JEREMIA 46 - BIBEL JAMITA NA DENGGAN

Talu Mesir di Karkemis

¹ Mangkuling ma Tuhan tu au taringot tu angka bangso-bangso,

² mamungka sian Mesir. Songon on ma pandokna taringot tu tentara ni si Nekho raja ni Mesir na talu di Karkemis donok tu Batang aek Efrat dibaen si Nebukadnesar raja ni Babel di taon paopatkon mamarenta si Joyakim anak ni si Josia gabe raja di Juda,

³ “Marsurak ma angka perwira ni Mesir, ‘Buat ma angka parince, kehe ma ho tu parporangan!

⁴ Pasang ma palano ni kudo jana juguhima! Marsibuat ingananna ma jana dipake ma kupia baja! Garut ma hujurmu! Pake ma baju bosi!’ ”

⁵ Tapi bia do ninna Tuhan! “Munduk do halahi Huida hara ni na tarsonggot. Madung dipukul mundur angka tentara ni halahi, biar sajo roha ni halahi, gabe mangido halahi jana nada manaili tu pudi.

⁶ Angka tentara na lobassa hipas marlojong, nada tolapsa maporus sian musu. Tartuktuk do halahi jana tinggang di Utara, di topi ni Batang aek Efrat i.

⁷ Ise dehe i na manaek songon aek ni Batang aek Nil, na songon batang aek na mangunongi topi-topina?

⁸ I ma da Mesir. Didok ia, ‘Jongjong noma au jana rajaanku portibi on. Roncohononku angka kota maradu pangisina.

⁹ Marpacu ma da, angka kudo! Mardalan ma da angka kareta! Maju ma da angka na gogo sian Sudan. Songon i dohot sitiop parince na sian Libia dohot panyior na malo na sian Lidia.’ ”

¹⁰ On ma ari ni Tuhan Debata Na Markuaso i; anggo di ari on mambaen pamaloson ma Tuhan Debata Na Markuaso i tu sude angka musuNia. Panganon ni podangNia ma halahi lopus butong, jana inumonna mudar ni halahi lopus sombu. Di ari on disambol ma angka haul di Utara di topi ni Batang aek Efrat i.

¹¹ Hamu ale angka halak na maringanan di Mesir, nada margogo sude angka ubatmunu i laho pamalumkon hamu. Jadi hara ni i, kehe ma hamu manjalahi ubat tu Gilead!

¹² Na dung tarboto do tu sandok bangso hahaila na tarjadi di hamu. Tarbege do sora ni pangararmunu tu sude portibi on. Martondong do tentara na sada tu donganna jana gabe rap tungkap halahi tu tano.

Haroro ni si Nebukadnesar

¹³ Di na ro si Nebukadnesar raja ni Babel mamorangi Mesir, mangkuling ma Tuhan tu au, didok Ia,

¹⁴ “Di angka kota ni Mesir, i ma di Memphis, Migdol dohot di Tahpanhes, pabotohon ma barita on, ‘Markobas ma hamu laho martahan, angke sude sinadonganmunu abiskonon noma i di parporangan!

¹⁵ Biasi maporus Apis, debatamunu na gogo i? Nada he tolap lombu jantanmunu i dope martahan? Tutu do, madung ditaluhon Tuhan ia!’

¹⁶ Bahat tentaramunu tartuktuk lalu tinggang. Didok halahi do sama halahi, ‘Beta ma da mulak hita tu bangsonta anso laing malua hita sian podang ni musu i.’

¹⁷ Lehen ma goar na imbaru tu Mesir: ‘Si Gaor na so marhasayangkon ari-ari.’

¹⁸ Au do Tuhan Na Mangolu, Au do raja, Tuhan Na Markuaso. Songon Dolok Tabor na gumincat sian tonga-tonga ni angka dolok dohot Dolok Karmel na marsijongjong di ginjang ni sisik ni laut, songon i ma hagogoan ni na ro i mamorangi ho.

¹⁹ Marhobas be ma hamu angka halak Mesir anso ditaban jana dioban! Gabe lobu ma kota Memphis, inganan na lungun na so diingani.

²⁰ Songon anak ni lombu na mokmok do Mesir, tapi diganggu lanok na godang sian Utara.

²¹ Angke tentara na niongkosanna pe so adong geldokna; tudos tu anak ni lombu na mamokmoktu. Nada lobas halahi martahan. Marbalik be sude marsipalua dirina be. Madung dapot ari paruhuman tu halahi; madung dapot hatihana dondonan ni mara halahi.

²² Songon ulok na manjurur marlojongi Mesir mangaluahon dirina hara ni na dung mur donok tentara ni musu. Ditaba halahi ma Mesir songon na manaba hayu dohot pato,

²³ jana songon na mangarabi harangan godang lopus sae sude. Nada taretong bahat ni tentara ni musu i, umbahat sian siapor. Au Tuhan mandok.

²⁴ Pailaon noma halak Mesir hara ni na talu baenon ni halak na sian Utara.”

²⁵ Didok Tuhan Na Markuaso i, Debata ni Israel, “Uhumanku ma Amon, debata na sian Tebe, rap dohot Mesir sudena maradu angka debatana dohot raja-rajana. Raja ni Mesir dohot sude na mangasahon ia

²⁶ pasahatonKu ma i tu si Nebukadnesar raja ni Babel dohot tu tentarana na giot mamatehon halahi. Tapi inganan ni halak do Mesir muse songon di hatiha na salpu. Au Tuhan, madung mandok songon i.”

Giot paluaon ni Tuhan bangsoNia

²⁷ “Ale Israel bangsongKu, ulang humitir sanga mabiar hamu! PaluaonKu noma hamu sian luat na dao, disi ditaban hamu. Mulak noma hamu jana sonang maringanan di tanomunu. Mangolu ma hamu di bagasan sonang; nada adong be na porlu sihabiaran.

²⁸ Jadi ulang be hamu mabiar, ale bangsongKu, ro noma Au laho paluahon hamu. Giot timpaskononKu noma angka bangso ingananmunu Huparserak, tapi anggo tu hamu nada baenonKu songon i. Tutu nian anggo hara ni hasalaan na nibaenmunu angkon manjagit uhuman do hamu, tapi nada pola uhuman na mahancittu. Au Tuhan, madung mandok songon i.”