JEREMIA 42 - BIBEL JAMITA NA DENGGAN

Dipangido rayat anso ditangiangkon si Jeremia halahi

¹ Dung salpu i sude marroan ma halahi, na menek dohot na magodang, rap dohot angka parpangkat i, dohot ma disi si Johanan anak ni si Kareah dohot si Asarya anak ni si Hosaya,

² mandok tu au, “Na pasahatkon pangidoannami do hami tu ho! Tangiangkon ma hami tu Tuhan Debatamu. Tangiangkon ma hami na tading on. Bahat hian do hami nian; tapi saonnari hum saotik noma hami na tading, torang songon na niidamu.

³ Anggiat dipabotohon Tuhan, Debatamu dalan sidalanannami dohot bagi aha sibaenonnami.”

⁴ Hualusi ma, “Antong denggan ma i. Hujagit ma pangidoanmunu i. Hutangiangkon ma tu Tuhan Debatanta i jana sanga aha pe antong alusna, hupaboa pe tu hamu sudena; sada pe nada tola bunihononku tu hamu.”

⁵ Didok halahi ma tu au: “Padiar ma Tuhan gabe saksi na sintong jana na bisa dihaporsayai maradopkon hami, muda inda hami oloi sude hata na dung disuru Tuhan, Debatamu tu hami.

⁶ Na denggan bope na jat, sai tangihononnami do sora ni Tuhan, Debatanta, paboa na dung hami suru ho tuSia, anso denggan hami hara ni na dung hami bege sora ni Tuhan, Debatanta.”

Alus ni Tuhan tu tangiang ni si Jeremia

⁷ Dung sampulu ari mangkuling ma Tuhan tu au.

⁸ Dung i hupiohon ma si Johanan rap dohot angka parpangkat i dohot sude halak na asing i na ro rap dohot ia.

⁹ Hudokkon ma tu halahi, “Disuru hamu do au palaluhon pangidoanmunu tu Tuhan, Debata ni Israel. Pandok ni Tuhan,

¹⁰ ‘Muda giot hot do hamu maringanan di luat on, angkatonKu ma hamu jana nada dabuhononKu; pajongjongonKu ma hamu, jana nada runcurhononKu. Marsak sajo do Au hara ni na dung Hupamasa hamamago tu hamu.

¹¹ Ulang be mabiar hamu tu raja ni Babel i. Di tonga-tongamunu do Au laho paluahon hamu sian kuaso ni tangannia.

¹² Hara ni ibo ni rohangKu mida hamu, baenonKu ma raja ni Babel i maribo ni roha mida hamu jana padiaronnia ma hamu maringanan ditanomu. Au Tuhan, madung mandok songon i.’ ”

^13-15 Tapi angka na tading di Juda, ulang hamu manggagai tu Tuhan Debatamunu, jana ulang dok hamu, “Nada giot hami maringanan di luat on. Tu Mesir do giotnami kehe jana disi hami maringanan. Anggo disi nada hilalaonnami be parporangan, nada pioonna be hami dohot marporang jana nada be tangkuraparon.” Muda laing manggogo dope rohamunu angkon kehe tu Mesir jana maringanan disi, songon on ma tona ni Tuhan Na Markuaso i, Debata ni Israel tu hamu,

¹⁶ “Ayak-ayakon ni porang dohot tangkuraparon na nihabiaranmunu i ma hamu lalu tu Mesir jana mate ma hamu disi.

¹⁷ Sandok halak na manggogo rohana kehe tu Mesir jana maringanan disi, mate di pangan porang ma i, mate hara ni tangkuraparon sanga hara ni nyae masa. Sahalak pe nada adong na malua sian mara na giot paroonKi tu halahi; angkon gabe mate sude.

¹⁸ Songon dia pangalaluhonKu, Au Tuhan Na Markuaso, Debata ni Israel, di hamumurukKu dohot hosom ni rohangKu tu halak Jerusalem, songon i muse ma palaluonKu hosom ni rohangKu tu hamu na kehe tu Mesir i. Gabe mabiar ma halak mida hamu; incahanna hamu, jana goarmunu baenon ni halak gabe songon bura. Nada idaonmunu be bona bulumunu on.”

¹⁹ Dung i hudok ma muse, “Madung diparentahon Tuhan tu hamu na laing tading di Juda anso ulang kehe hamu tu Mesir. Jadi saonnari hupaingot hamu

²⁰ na dung mambaen hasalaan na godang do hamu. Dipangido hamu anso martangiang au tu Tuhan Debatanta i salaho tu hamu, jana marjanji do hamu laho patuluskon sude na nidok ni Tuhan i.

²¹ Saonnari madung hupalalu tu hamu tona ni Tuhan Debatanta i, hape nada ra hamu mangoloisa.

²² Antong, ingot hamu ma: Di tano por ni roha na giot topoton dohot ingananmunu i, disi ma hamu mate baenon ni porang, sanga hara ni haleon potir sanga baenon ni nyae masa.”