ ”

³² Didok Tuhan muse dope tu si Nebukadnesar, “Rampasi ma angka unto dohot pahan-pahanan ni halahi! PaserahonKu ma sun tu dia angka jolma na marpangkas pendek i. ParoonKu noma parmaraan godang tu halahi sian sude.

³³ BuangonKu noma Hasor salolot-lolotna, jana gabe inganan partabunian ni anjing riar. Sahalak pe nada adong be maringanan disi. Au Tuhan, madung mandok songon i.”

Uhuman tu Elam

³⁴ Nada sadia honok dung gabe raja si Zedekia di Juda, mangkuling ma Tuhan Na Markuaso i tu Au taringot tu tano Elam.

³⁵ Pandok ni Tuhan, “Satutuna tipulkononKu ma Sior ni Elam, i ma hagogoon ni halahi.

³⁶ OmbuskononKu ma alogo tu Elam sian sasudena, jana paserahonKu halakna i sun tu dia lopus sada harajaan pe nada adong be na so ditopot angka pangungsi na sian Elam i.

³⁷ BaenonKu halak Elam i gabe mabiar mida musuna na giot mamatehon halahi. Gilap Huhilala tu halahi jana giot ropuhonKu halahi. Na giot tongosonKu ma tentara na mamorangi halahi lopus abis sudena.

³⁸ Gete-geteonKu ma angka raja-raja dohot angka pamimpin ni halahi jana giot pajongjongonKu habangsangKu di tano ni halahi.

³⁹ Tapi di pudian ni ari pasuangonKu do mangulahi pangalaho ni halahi. Au Tuhan, madung mandok songon i.”