JEREMIA 48 - BIBEL JAMITA NA DENGGAN

Taringot tu Moab

¹ On ma na nidok ni Tuhan Na Markuaso i, Debata ni Israel taringot tu Moab, “Marjaya ma halak Nebo, madung marumpak kotana i. Dirampas do Kiryataim jana dironcohon bentengna i, gabe maila ma antong halak na maringanan disi,

² dibaen madung mago na nihagodanghon ni Moab. Madung ditaluhon musu i Hesbon jana disangkapkon do laho mangabiskon sandok bangso Moab. Di kota Madmen nada adong be habegean sora ni halak na manghatai, dibaen madung diporangi tentara kota i.

³ Tangihon ma! Marsurak do halak Horonaim, ‘Hagaoron! Hasesego!’

⁴ Madung abis Moab! Tarbege do angguk ni halak na disi lalu tu Zoar.

⁵ Bege ma sora ni halak na tangis di panangkohan tu Luhit, dohot di dalan panuatan tu Horonaim.

⁶ Didok halahi, ‘Ompoti! Palua hosamu! Lojongi songon halode riar di halongonan!’

⁷ Moab! Dipangasahon ho ma hagogoan dohot sinadonganmu. Hape anggo saonnari taluhonon noma ho. Obanon ma tu habuangan i ma Kamos debatami rap dohot angka malimna maradu angka na mora-mora.

⁸ Maronco ma sude kota, sada pe nada adong na malua. Abis ma sude rura dohot napa. Au Tuhan, madung mandok songon i.

⁹ Lehen ma habong tu Moab anso kehe ia habang; angka kotana angkon gabe lobu, nada adong na manginganisa.”

¹⁰ Hona bura ma sanga ise na so patuluskon karejo na sian Tuhan sian situtu ni rohana. Hona bura ma i na so manyintak podangna lalu mambunu.

Dironcohon angka kota ni Moab

¹¹ Pandok ni Tuhan, “Sian najolo aman do Moab. Na so unjung dope i dioban tu habuangan. Songon aek ni anggur do ia na dipadiar mindo, jana na so jungada diusehon tu inganan na asing. Laing matua huskus anggurna i jana tabo.

¹² Saonnari madung dapot hatihana Au marsuru anso diusehon halak Moab songon anggur, jana angka ingananna i diparumar lalu ditaporkon.

¹³ Tarhirim ma Moab maradopkon Kamos debata ni halahi i, tudos songon Israel na tarhirim i maradopkon Betel na nipangasahon ni halahi i.

¹⁴ Biasi didokkon halaklahi ni Moab, ‘Na gogo do hami, tentara na barani na dung tammat di bagasan parporangan?’

¹⁵ Madung pola disarsarkon Moab dohot angka kotana, jana angka doli-dolina na tumongam madung hona bunu. Madung Hudok songon i, Au do Raja, Tuhan Na Markuaso.

¹⁶ Madung singgip parmaraan godang tu Moab, nada sadia honok nari sego ma i.

¹⁷ Hamu angka harajaan torbing balok ni Moab na umboto habonggalonna, marsiluluton ma hamu hara ni ia! Dok hamu ma, ‘Nada markuaso be Moab, madung mago hagodangan dohot hagogoannia!’

¹⁸ Hamu halak Dibon, mijur ma hamu sian inganmunu na sangap i, di tano i ma hamu juguk dohot di abuan i. Dibaen madung lalu na manyegohon tanomunu Moab, jana roncohononna noma bentengmu sudena.

¹⁹ Hamu angka na maringanan di Aroer, marjongjongan ma hamu di topi dalan jana parrohahon ma. Sapai hamu ma tu angka na kehe palua dirina, ‘Aha dehe na masa?’

²⁰ Alusan ni halahi ma, ‘Madung madabu Moab jana gabe marlayas, hara ni i tangisi hamu ma da ia. Pabotohon ma sapanjang Batang aek Arnon paboa na dung maropuk Moab.’ ”

²¹ “Madung didabu uhuman di angka kota na di luat ni napa na gincat: Tu Holon, Jahas, Mefaat.

²² Dibon, Nebo, Bet-Diblataim,

²³ Kiryataim, Bet-Gamul, Bet-Meon,

²⁴ Keriot dohot Bosra. Sude angka kota ni Moab na donok dohot na dao madung hona uhum.

²⁵ Madung diripukkon gogo ni Moab, jana disargehon kuasona. Au Tuhan, madung mandok songon i.”

Patoruhon noma Moab

²⁶ Didok Tuhan ma, “Baen ma Moab gabe mabuk, hara ni na mangalo ia tu Au. Margiling-giling ma ia di uta-utania i jana partataan ni halak.

²⁷ Nada he Moab do najolo na mampartatai halak Israel dohot na pailahon halahi songon dia ma rupani panangko na tardapot halahi?

²⁸ Hamu halak Moab, tadingkon hamu ma angka kotamunu jana maringanan di angka dolok batu ma hamu songon unggas darapati na mambaen asarna di sapsap bire.

²⁹ Ginjang ni rohamunu antong santak! Madung hubege do sanga songon dia bulbul, ginjang ni roha, gakgak dohot tealmunu!

³⁰ Au Tuhan, Huboto do bulbulmunu. Rumar sajo do hatamunu jana pambaenanmunu nada marastuan.

³¹ Patunda ni i tangisanku noma ganop be sian hamu, tangisanku noma angka halak na di Kirheres, kota hagodanganmunu i.

³² Tangisanku ma lumobi halak na di Sibma, umpado halak Jaeser. Tudos do kota Sibma tu suan-suanan anggur na manjurur dangkana lalu tu ipar ni Laut Hamatean lalu tu Jaeser. Hape anggo saonnari madung diradas angka parbatu na musim di logo ni ari dohot batu ni anggurna pe madung dirurus.

³³ Madung pola mago hamogaan dohot jop ni roha sian tano Moab na napu i. Au mambaen mantak aek ni anggur mardalan sian pangilangan ni anggur; nada adong be halak na pature anggur dohot na marsurahi marjop ni roha.

³⁴ Martangisan ma halak na di Hesbon dohot Eleale jana tarbege partangis ni halahi i lalu tu Jahas, jana habegean muse do tu angka jolma na sian Zoar lopus tu Horonaim dohot Eglat Selisia. Tangis halahi hara ni na mahiang muse aek di anak ni Batang aek Nimrim.

³⁵ Giot antahonKu halak Moab manutung haul di angka inganan pamelean ni halahi jana antahonKu halahi mamelehon haul tu angka debata ni halahi. Au Tuhan, madung, mandok songon i.

³⁶ Ma pola mago sude hakayoan ni Kirheres dohot Moab sudena. Dangol huhilala marnida na masa i tu halahi; songon halak na mangendehon ende andung au marhite suling.

³⁷ Madung dicukur halahi sudena obuk na di ulu ni halahi dohot janggutna, tanganna dihoroti, jana mamake abit goni tanda ni arsakna.

³⁸ Di ginjang ni sude bungkulan ni bagas dohot di angka tano lapang sora ni na tangis noma na tarbege. Angke madung Hutaporkon Moab songon hudon tano na so marguna.

³⁹ Masarsar Moab, jana tangis hara ni ila ni rohana. Mabiar do Moab, jana nada margeldok lopus gabe sipartataan ni angka bangso. Au Tuhan, madung mandok songon i.”

Nada adong be haluaan ni Moab

⁴⁰ Didok Tuhan ma, “Songon halihi na habang, tudos tusi ma sada bangso giot ro manyoro Moab.

⁴¹ Rampasonna ma angka kota dohot angka bentengna, jana mabiar ma tentarana i songon ina na giot di api.

⁴² Maronco noma Moab jana nada be tardok margoar sada bangso, patunda ni na mangalo halahi tu Au.

⁴³ Dipaadop ma halahi tu ogor-ogor, lubang dohot jorat Tuhan do na dung mandok i.

⁴⁴ Halak na malua sian ogor-ogor madabu ma i tu bagasan lubang, jana halak na haruar sian lubang i, alit muse ma i baenon ni jorat. Tarjadi do sudena i hara ni na dung Hutontuhon hatihana laho mangaroncohon Moab.

⁴⁵ Angka bagian pangungsi na so margogo be, kehe ma tu Hesbon manjalahi parlindungan, tu kota na jungada diparenta Raja Sihon. Hape topet do gor kota i. Ma pola dipangan api i lalu tu batas dohot tu partoran Moab, i ma luat ni halak na tagi marporang.

⁴⁶ Marjaya ma Moab! Halak na manginganisa na marsomba tu Debata Kamos ditimpaskon, jana angka dakdanak ni halahi madung ditaban jana dioban.

⁴⁷ Tapi di pudian ni ari, pasuangon ni Tuhan do pangalaho ni Luat Moab i.” I ma na nidok ni Tuhan taringot tu na giot masa tu Moab.