JEREMIA 44 - BIBEL JAMITA NA DENGGAN

Tona ni Tuhan di halak Israel na di Mesir

¹ Mangkuling ma Tuhan tu au taringot tu sude halak Israel na maringanan di Mesir, i ma na di kota Migdol, Tahpenhas, Memphis dohot di tano Patros.

² On ma tona ni Tuhan Na Markuaso i, Debata ni Israel tu halahi, “Madung diida hamu sandiri mara na Hutimpalkon tu Jerusalem dohot sandok kota na adong di Juda. Lopus saonnari laing tinggal sego-segona do angka kota i jana lobu.

³ Patunda ni dosa ni halak na maringanan di angka kota i do umbaen na muruk Au. Dipelehon halahi haul jana marsomba halahi tu angka debata na so unjung hian dope disomba halahi sandiri, bope hamu sanga ompungmunu.

⁴ Sai torus do marpupu Husuru naposongku angka panurirang, na mangorai hamu mambaen hajahatan na Huhagigihon i.

⁵ Hape nada ra hamu manangihon jana nada diterge hamu. Nada ra hamu mantak mambaen na jahat, i ma na mamele i tu angka debata.

⁶ Hara ni i duruskononKu ma rimasKu dohot hosom ni rohangKu tu angka kota ni Juda dohot tu angka dalan na di Jerusalem, surbuonKu sudena lopus gabe tiranggong jana mangornop songon na tarida saonnari on.

⁷ Jana di hatiha on, marsapa do Tuhan Na Markuaso i, Debata ni Israel sanga hara ni aha umbaen dipatupa hamu pangalaho na jahat sisongon i maradopkon dirimunu. Adong he na giot timpashononmunu sude jolma – halaklahi, dadaboru, angka dakdanak dohot na baru sorang – anso ulang adong be na teba sian bangsomunu?

⁸ Biasi sai mangalap-alapi hamu anso muruk Au? Ro hamu jana maringanan di Mesir on, lalu marsomba hamu tu gana-ganaan jana mamelehon haul tu angka debata ni luat on! Biasi ra hamu mangalapi hamamagomunu? Giotmunu ma he marlayas baenon ni bangso na satano on jana goarmunu pakeonna gabe bura?

⁹ Na dung lupa ma he hamu di sude hajahatan na tarjadi di tano Juda dohot di angka dalan na di Jerusalem na nibaen ni ompungmunu, na nibaen ni angka raja-raja ni Juda dohot angka dadaboru ni halahi, dohot hamu bope angka dadaborumunu?

¹⁰ Tapi lopus sadari on nada ra hamu paserep rohamunu. Nada dipasangap hamu Au jana pardalan ni ngolumunu nada mangihutkon TonaKu na Hulehen tu hamu dohot tu ompumunu.

¹¹ Jadi hara ni i, Au Tuhan Na Markuaso, Debata ni Israel, baenonKu ma hamu songon Juda jana patimpasonKu.

¹² Jana ampot adong sian halak Juda na teba i na sai marpor ni roha tu Mesir laho maringanan disi, gabe bunuonKu ma halahi. Sude halahi na menek na godang, mate ma di Mesir baenon ni porang sanga hara ni haleon potir. Gabe jorbut pangkilalaan ni halak mida halahi jana palayasonna halahi. Gabe goar bura ma baenon ni halak goar ni halahi.

¹³ Songon panguhumingKu tu Jerusalem, laing songon i ma uhumanKu halahi na maringanan di Mesir. Marmatean ma halahi baenon ni porang, hara ni haleon potir, sanga hara ni nyae masa.

¹⁴ Sian halak Juda na teba i na kehe tu Mesir laho maringanan disi, sahalak pe nada adong na malua sanga mangolu. Sahalak pe sian halahi nada adong be na mulak tu Juda, haru pe lungun sajo roha ni halahi. Tutu do nada adong be na mulak sian halahi asing ni na mangungsi piga-piga halak.”

¹⁵ Dung i marroan ma halak bahat sajo mandapotkon au, i ma angka ama-ama na mamboto dadaboruna kehe memelehon haul tu angka debata dohot sude dadaboru na marjongjongan disi, dohot ma disi halak Israel na maringanan di Mesir na di Selatan – didok halahi ma tu au,

¹⁶ “Nada ra hami manangihon sanga aha na nidokmu tu hami mangasahon goar ni Tuhan.

¹⁷ Sude na dung hami janjihon laing patulusonnami do i. Laing hot do hami manghaulkon haul tu Namora di Langit, dohot manduruskon anggur baen pelean disia songon na dung somal masa di angka kota ni Juda dohot di angka dalan na di Jerusalem, dipadalan angka ompunami, angka raja-raja dohot angka pamimpinnami maradu hami sandiri. Anggo di hatiha i tuk do panganonnami, sonang do hami jana nada adong na maol sanga na aha.

¹⁸ Tapi disi mantak hami manghaulkon haul tu Namora di Langit, jana nada be hami duruskon anggur songon pelean tusia, gabe marpogos ma hami, marmatean ma angka halaknami di porang sanga hara ni haleon potir.”

¹⁹ Dung i didok angka dadaboru i ma, “Tumbuk do di roha ni ama-amanami, hami baen roti na suman potonganna tu Namora di Langit dohot hami tutung haul sanga hami pelehon anggur tu angka debatanami i.”

²⁰ Tu sude halaklahi dohot dadaboru na songon i alusna, hudok ma,

²¹ “Adong he diambang hamu na so diboto Tuhan sanga na dung dihalupahon Ia angka haul na di pelehon di angka kota ni Juda dohot di angka dalan na di Jerusalem, na nibaen ni ompumunu, angka raja-raja dohot angka pamimpinmunu maradu rayat ni luat on dohot hamu sandiri?

²² Nada tahan be Tuhan paida-ida pangalaho dohot pambaenanmunu na jahat i; hara ni i do umbahen na gabe lobu tanomunu, nada adong na mangingani lopus sadari on.

²³ Tarjadi pe hamagoan si saonnari on tu hamu, hara ni na marsomba do hamu tu debata na asing jana mardosai hamu tu Debata. Nada dipatulus hamu tonaNa, aturanNa dohot na dung ditotopkon Ia, i do umbahen marhancit hamu songon si saonnari on.”

^24-25 Dung i hupaboa ma tu sude jolma i lumobi tu bagian dadaboru, na nidok ni Tuhan Na Markuaso i do songon on tu angka halak Juda na maringanan di Mesir, “Na dung marsumpa do hamu dohot angka dadaborumunu tu Namora di Langit mandok na giot manutung haul do hamu tusia dohot mamelehon anggur. Madung dipatulus hamu janjimunu i. Antong songon i noma i! Pambaeni hamu sajo ma sanga aha na nijanjihonmunu i!

²⁶ Tapi saonnari tangihon hamu ma sanga aha na Hudok tu hamu, ale halak Israel na di Mesir: Au Tuhan, Husumpahon mangasahon goarKu na godang i bahaso na so loasonKu hamu be mamake goarKu laho mambaen janji bagi aha. Nada tola dokkononmunu, ‘Marsumpa Au mangasahon Debata na mangolu i!’

²⁷ JalahanKu do dalan anso mago hamu jana nada marhasonangan lopus mate hamu sudena, bope di parporangan sanga pe hara ni nyae masa.

²⁸ Hum piga-piga halak sajo noma na giot malua jana mulak tu Juda sian Mesir. Jadi idaon ni halahi ma sanga hata ni halahi do na tarjadi sanga na hatangKu.

²⁹ ParoonKu ma jaya tu hamu di inganan on laho patandahon tu hamu paboa na tutu situtu do tarjadi uhuman na dung Husangkaphon tu hamu.

³⁰ Hupasahat ma si Hofra raja ni Mesir i tu angka musu na sai giot mamatehon ia, songon si Zedekia raja ni Juda i na Hupasahat tu si Nebukadnesar raja ni Babel i, musuna i na sai giot mamatehon ia.”